ကြယ်မြည်သံ

ကြယ်မြည်သံ

          ဇာတ်လမ်းကို အဆုံးသတ်သင့်ပြီ မဟုတ်လား။ ရှေ့ဆက်မရတော့တဲ့ ဇာတ်လမ်းတစ်ပုဒ်ကို သူရပ်တန့်ခဲ့တာ ကြာပြီပဲလေ။

          ပိတ်လှောင်နေတဲ့အခန်းထဲကနေ အပြင်ကို ချောင်းကြည့်ဖို့ ပြတင်းပေါက်ကြီးကြီး မလိုပါဘူး။ လှောင်ပိတ်နေတဲ့ ခံစားချက်ကနေ လွတ်မြောက်ဖို့ဆိုရင်တော့ ဒီအခန်းထဲက ခေတ္တခဏထွက်သွားဖို့ လိုတယ် မဟုတ်လား။ အတွေးနှင့်အတူ ညနေစောင်းတုန်းက နေစူး၍ စေ့ထားသည့် ပြတင်းပေါက်ကို တွန်းဖွင့် လိုက်သည်။ သုတ်ခနဲဝင်လာသည့် လေအေးနှင့်အတူ ပြတင်းတစ်ချပ်က ပြန်ပိတ်လာသဖြင့် လက်နှင့်တွန်းထုတ်လိုက်ရသည်။ ပြန်ပွင့်သွားသည့် ပြတင်းတံခါးနှင့်အတူ အပြင်မှာ မြည်နေသည့် ပိုးကောင်မွှားကောင်တို့၏ အသံကို သတိပြုမိတော့သည်။ ခပ်လှမ်းလှမ်းမှ ကျစ်…ကျစ်…ကျစ်…ကျစ် နှင့် မြည်နေသော အသံကို ဟိုးကလေးဘဝတုန်းက ကြယ်မြည်သံဟု မည်သူမျှ မပြောဘဲနှင့် ထင်မြင်ခဲ့ဖူးသည်။

          ကြယ်တွေ အသံမြည်တတ်ပါသလား။ အသံမမြည်တတ်ဟု ဆိုလျှင် ဝေးလွန်း၍ မကြားခြင်းသာ ဖြစ်မည်ဟု စောဒကတက်လိုပါသည်။ တကယ်တော့ သူသည် ကြယ်မြည်သံကို မကြားဖူးပါ။ ကလေးဘဝတုန်းကတော့ ကြယ်မြည်သံဟုထင်သည့် အသံကို ကြားမိခဲ့ခြင်းသာဖြစ်သည်။ ကြယ်မြည်သံကို ကြားနိုင်ရန်အတွက် ပကတိနားကောင်းဖို့မလိုပါ။ ခံစားနိုင်သည့်၊ ခံစားတတ်သည့် နှလုံးသားရှိဖို့သာ လိုပါသည်။

          ယခုအခါတွင် ပိတ်လှောင်နေသည့် အခန်းထဲမှ စိတ်အိုက်မွန်းကြပ်မှုများကို ပြတင်းတံခါးတစ်ချပ် ဖွင့်ရုံနှင့် လွတ်မြောက်ခဲ့ပြီဖြစ်သည်။ သို့သော် … ။

          ***                                           ***                                           ***

          " ဘယ်လောက်အထိချစ်နိုင်သလဲ မင်းသိသင့်တယ်။ ဘယ်သူ့ကြောင့်ရူးတာလဲ ဆင်ခြင်ပါကွယ် ။ ရွှေဘုံနန်းစည်းစိမ်တွေ မရှိဘူးကိုယ့်မှာ၊ ဒီခြေနဲ့လက်တစ်စုံပဲ အားကိုးပြီးကွာ လိုက်နိုင်မလား…"

          ရုတ်တရက်မြည်လာသည့် ဖုန်းသံကြောင့် တစ်ဦးတစ်ယောက်ထံမှဖုန်းထင်မိလိုက်သော်လည်း မဟုတ်နိုင်မှန်းသိ၍ သီချင်းထံကို နားထောင်နေလိုက်သည်။ ဖုန်းစခရင်ကို ကြည့်လိုက်တော့ လဲ့ထံမှ ဖုန်းဖြစ်နေသည်။ ပြီးမှ ကောက်ကိုင်လိုက်ရင်း …

          " ဟယ်လို … "

          " ဟင်း… ဖုန်းထူးသံကြီးကလည်း၊ ကို… ဘယ်သူနဲ့ကြူနေတာလဲ …"

          " ဘာတွေရစ်နေတာလဲကွာ၊ ရေချိုးခန်းဝင်နေလို့၊ ခုအဝတ်အစားတောင် မလဲရသေးဘူး …"

          " သိပါဘူး ချက်ခြင်းမကိုင်တော့ တစ်ယောက်ယောက်နဲ့ (Chat) ချက်နေတာလားလို့ …"

          " မင်း ကိုယ့်ကိုယ် ဘယ်အချိန်ထိ သံသယဝင်နေဦးမှာလဲ လဲ့၊ ဘယ်အချိန်အထိ စော်ကားနေဦး မှာလဲ…ဟင် …"

          " ဆောရီး ကိုကို… လဲ့အဲလို မရည်ရွယ်ပါဘူး၊ ဒီနေ့ ကိုကိုဖုန်းမခေါ်သေးတာရယ်… ပြန်လာရင် သမီးလေးမှာလိုက်တာလဲ မေ့နေမှာစိုးလို့ သတိပေးရင်း … အဟင်း လဲ့လည်း ကို့ကို သတိရလို့ … "

          လဲ့က ဟိုးတုန်းကလို ကိုကိုဟုဆိုကာ ပြာပြာသလဲဖြေရှင်းတော့ သူ့ရင်မှာ အနည်းငယ် ကျေနပ်သွားသလိုတော့ ရှိသည်။ ဟိုးတုန်းက သူခရီးထွက်လျှင် ကားရပ်နားတိုင်း လဲ့ထံသို့ ဖုန်းဆက်သည်။ နောက်တော့ တစ်နေ့ နှစ်ကြိမ်ခန့်တော့ အနည်းဆုံး ဖုန်းဆက်သည်။ ခုနောက်ပိုင်းတော့ သူ့ထံသို့ ဖုန်းစဆက်သူမှာ လဲ့ဖြစ်နေတတ်သည်။ ဒီနေ့ သူလဲ့ထံသို့ ဖုန်းမခေါ်ရသေးတာ သတိရသွားသည်။

          " အေးပါကွာ၊ မမေ့ပါဘူး၊ လဲ့အတွက်ရော ဘာဝယ်ခဲ့ရမလဲ၊ ဒီမှာ ဒူးရင်းသီးတွေ အရမ်းမိုက်တယ်နော …"

          " အဲ့ဒါဆို လဲ့အတွက် ဒူးရင်းသီးဝယ်ခဲ့ … ကိုလည်း သူများတွေနဲ့ (Chat) မနေနဲ့နော် …"

          ဒီတစ်ခါတော့ လဲ့ကို သူမအော်ဖြစ်တော့။ လဲ့အသံက ပျော့ပျော့ပြောင်းပြောင်းနှင့် တောင်းပန်ဟန် ပေါက်နေသောကြောင့် ဖြစ်သည်။ နောက်ပြီး လူမှုကွန်ယက်ကို သူမသုံးတော့သည်မှာ ကြာပြီ မဟုတ်လား။

          " အေးပါကွာ အဲဒါတွေက ပြီးသွားခဲ့ပါပြီ၊ ဒါပဲနော် ခဏနေ ဘော့စ်နဲ့ ဒင်နာသွားရတော့မှာမို့ …"

          လဲ့ ဖုန်းချသွားပြီဆိုတော့မှ သူ့ဖုန်းကို ကုတင်ဘေး စာပွဲငယ်လေးပေါ်သို့ တင်လိုက်သည်။ ထို့နောက် အဲကွန်းရီမုဒ်ကိုယူကာ အဲကွန်းကို အမြင့်ဆုံးသို့ မြှင့်လိုက်သည်။ ဒင်နာသွားရန် အချိန်လိုသေးသဖြင့် သူအိပ်ယာပေါ်သို့ လှဲလိုက်သည်။ မျက်လုံးတွေကို မှိတ်ကာ အစာဝနေသည် မြွေတစ်ကောင်လို ငြိမ်သက်ထားလိုက်သည်။ ပထမဆုံး အာရုံတွင် ပေါ်လာသည်က မ…။ သူ၏ မ-ဖြစ်သည်။ နောက် သမီးလေး၏ မျက်နှာ။ လဲ့၏ ပုံရိပ်။ ခန္ဓာကိုယ်က ငြိမ်သက်နေသော်လည်း စိတ်အစဉ်က အတွေးနှင့်အတူ လှိုင်းခတ်နေသည်။ အရာအားလုံး၏ အပြစ်သည် သူ့ကြောင့်ပင် မဟုတ်ပါလား။

          ***                                           ***                                           ***

          တကယ်တော့ သူသည် သူဌေး၏ လူယုံဖြစ်သည်။ ဒရိုင်ဘာလည်းဖြစ်သည်။ သူဌေး၏ (PSO) ထက်ပင် သူက သူဌေးနားနေခွင့်ရသူ၊ နေရသူဖြစ်သည်။ ကုမ္ပဏီ၏ စူပါဗိုက်ဇာနှင့် သူ့လစာတူသည်ကို သိသည်။ လကုန်သွား၍ စာရင်းချုပ်ကြည့်မည်ဆိုလျှင်တော့ သူ့တစ်လဝင်ငွေကို မျက်စောင်းထိုးမည့်သူ များပေလိမ့်မည်။ ထို့ကြောင့် ကုမ္ပဏီ၏ ရုံးလုပ်ငန်းပိုင်းတွင် မဝင်တော့ဘဲ သူဌေးသွားရာလိုက်ကာ စာရင်းအင်းများကို ဝိုင်းကူလုပ်ပေးသည်။ ကားမောင်းရသည့်အခါ မောင်းသည်။ သူ၏သူဌေးက ကိုယ်တိုင်ကားမောင်းရသည်ကို နှစ်သက်သည်။ ချွင်းချက်အနေဖြင့် သူမောင်းသည်ကိုလည်း စိတ်ချသည်။ သို့နှင့် သူဌေး လုပ်ငန်းကိစ္စ ခရီးသွားလျှင် သူပါသည်။ ကမ်းခြေသွားလျှင် သူပါသည်။ (KTV) သွားလျှင်…၊ (Massage) သွားလျှင်…။ သူမပါသည်က ခပ်ရှားရှားဖြစ်သည်။ တစ်ခါတစ်ရံတော့ (Body Guard) တာဝန်ကိုလည်း ယူရသေးသည်။

          သူခရီးသွားတိုင်း အိမ်မှာကျန်နေသည့် လဲ့ထံသို့ ဖုန်းခေါ်သည်။ နောက်တော့ သူနှင့်လဲ့ဘဝထဲသို့ သမီးလေးရောက်လာသည်။ ထိုအခါ ခရီးသွားတိုင်း ဖုန်းပိုဆက်ဖြစ်သည်။ နောက်တော့ ရောက်သည့်နေရာ ထူးထူးဆန်းဆန်းရောက်တိုင်း ဖေ့စ်ဘွတ်ခ်တွင် တင်သည်။ လမ်းတွင် ကားပျက်လျှင်တောင် ကားပျက်ကြောင်း တင်သည်။ အိမ်မှာကျန်နေသည့် လဲ့သိစေရန်၊ အပျင်းပြေစေရန်အတွက် ဖြစ်သည်။ ဖေ့စ်ဘွတ်ခ်ဆိုသည်က သိသည့်အတိုင်းပင်။ သူငယ်ချင်းများ၏ (Like)များ၊ (Comment) များကြောင့် သူဖေ့စ်ဘွတ်ခ် သုံးရသည်ကို ပျော်လာသည်။ နောက်တော့ သူ မ-နှင့် ဆုံသည်။

          သူတင်သည့် စာသားများ၊ ဓာတ်ပုံများအောက်တွင် ပေးလာသည့် မ-၏ မှတ်ချက်လေးများကြောင့် မကို သတိထားမိသွားခြင်း ဖြစ်သည်။ နောက် မ-၏ (Wall) ကို သွားကြည့်သည့်အခါ မကို မော်ဒယ်တစ်ယောက်ဖြစ်ကြောင်း သိသွားသည်။ ဟိုးတုန်းက မော်ဒယ်ဖြစ်သော်လည်း ယခုအခါတွင် မ-က စားသောက်ဆိုင်တစ်ဆိုင်ကို ဦးစီးဖွင့်နေသူ ဖြစ်သည်။ ရိုးသားစွာ ပြောရမည်ဆိုလျှင် မ-သည် သူ့ထက် အသက်ကြီးသော်လည်း ကောက်ကြောင်းလှသူဖြစ်သည်။ (Chat Box) မှနေ၍ မ-စကားလာပြောသည့်အခါ သူလိုလိုလားလား ပြန်ပြောဖြစ်သည်။ နောက်တော့ ဆက်သွယ်ရေးကဒ်တွေ ပေါများနေသည့်ခေတ်တွင် နေထိုင်သူပီပီ မနှင့် ဖုန်းအဆက်အသွယ် ရှိလာသည်။ သို့နှင့် …။

          ***                                            ***                                           ***

          မက သူအိမ်ထောင်ရှိသည်ကို သိသည်။ နောက်ပြီး မက သူ့ထက် ငါးနှစ်ကြီးသည်။ သူက လဲ့ထက် ငါးနှစ်ကြီးသည်။ မက သူ့ကို စတင်သဘောကျသူဖြစ်ပြီး သူက လဲ့ကို စတင် သဘောကျခဲ့သူဖြစ်သည်။ လဲ၏မိဘများ သဘောမတူသည့်တိုင် သူက လဲ့ကို သူ့နောက်သို့အပါခေါ်နိုင်ခဲ့သူဖြစ်သည်။ ယခု မက သူ့ကို အပါခေါ်ဖို့ ကြိုးစားနေသည်။ သူ၏ အလှနှင့်၊ သူ၏ ဓနနှင့် ဖြစ်သည်။ သူတွေဝေလာသည်။ ဟုတ်ကဲ့ ပြောနေရသည့် နေရာမှ ဟုတ်ကဲ့အပြောခံရသည့် ဘဝကို နေချင်လာသည်။ ကိုယ်တိုင်မောင်းနေရသည့် ကားသည် ကိုယ့်ကားဖြစ်လိုလာသည်။ သုံးပွင့်ဆိုင်ဇာတ်လမ်းကို သပ်ရပ်သေသပ်စွာ သူက နေသော်လည်း အမှန်တရားသည် စောစီးစွာရောက်လာခဲ့လေသည်။ မ-၏ ဇာတ်ကွက်ကြောင့် ဖြစ်သည်။ သူနှင့် (Chat Box) တွင် ပြောထားသည်များကို (Screen short) ရိုက်ကာ လဲ့ထံသို့ ပို့လိုက်ခြင်းဖြစ်သည်။ လဲ့နှင့် သူ ပြဿနာ အကြီးအကျယ်တက်သည်။ လဲ့ကို ဖုန်းဖြင့် နောက်ဆုတ်ပေးရန်နှင့် လျော်ကြေးကိစ္စများ အကြောင်း စကားစလာသည့်အခါမှာတော့ လဲ့ အိမ်ပေါ်မှ ဆင်းသွားသည်။ သူလည်း စိတ်ရှုပ်ထွေးစွာ၊ ဝေခွဲရခက်စွာနှင့် အလုပ်မှခွင့်ယူကာ သူ့မိဘများရှိရာ မြို့သို့ ပြန်လာခဲ့သည်။ ထိုမြို့တွင် သူ၏ ရင်ဖွင့်ဖော် သူငယ်ချင်းတစ်ယောက်ရှိသည်။ သူအခြေအနေအားလုံးကို ပြောပြလိုက်သည်။

          " သူငယ်ချင်းရေ ငါဟာ သူငယ်ချင်းကောင်းတစ်ယောက် မဟုတ်ဘူး။ သူငယ်ချင်းဆိုတာ မကောင်းတာ၊ မသင့်တာ လုပ်နေရင် တားမြစ်ရမှာ မဟုတ်လား။ နောက်ဆုံး အမုန်းခံပြီးတော့ကို တားရပြောရမှာလေး။ ငါကတော့ ဒီလိုမဟုတ်ဘူး … "

          " အင်းဆိုစမ်းပါဦး…"

          သူတို့ထိုင်နေကြသည်က သူတို့မြို့ငယ်လေးရှိ စားသောက်ဆိုင်တစ်ခုတွင် ဖြစ်သည်။

ဘီယာခွက်တွင် သီးထနေသည့် ရေစက်လေးများကို ကြည့်ရင်း…

          " ဒီလိုကွာ၊ ဆေးလိပ်မကောင်းဘူး၊ အရက်မကောင်းဘူးဆိုတာ ငါတို့သိတယ်။ ခုတို့ထိုင်နေတာ စားသောက်ဆိုင်ကွာ။ မကောင်းတာ မသိလို့ ထိုင်တာမှ မဟုတ်တာ။ ဟုတ်တယ်မဟုတ်လား။ စဉ်းစားသင့်တယ်ထင်တာလေးတွေကိုတော့ မင်းကို ပြောပြမယ်…"

          " မင်းတောင် တိုးတက်နေမှပဲ …ပြောပြော …"

          " မင်းကို မှီခိုနေတဲ့ ဘဝနှစ်ခု ရှိတယ်၊ မလဲ့ရယ် သမီးလေးရယ်ပေါ့။ နောက်ထပ် ဘဝတစ်ခုကို မင်းဖန်တီးတော့မယ် ဆိုပါစို့။ နောက်တစ်ခုမှာလည်း ကလေးဆိုတာ ရောက်လာမှာပဲ။ ဘဝလေးခုဖြစ်သွားပြီ။ ကလေးတစ်ယောက်က ဖခင်မဲ့သွားမယ်၊ တစ်ယောက်က သူ့ဖခင်ရဲ့အချစ်ကို ဝေမျှခံစားရတယ်လို့ ထင်မယ်၊ မင်း မိန်းမတစ်ယောက်ကို ဖက်အိပ်နေချိန်မှာ ကျန်တစ်ယောက်က ဒေါသနဲ့ အလူးလူးအလိမ့်လိမ့်ဖြစ်နေလိမ့်မယ်။ မင်း ကလေးတစ်ယောက်ကို ထွေးပိုက်ထားချိန်မှာ ကျန်ကလေး တစ်ယောက်က ဖခင်ရှိရက်နဲ့ ဝမ်းနည်းအားငယ်နေရလိမ့်မယ်…"

          ထိုရက်က သူညဥ့်နက်မှ အိမ်သို့ ပြန်ခဲ့လိုက်သည်။ မူးယစ်ရီဝေနေသော်လည်း သူ့သူငယ်ချင်း စကားသံက နားထဲတွင် ပဲ့တင်ထပ်နေသည်။ မလုပ်သင့်တာကို လုပ်ရင် လူယုတ်၊ လုပ်သင့်တာကို မလုပ်ခဲ့ရင်လည်း လူယုတ်ပဲ ဆိုသော စကားဖြစ်သည်။ မြို့ကလေးမှ သူပြန်လာသည့်အခါမှာတော့ ဆုံးဖြတ်ချက်တို့ မကျသေးသည့်တိုင် ဇွတ်တိုးတော့မည့် သူ၏အစီအစဉ်တို့ ဝေဝါးလာသည်။ သူ မထံသို့ ဖုန်းမဆက်တော့။ ဖုန်းမဆက်သည့်တိုင် ဝင်လာသည့် ဖုန်းတို့က ရှိသေးသည်။ တစ်ကြိမ်မှာတော့ သူရှောင်မနေတော့ဘဲ မကို ရှင်းရှင်းပြတ်ပြတ်ပင် ပြောလိုက်တော့သည်။ တစ်ဖက်မှ စွပ်စွဲလာမည့် လူယုတ်မာဆိုသော စကားကိုမျှော်လင့်ထားသော်လည်း ငိုရှိုက်သံတို့သာ သူကြားခဲ့ရသည်။ ထို့နောက်မှာတော့ ဖုန်းခေါ်သံတို့ ကျဲပါးသွားသည့်။ မြည်နေသည့် ဖုန်းကို အဓိပ္ပါယ်မဲ့ စိုက်ကြည့်နေခဲ့ရသည်ကလည်း ရင်မှာ နာကြင်ရပါသည်။ နှုတ်မှ ဖွင့်မအန်မိ သော်လေည်း ရင်မှာမြည်ဟည်းခဲ့သည့် မေးခွန်းကတော့ တစ်ခုတည်းသာ ဖြစ်သည်။

          " ဘဝမှာ အချစ်ဟာ အကြိမ်ကြိမ် သီးပွင့်တတ်ပါသလား …"

***                                           ***                                           ***

ဇာတ်လမ်းကို အဆုံးသတ်ခဲ့ပြီ မဟုတ်လား။ ရှေ့ဆက်မရတော့တဲ့ ဇာတ်လမ်းတစ်ပုဒ်ကို သူရပ်တန့်ခဲ့တာ ကြာပြီပဲလေ။

ပိတ်လှောင်နေတဲ့အခန်းထဲကနေ အပြင်ကို ချောင်းကြည့်ဖို့ ပြတင်းပေါက်ကြီးကြီး မလိုပါဘူး။ လှောင်ပိတ်နေတဲ့ ခံစားချက်ကနေ လွတ်မြောက်ဖို့ဆိုရင်တော့ ဒီအခန်းထဲက ခေတ္တခဏထွက်သွားဖို့ လိုတယ် မဟုတ်လား။ သူ့ဘဝတွင် အမိုက်မှောင်ကျခဲ့ဖူးသည်။ မိုက်မှားမှန်းသိနေသော်လည်း ခံစားမှုနောက်ကိုလိုက်ကာ မိုက်မဲဖို့ ကြိုးစားခဲ့ဖူးသည်။ မိုက်မှားဖို့ လွယ်သလောက် အမှားကို ပြင်ဖို့ခက်သည်ကို သိသည်။ သူ ရုန်းထွက်ရန်ခက်ခဲသည့် အမှားကို ရုန်းထွက်နိုင်ခဲ့ပါသည်။ ကတိကဝတ်များစွာနှင့် လဲ့ကို သူ့မိဘထံမှ သူပြန်ယူနိုင်ခဲ့သည်။ သို့သော်…။

သူ မှားခဲ့သည်က တစ်ကြိမ်ထဲသာ ဖြစ်သည်။ သို့သော် တခြားသူများ၏အတွေးတွင် အကြိမ်ကြိမ်မှားသည်။ အမှားထဲမှ သူရုန်းနိုင်ခဲ့သော်လည်း အခြားသူများ၏ အတွေးတိမ်တိမ်လေးထဲ မှာတော့ သူအကြိမ်ကြိမ်နစ်သည်။ နစ်ခဲ့ရသည်။ နစ်နေဆဲဖြစ်သည်။ အတွေးနှင့်အတူ မွန်းကြပ်လာသည်။ ညနေစောင်းတုန်းက နေစူး၍ စေ့ထားသည့် ပြတင်းပေါက်ကို အားစိုက်တွန်းဖွင့် လိုက်သည်။ သုတ်ခနဲဝင်လာသည့် လေအေးနှင့်အတူ ပြတင်းတစ်ချပ်က ပြန်ပိတ်လာသဖြင့် လက်နှင့်တွန်းထုတ် လိုက်ရသည်။ ပြန်ပွင့်သွားသည့် ပြတင်းတံခါးနှင့်အတူ အပြင်မှာ မြည်နေသည့် ပိုးကောင်မွှားကောင်တို့၏ အသံကို သတိပြုမိတော့သည်။ ခပ်လှမ်းလှမ်းမှ ကျစ်…ကျစ်…ကျစ်…ကျစ် နှင့် မြည်နေသော အသံကို ဟိုးကလေးဘဝတုန်းက ကြယ်မြည်သံဟု မည်သူမျှ မပြောဘဲနှင့် ထင်မြင်ခဲ့ဖူးသည်။

          ကြယ်တွေ အသံမြည်တတ်ပါသလား။ အသံမမြည်တတ်ဟု ဆိုလျှင် ဝေးလွန်း၍ မကြားခြင်းသာ ဖြစ်မည်ဟု စောဒကတက်လိုပါသည်။ တကယ်တော့ သူသည် ကြယ်မြည်သံကို မကြားဖူးပါ။ ကလေးဘဝတုန်းကတော့ ကြယ်မြည်သံဟုထင်သည့် အသံကို ကြားမိခဲ့ခြင်းသာဖြစ်သည်။ ကြယ်မြည်သံကို ကြားနိုင်ရန်အတွက် ပကတိနားကောင်းဖို့မလိုပါ။ ခံစားနိုင်သည့်၊ ခံစားတတ်သည့် နှလုံးသားရှိဖို့သာ လိုပါသည်။

          ကြယ်တွေမြည်နေခြင်းသည် နာကျင်၍ ငိုကြွေးနေခြင်းလည်း ဖြစ်သည်။ သို့မဟုတ် တစ်ဦးတစ်ယောက်၏ မလွတ်မြောက်နိုင်မှုအတွက် မြည်တမ်းညည်းတွားနေခြင်းလည်း ဖြစ်နိုင်ပါသည်။

          ယခုအခါတွင် ပိတ်လှောင်နေသည့် အခန်းထဲမှ စိတ်အိုက်မွန်းကြပ်မှုများကို ပြတင်းတံခါးတစ်ချပ် ဖွင့်ရုံနှင့် လွတ်မြောက်ခဲ့ပြီဖြစ်သည်။ သို့သော် အတိတ်မှ စိတ်အိုက်မွန်းကြပ်စရာကိစ္စများမှ သူမလွတ်မြောက်နိုင်သေးသည်မှာ သေချာသည် ။ နာရီတွေ၊ ရာသီတွေလည်ပတ်နေသ၍ ကိန်းဂဏန်း တစ်ခုကိုတော့ တစ်နေ့နှစ်ကြိမ် ဖြတ်သန်းနေဦးမှာပဲ ဖြစ်သည်။ အဘယ့်ကြောင့်ဆိုသော် နာရီလက်တံများ သည် ဆယ့်နှစ်ပြီးသည်နှင့် တစ်ကိုရောက်သွားသည် မဟုတ်လား။

အပြင်တွင် ကြယ်တွေ မြည်နေပြီ ဖြစ်သည်။

                                                                   
ရှဥ့်ညိုလေး