ရောက်တတ်ရာရာ ရေးလိုက်တာ
ဒီနေ့ ကျွန်တော် တော်တော်ပျော်ပါတယ်။ ရွှေအမြုတေက ဆရာဦးဝင်းငြိမ်းနဲ့ စကားပြောခွင့်ရလို့၊ ဆရာ့အသံကို ပထမဆုံးကြားဖူးခြင်းလည်း ဖြစ်နေလို့ပါ။ ကျွန်တော် အပြင်က ပြန်လာတော့ အိမ်မှာထားခဲ့တဲ့ဖုန်းကို နံပါတ်စိမ်းတစ်ခု ဝင်လာတာ သားငယ် ကောင်းသုတက ကိုင်လိုက်တယ်တဲ့။
အဲဒါနဲ့ အဲဒီနံပါတ်ကို ပြန်ခေါ်လိုက်တယ်။ ရွှေအမြုတေကလို့ ကြားရပေမယ့် လိုင်းသိပ်မကောင်းလို့ နောက်ဖုန်းတစ်လုံးနဲ့ ပြန်ခေါ်လိုက်တယ်။ ကျွန်တော် ပြောနေတဲ့သူက ဆရာဦးဝင်းငြိမ်း ဖြစ်နေရော။ အသံက လူငယ်လေးအသံမျိုးဖြစ်နေတာတစ်ကြောင်း၊ ညင်သာသိမ်မွေ့တဲ့အသံဖြစ်နေတာရော စိတ်ထဲမှာ ဇဝေဇဝါတောင် ဖြစ်မိတယ်။ အပြင်မှာ ရုပ်ရှင်မင်းသား၊ မင်းသမီးနဲ့တွေ့ရင်တောင် ကိုယ်က ပရိသတ်ဆိုတဲ့အသိနဲ့ သိပ်မတုန်လှုပ်ခဲ့ဖူးပါဘူး။ ခုကျ ကျွန်တော့် လက်ဦးဆရာ၊ ကျွန်တော့်ကျေးဇူးရှင်ရဲ့ အသံကို ပထမဦးဆုံးကြားခွင့်ရတာလေ။ စိတ်ထဲမှာ တုန်လှုပ်ကြည်နူးမိတယ်။ ကျွန်တော့်စာမူ ရွှေအသစ်ထဲရောက်နေလို့ ဖုန်းဆက်မေးတာပါ။ ဆရာဟာ တပည့်တွေကို အဲဒီလို ဂရုစိုက်တာပါ။ ဝမ်းသာတုန်လှုပ်တဲ့စိတ်နဲ့ စကားတချို့ပြောမိပေမယ့် အစီအစဉ်တကျတော့ မဟုတ်တော့ဘူး။ ကပေါက်တိ ကပေါက်ချာ ဖြစ်နေရင်လည်း ရွာသား တပည့်လေးကို ဆရာခွင့်လွှတ်မှာပါ။
ရန်ကုန်ရောက်တုန်းက ရွှေအမြုတေ တိုက်ကို သွားဖို့စီစဉ်ပေမယ့် ရုံးပိတ်ရက်ဖြစ်နေလို့ မသွားခဲ့လိုက်ရဘူး။ ကျွန်တော့် သားလေးနဲ့ အမျိုးသမီးက ရွှေတိုက်ကို ရောက်ခဲ့သေးတယ် လွန်ခဲ့တဲ့ (၂)နှစ်က။ ဆရာ့ကို ဖုန်းလက်ခံဖြေပေးတာ အဲဒီသား အငယ်ကောင်ပေါ့။
ပြီးခဲ့တဲ့လက ရန်ကုန်အလည်သွားတုန်း ဆရာ မောင်ပိုင်(လေးမျက်နှာ)၊ ဆရာ ကိုစက်ဖေ၊ ဆရာမ ညိုပြာဝိုင်၊ ဆရာ မင်းဝေဟင် တို့နဲ့ပဲ ဆုံခဲ့ရတယ်။ သူတို့တွေ ပေးလိုက်တဲ့ စာအုပ်လက်ဆောင်တွေနဲ့ တွေ့ဖြစ်ခဲ့ပုံကို သီးသန့်စာရေးမယ် စိတ်ကူးထားပေမယ့် အလုပ်များနေတာနဲ့ မရေးဖြစ်သေးတာ ခုချိန်ထိပါ။ ဟိုးတုန်းက စိတ်ကူးဖူးခဲ့တယ်။ ရန်ကုန်သွားရင် ရွှေအမြုတေတိုက်သွားမယ်၊ ဆရာမင်းဝေဟင်နဲ့ တွေ့မယ်ဆိုတဲ့ စိတ်ကူးထဲက ဆရာမင်းနဲ့ တွေ့ခဲ့ရတယ်။ ကျွန်တော့်ကို စာအုပ်လက်ဆောင်ပေးခဲ့တဲ့ ပထမဦးဆုံးသော စာရေးဆရာပေါ့။ ဆရာတစ်ဆင့်ပါးပြီး ပေးလိုက်လို့ ဆရာဝေမိုးနိုင်နဲ့လည်း ဆုံခွင့်ရခဲ့တာလည်း အမှတ်တရပါ။ ခု ဆရာထပ်ပေးလိုက်တဲ့စာအုပ်က လရိပ်အောက်က မိုးတိမ်၊ အရင်တစ်ခါက အခွံကလေးတွေ ဆိုတော့ ကျွန်တော့်ဆီမှာ ဒိတ်ဒိတ်ကြဲတွေချည့်ပဲပေါ့။ လရိပ်အောက်က မိုးတိမ်က စိမ်း ဆိုတဲ့ စာဖတ်သူ ညီမငယ်က လက်ဆောင်ပေးထားလို့ ကျွန်တော့်ဆီမှာ ရှိပြီးသားပေမယ့် ဆရာ့လက်မှတ်လေးပါတဲ့စာအုပ်ကိုလည်း မက်မက်စက်စက်ရှိပြန်ရော။ ကျွန်တော့် ဝတ္ထုတိုလေးပါစမှာ ဆရာနဲ့ ဖုန်းပြောခဲ့ဖူးတယ်။ ဆရာက ပေါ့ပေါ့ပါးပါး ရင်းရင်းနှီးနှီးပြောတတ်တော့ အစ်ကိုတစ်ယောက်လိုပဲ ခံစားမိတယ်။ အဲဒါနဲ့ ကိုမင်းလို့ပဲ ခေါ်ဖြစ်ခဲ့တယ်။
ဆရာမင်းနဲ့ပတ်သက်ပြီး ကျွန်တော် အထင်လွဲ၊ အမြင်လွဲခဲ့တာလေးလည်း ဝန်ခံချင်ပါတယ်။ ဆရာမင်းရဲ့ ရေးဖော်ရေးဘက်တွေက အသားမဲတဲ့အကြောင်း စနေကြတော့ တကယ်အသားမဲတယ် ထင်မိရော။ တစ်ခါ သူက တိုက်ပုံအမည်းကြီးနဲ့ သွားဖွေးဖွေးနဲ့ဆိုတော့ အမြင်ပါလွဲရောပေါ့ဗျာ။ တကယ်က ဆရာမင်းက အသားမမဲပါဘူး။ သူတို့ ရန်ကုန်သားတွေနဲ့ ယှဉ်ကြည့်မှ ညိုရုံလောက်ပါ။ တကယ်တမ်းကျ ကျွန်တော့်အသားကမှ ကတ္တီပါ အနက်နုခင်ဗျ။ အဲဒီအကြောင်း ဆရာမင်းနဲ့ ရယ်စရာပြောဖြစ်သေးတယ်။ ဆရာ ကိုစက်ဖေတို့နဲ့ ဆုံတော့ ဘယ်သွားချင်လဲဆိုပြီးမေးသဗျ။ အဲဒါနဲ့ ဆရာမင်းနဲ့ တွေ့ချင်တယ်၊ ရွှေသွားချင်တယ်လို့ ပြောတော့ တစ်ခါတည်း ဆရာမင်းနဲ့ ဖုန်းချိတ်ပေးတယ်။ ပြောနေရင်းနဲ့ မနက်ဖြန် ရွှေအမြုတေတိုက် သွားမယ်စိတ်ကူးထားတယ် ကိုမင်းဆိုတော့…
" ဟဲ့ ငအရဲ့ … မနက်ဖြန် မဂ္ဂဇင်းတိုက်ပိတ်တယ်ဟဲ့ …" တဲ့။
စိတ်ညစ်သွားတယ်။ ပျော်လည်း ပျော်သွားတယ်။ စိတ်ညစ်တာက ပိတ်ရက်ကို မေ့သွားလို့၊ နောက်ပြီး အချိန်အခက်အခဲကြောင့်။ ပျော်တာက ကိုယ့်ကို ဟဲ့ ငအရဲ့ဆိုပြီး ရင်းရင်းနှီးနှီးပြောလိုက်လို့ပါ။ ကမ္ဘာပေါ်မှာ ငအ ခေါ်ခံရလို့ ပျော်တာ ကျွန်တော်အပါအဝင် သိပ်ရှိမယ် မထင်ဘူးနော် ကိုမင်း။
ကျွန်တော် အ-တာကိုလည်း ဝန်ခံရဦးမယ်။ ရန်ကုန်မှာ မှတ်တိုင်ကျော်ဖူးသွားပြီ။ ဝိုင်ယာလက်ကားကို မှော်ဘီရောက်မယ်ထင်ပြီး သုံးခါပြေးတက်ဖူးတယ်။ စီးရမယ့် ဘတ်စ်ကားကို ဘက်မှားပြီး စောင့်ခဲ့ဖူးတယ်။
ရန်ကုန်ရောက်တော့ ဆရာပိုင်နဲ့ ပထမဆုံး စဆုံတယ်။ မူလတန်းတုန်းက သူငယ်ချင်းတစ်ယောက်ကို ပြန်တွေ့ရသလိုပဲ။ ပဲ မများဘူး။ သိပ်ချစ်ဖို့ကောင်းတယ်။ ကိုယ်က သူ့စာဖတ်ပြီး စာရိုးလို့ လေးစားခင်မင်မိတာ။ အပြင်မှာတွေ့တော့ စာလည်း ရိုးတယ်၊ လူလည်း ရိုးတယ်။ ကိုယ်လို ပဲမများဘူး။ (Junction 8) မှာ ထိုင်ရင်း ရောက်တတ်ရာရာ ပြောဖြစ်တယ်။ စာပေနဲ့ ပတ်သက်ပြီးကိုယ့်ခံစားချက်နဲ့ ထင်မြင်ယူဆချက်ပေါ့။ နောက်ပြီး ကမ်းလက်များရဲ့ စာအုပ်နှစ်အုပ် လက်ဆောင်ပေးသေးတယ်။ ဆရာစက် (ကိုစက်ဖေ) လာမယ်ဆိုတော့ ဝင်လာတဲ့ကားတိုင်း ဆရာစက်မှတ်ပြီး လိုက်ကြည့်မိတယ်။ တကယ်ရောက်လာတော့ သတိမထားလိုက်မိဘူး။
နောက်ရက်ကျတော့ ဆရာစက်က စာအုပ်ဆိုင်တွေ လိုက်ပို့တယ်။ မုန့်ကျွေးတယ်။ ဆရာတွေရဲ့ ဧည့်ဝတ်ကျေပွန်မှုကို တကယ်အားနာယူရတယ်။ ကျွန်တော်က လမ်းလျှောက်နည်းတော့ အဲဒီမှာ သိပ်မလည်နိုင်ဘူး။ နောက်ပြီး အစာအိမ်က ဗိုက်အင့်သိပ်မခံနိုင်လို့ စားရင် နည်းနည်းပဲဆိုတော့ သိပ်အားမရကြဘူး။ ကျွန်တော့်ကို အချိန်အများကြီးပေးတဲ့ ဆရာပိုင်၊ ဆရာစက် တကယ့်ကို ကျေးဇူးပါဗျို့။ ဆရာရဲ (ယက္ခ)ရဲကြီး ကတော့ ဆုံမယ်ထင်ထားပေမယ့် မဆုံလိုက်ရဘူး။ သိပ်ကိစ္စမရှိဘူး။ မုံရွာလာတုန်းက ဆုံပြီးသားဆိုတော့လေ။ ရည်ဝေ (လင်းရောင်ခြည်)ဆီလည်း အလည်မရောက်ခဲ့ရဖူး။ မုံရွာလာတုန်းတွေ့ထားနိုင်လို့ တော်သေးတယ်။ ဆရာမ ညိုပြာဝိုင်တော့ ဖုန်းဆက်ခေါ်ပြီး သူ့အိမ်အလည်လိုက်သွားတယ်။ ပြန်ကာနီးတော့ မသိချင်ယောင်ဆောင်ပြီး စာအုပ်တစ်အုပ် လက်ဆောင်တောင်းခဲ့တယ်။ ကိုယ်တွေက အဲ့လိုပါဆို။
နောက်ပြီး အဲဒီရောက်တုန်း သောက်ခဲ့ရတဲ့ တီးတစ်ခု ရှိတယ်။ စီလုံတီးတဲ့။ ဘာအဓိပ္ပါယ်လည်း မသိပေမယ့် သောက်ကြည့်တော့ ကောင်းတယ်။ သန်လျင်ဘက်သွားရင်း သောက်ခဲ့ရတာ။ စီလုံတီးသောက်တိုင်း သတိရမယ့် သူငယ်ချင်းမလေး တစ်ယောက်ရှိတယ်။ သူ့ နာမည်က မမီးတဲ့ … အပျိုကြီးပဲ။ အဲလေ ဘာမှ မဆိုင်ဘူး။ ပြောချင်တာက ရုပ်ချောတယ်၊ သဘောကောင်းတယ်၊ မုန့်ဆို များများစားမှ ကြိုက်တယ်။ ဒီခေတ်က မော်ဒယ်ခေတ်ဗျာ။ ဘယ်များများ စားမလဲ။ အဲဒါကြောင့် အပျိုကြီး ဖြစ်နေတာ။ ပြောချင်တာက မုန့်တွေအများကြီးစားပြီး (Single is the best) ဖြစ်နေတဲ့ သူငယ်ချင်းမလေးတွေ အများကြီးရှိတယ်လို့…။
ဒီစာဟာ ဒီနေ့ညနေမှာ ဆရာဦးဝင်းငြိမ်းနဲ့ ဖုန်းပြောခွင့်ရလို့ ဝမ်းသာပြီး ရောက်တတ်ရာရာကို ရေးမိရေးရာ ရေးလိုက်တာပါ။ သူငယ်ချင်းတို့လည်း ဖတ်မိဖတ်ရာ ဖတ်ပြီး ပြောချင်တာရှိခဲ့ရင်တော့ မန့်မိ မန့်ရာ မန့်ခဲ့ပါလို့…။
ရှဥ့်ညိုလေး
(၁.၁၁.၂၀၁၈ ည ၇း၂၂ မိနစ်)
Comments
Post a Comment