ကျွန်တော်က နပိုလီယံ
ကျွန်တော်က နပိုလီယံ
ကျွန်တော်ကျောင်းတက်တုန်းက ကျောပိုးအိတ်အပြာ ကြိုးတစ်ချောင်း ဘေးစောင်းလွယ်တဲ့ အိတ်ရယ်၊ ဂျင်းပဲန်အပြာရယ်၊ ဇစ်ပိုမီးခြစ်ရယ်၊ လန်ဒန်တစ်ဗူးရယ်၊ ကိုယ့်ကိုယ်ကိုယ် ထင်တစ်လုံးနဲ့ရယ်။ တကယ်က ဘာမှမဟုတ်ဘူး။ နောက်တော့ ပိုသီဘတ်သီနဲ့ ကြည့်ရခက်လို့ ကိုအောင်စိုးဆိုတဲ့ သူငယ်ချင်းက မျက်စိစပါးမွှေးစူးပြီး ကချင်လွယ်အိတ် ပြောင်းလွယ်ခိုင်းတယ်။ အဲဒီတော့ စပို့ရှပ်အဖြူရယ်၊ စတိုင်ပဲန်ရယ်၊ ကချင်လွယ်အိတ်အနီရယ်ပေါ့။ အဲအဲ ကျန်ခဲ့တော့မလို့ ကိုယ့်ကိုယ်ကိုယ် ထင်တစ်လုံးရယ်။ တကယ်တော့ ဘာကောင်မှ မဟုတ်ဘူးရယ်။
ဘာကောင်မှ မဟုတ်တာကို အိမ်ထောင်ကျပြီး ကလေးတစ်ယောက်ရ၊ အလုပ်အမျိုးမျိုးလုပ်ရမှ သိတော့တာ။ ဒါပေမယ့် ကိုယ့်ကိုယ်ကိုယ် ထင်တစ်လုံးကတော့ ခုချိန်ထိ တစ်ပြားသားမှ မလျှော့ဘူး။ လူနေချုံကြား၊ စိတ်နေချုံကြားဆို မကောင်းဘူးလေ။ လူနေချုံကြားဆိုရင်တောင် စိတ်နေစိတ်ထား အမူအကျင့်က ဘုံဖျားမှာ ဖြစ်သင့်တယ် မဟုတ်လား။ စိတ္တဇပုံပြင်တစ်ပုဒ်ဖတ်ပြီးကတည်းကပဲ ကျွန်တော့် ထင်တစ်လုံးကို မဖြုတ်တော့ဘူး။ သိပြီးသားပုံပြင်ဆိုလည်း ထပ်ပြောပြပါ့မယ်။
စိတ္တဇဆေးရုံမှာပေါ့။ ရောဂါပျောက်သွားတဲ့ သူကို ဆရာဝန်က မေးတယ်။
“ ရောဂါပျောက်သွားတော့ ဘယ်လိုခံစားရသလဲ”
“ ရောဂါပျောက်သွားတော့ ကျွန်တော်ဘာကောင်မှ မဟုတ်တော့ဘူးပေါ့၊ ဟိုတုန်းကဆို ကျွန်တော်က စစ်ဘုရင် နပိုလီယံဗျ” တဲ့။
အဲဒါကြောင့် ကျွန်တော်လည်း ကိုယ့်ကိုယ်ကိုယ် နပိုလီယံဘဝမှာပဲထားတယ်။
တစ်ခုခုလုပ်တယ်၊ အဲဒီကိစ္စအတွက် ကိုယ်မသိဘူးဆိုရင် သိအောင်လုပ်တော့တာပဲ။ မတတ်ဘူးဆိုရင် တတ်အောင်လုပ်တော့တာပဲ။ ကျောင်းသင်ခန်းစာနဲ့ လောကသင်ခန်းစာက ကွာတယ်လေ။ ဆရာလည်း ကွာတယ်။ မသိတဲ့၊ မတတ်တဲ့ကိစ္စကို ကျောသပ်ပြီး သင်ပေးတာ မူလတန်းမှာပဲ ရှိတယ်။ လုပ်ငန်းခွင်က မိတ်ဆွေဆိုတာ ကျောင်းတုန်းက သူငယ်ချင်းလိုမှ မဟုတ်တာ။ ကိုယ်တလွဲလုပ်သမျှကို သူလမ်းမှန် တည့်ပေးသည်ဖြစ်စေ၊ မပေးသည်ဖြစ်စေ နည်းနည်းတော့ အရသာခံသေးတာပဲလေ။ အဲဒီလို အလွဲတွေ အများကြီး ရုပ်တည်ကြီးနဲ့ လုပ်ပြီးနောက်မှာ တစ်ခုခုကို သိသွားတာ။
“ ငါ ဘာကောင်မှ မဟုတ်ဘူး ”
နောက်(၈)လဆို ကျွန်တော် အသက်(၄၀)ပြည့်ပြီ။ ဒါပေမယ့် ကိုယ့်ကိုယ်ကိုယ် နပိုလီယံအဖြစ်ပဲ သိထားလိုက်ပါတယ်။
ရှဥ့်ညိုလေး
(၁၀.၁၀.၂၀၂၀ နေ့လည် ၁း၃၅ မိနစ်)
Comments
Post a Comment