ဘာသာပြန်စာရေးနည်းတွေကို ဘယ်လိုလေ့လာခဲ့သလဲ
တကူးတက ကျွန်မလေ့လာတာမျိုးမရှိခဲ့ဖူးဘူး။ပြောရရင် ရယ်စရာတော့ကောင်းတယ်....
အရင်တုန်းက စာအုပ်တွေစဖတ်ချိန် ကျွန်မဘာသာပြန်စာတွေ မဖတ်ဘူး။ အဲဒီတုန်းက မဂ္ဂဇင်းတွေအဖတ် များတော့ မဂ္ဂဇင်းထဲပါတဲ့ ဘာသာပြန်တွေဆိုတစ်ပုဒ်မှ မဖတ်ဖြစ်ဘူး။ မကြိုက်လို့ မဟုတ်ဘူး.. ကျွန်မ နာမည်တွေ မမှတ်နိုင်လို့။ တချို့ အင်္ဂလိပ်နာမည်အရှည်ကြီးတွေကို ကျွန်မမမှတ်နိုင်ဘူး။
ဇာတ်ကောင်များရင်ပိုဆိုးတယ်.. ရှေ့ကဖတ်တဲ့နာမည်ကို နောက်မှာမေ့သွားပြီး ဘယ်သူက ဘယ်သူဆိုတာ မမှတ်မိတတ်ဘူး။ ဒါကြောင့် ဘာသာပြန်ဆိုရင် မဖတ်ခဲ့ဘူး။ အခု ကျွန်မဘာသာပြန်တဲ့စာတွေကိုဖတ်ရင် သတိထားမိကြမလား မပြောတတ်ဘူး... လူနာမည်တွေ သိပ်မပါဘူး.. မှတ်ရခက်တဲ့ နာမည်ခက်ခက်တွေ မပါဘူး... တရုတ်လိုဖတ်ရတဲ့နာမည်ဆိုရင် တရုတ်အသံထွက်နဲ့ရေးရင် မမှတ်နိုင်မှာစိုးလို့ မြန်မာမှုပြောင်းတဲ့ အခါ တရုတ်နာမည်နဲ့အဓိပ္ပာယ်တူတဲ့ မြန်မာနာမည်ကိုရေးတာမျိုး ကျွန်မလုပ်တယ်။ ကျွန်မလို နာမည်မှတ်ရ ခက်တဲ့လူတွေအတွက် အဆင်ပြေအောင်ပေါ့။
.
အခုလို စာတွေရေးဖြစ်မယ်လို့ ကျွန်မကိုယ်ကျွန်မလည်း မတွေးခဲ့မိဖူးဘူး။ စမ်းကြည့်ချင်တဲ့စိတ်နဲ့ပဲ စာတွေစရေးခဲ့တာဆိုရင် ပိုမှန်မယ်။ တရုတ်စာတွေကို မြန်မစာဖြစ်အောင် စမ်းရေးကြည့်ရာက စဖြစ်ခဲ့တာပါပဲ။ လူတိုင်းမှာ ဖြစ်နိုင်စွမ်း၊ လုပ်နိုင်ခြေစွမ်းရည်တွေရှိကြတယ်။ သွားမစမ်းကြည့်ရင် အဲဒီ စွမ်းရည်တွေက တိမ်မြှုပ်နေတယ်။ စမ်းကြည့်လိုက်မှ အဲဒီအစွမ်းတွေက ထွက်လာတယ်ဆိုသလိုပေါ့။ ကျွန်မလည်း စမ်းကြည့်ခဲ့တာပေါ့။ စစချင်းတော့ ကိုယ်အကျွမ်းဝင်တဲ့အလုပ်မဟုတ်တော့ အခက်အခဲ ရှိတာပါပဲ။ အဓိပ္ပာယ်ကို စိတ်ကသိနေပေမယ့် လက်ကချမရေးတတ်တာမျိုး၊ ပါးစပ်က ထုတ်ဖော်မပြောပြ တတ်တာမျိုးတွေ ဖြစ်တယ်။ စမ်းဖန်များ၊ ကျင့်ဖန်များလာတဲ့အခါ သူ့အလိုလိုဖြစ်သွားတယ်။
.
ဘာသာပြန်စာတွေရေးဖို့ ကိုယ့်မိခင်ဘာသာစကားကိုလည်း ကျွမ်းကျင်ရမှာဖြစ်သလို ကိုယ်ဘာသာပြန်မယ့် ဘာသာစကားကိုလည်း သေချာနားလည်နေမှရတယ်။ မဟုတ်ရင် အဓိပ္ပာယ်လွှဲတာမျိုးတွေ၊ မူရင်းစာရေးသူရဲ့ အာဘော်ကို မခန့်မှန်းမိတာမျိုးတွေ ဖြစ်တတ်တယ်။ ဒီစာတစ်ကြောင်းဟာ မူရင်းရေးသူက ရွဲ့ပြီးရေးလိုက်တာလား၊ ဒီအတိုင်း ရေးလိုက်တာလားဆိုတာ သေချာဖတ်တတ်၊ သိတတ်ရတာပေါ့။ ကျွန်မလည်း အရမ်းတတ်သိတာမျိုးမဟုတ်ဘူး.. မြန်မာဘာသာနဲ့ တခြားဘာသာတစ်ခုကို တတ်တယ်၊ နားလည်တယ်ဆိုပေမယ့် ကျွန်မအတွက် ဘာသာပြန်ရခက်တဲ့စာတွေလည်း ရှိတယ်။ တရုတ်လိုသိပေမယ့် မြန်မာလိုမခေါ်တတ်တာ၊ မူရင်းရေးသူဆိုလိုချင်တဲ့အဓိပ္ပာယ်ကို သိပေမယ့် မြန်မာလို ထိထိမိမိ အဆင်ချောအောင် ပြန်မရေးတတ်မျိုးတွေ ရှိတယ်။ ဒီနေ့ ဘာသာပြန်လို့မရတဲ့စာပိုဒ်ကို နောက်နေ့မှ ထပ်ပြန်တာမျိုးတွေ ကျွန်မလုပ်တယ်။ တစ်နေ့နဲ့တစ်နေ့ စိတ်ခံစားချက်၊ ရတဲ့အတွေးက မတူတတ်တော့ ဒီနေ့မရရင် နောက်နေ့အတွက် ချန်ထားလိုက်တယ်။
.
ဝါသနာပါရင် စမ်းကြည့်ပါ... လွယ်တဲ့စာတွေ၊ ပုံပြင်တွေကနေ စဘာသာပြန်ကြည့်ပါ။ မူရင်းစာရဲ့အဓိပ္ပာယ်ကိုမသိရင် သိတဲ့လူကို မေးပါ။ ကျင့်ဖန်များလာတဲ့အခါ အဆင်ပြေသွားမှာပါ။ ဇွဲရှိဖို့၊ သင်ယူလိုစိတ်ရှိဖို့တော့ လိုပါတယ်။
.
ဒါက ကျွန်မသိသလောက်လေးပါ... အထောက်အကူဖြစ်မယ်လို့ မျှော်လင့်ပါတယ်။
.
Credit:#NineNineSaNay
Comments
Post a Comment