ခင်ဗျားတို့ဖတ်ဖို့ ရေးတဲ့စာ
ခင်ဗျားတို့ဖတ်ဖို့ ရေးတဲ့စာ
ကျွန်တော် အကြောင်းအရာတစ်ခုကို ပုံစံနှစ်မျိုး ရေးခဲ့ဖူးတယ်။ တမင်ရေးတာ မဟုတ်ပါဘူး။ (၂၀၁၅)လောက်တုန်းက ကျွန်တော် ဟိုတယ်ကြီးတစ်ခုမှာ အလုပ်ဝင်နေတာပါ။ အဲဒီအချိန်မှာ ကိုယ့်ကိုယ်ကိုယ် (Update) မြှင့်တဲ့အနေနဲ့ ပြင်ပက သင်တန်းတစ်ခုကို တက်တယ်။ အဲဒီအချိန်မှာ မျက်လုံးလှတဲ့ ကောင်မလေးတစ်ယောက်ကိုတွေ့တယ်။
မျက်လုံးနဲ့ ပတ်သက်တဲ့ စာတစ်ပုဒ်တော့ ရေးဦးမယ်လို့ စိတ်ကူးထားလိုက်တယ်။ အစိုးရဝန်ထမ်း တွေရော၊ ပုဂ္ဂလိက ဝန်ထမ်းတွေရော တက်ကြတဲ့သင်တန်းဆိုတော့ အားလုံးနဲ့ ရင်းရင်းနှီးနှီးပါပဲ။ ဆိုလိုတာက သင်တန်းမှာ အီစကလီတွေ ဘာတွေ မရှိကြဘူးလို့ပဲ ပြောချင်တာပါ။ ကျွန်တော်က သားနှစ်ယောက်ဖခင်၊ ဟိုတယ်မှာ ဝန်ထမ်းလုပ်နေတယ်၊ ဝါသနာအရ စာရေးနေတဲ့ စာရေးဆရာပေါက်စ စသည်ဖြင့် ကျွန်တော့်ကိုယ်ရေးအချက်အလက်ကို အားလုံးနီးပါး သိထားကြတယ်။ သင်းတန်းသား၊ သင်တန်းသူ အားလုံးရဲ့ ကိုယ်ရေးအကျဉ်းကိုလည်း အားလုံးသိကြတယ်။ အားလုံးက အသက်(၃၀)ကျော် (၄၀)ပတ်ချာလည်တွေပဲ။ (၃၀)အောက်တချို့လည်း ပါပါတယ်။
ကောင်မလေး တစ်ယောက် မျက်လုံးလှတယ်ပြောတာနဲ့ ကျွန်တော့်အပေါ် အထင်မလွဲအောင် ဖြေရှင်းရတာနဲ့ လမ်းကြောင်းတောင် နဲနဲချော်သွားတယ်။ အဲဒီအချိန်က ကျွန်တော်မှာ အချိန်တော်တော် နည်းပေမယ့် အကြောင်းအရာတစ်ခုခုကို စာတစ်ပုဒ်ဖန်တီးချင်ရင် အလွယ်တကူပြီးသွားသလောက် ရှိတတ်ပါတယ်။ ဒါပေမယ့် တစ်ဆက်ထဲတော့ ရေးရတာပေါ့။ ညပိုင်းအလုပ်ဝင်ချိန် တိတ်တိတ်ဆိတ်ဆိတ် ဆိုတော့ စာရေးဖို့ အကြောင်းအရာတွေက ဖလပ်ဖလပ်နဲ့ဝင်လာ၊ လူက မအားသေး။ အားပြန်တော့ စာတစ်ပုဒ်ရေးလောက်အောင် အချိန်က မရ။ အဲဒီမှာ တစ်မျက်နှာဝက်လောက်၊ တစ်မျက်နှာလောက် အာရုံရထားတဲ့ စာညွန့်လေး ချရေးထားရတယ်။ ဂျူတီထွက်မှ စတစ်ထဲကူးလာလိုက်တယ်။ အိမ်ပြန် ရောက်ရင် မအိပ်သေးဘဲ ကွန်ပျူတာရှေ့မှာ ကော်ဖီတစ်ခွက်နဲ့ နေ့ခင်း ဆယ့်နှစ်၊ တစ်ချက်ထိ စာရေးလိုက် တယ်။ ပြီးမှ တစ်ရေးအိပ်။ ညနေကျမှ ရေးပြီးသား ပြန်ဖတ်၊ ပရင့်ထုတ်ပေါ့။
ခုနက မျက်လုံးအကြောင်းရေးထားတဲ့စာကလည်း အဲဒီလို ရေးထားတဲ့စာပါပဲ။ သူက အိမ်ပြန်ရောက်တာနဲ့ ဆက်မရေးဖြစ်ခဲ့တဲ့ စာမူတစ်ပုဒ်ပေါ့။ သင်တန်းပြီးလို့ နောက်တစ်လကုန်ကာနီးမှ ဆက်ရေးဖြစ်တဲ့ စာပါ။ ဝတ္ထုတိုအဖြစ်ရေးခဲ့ပါတယ်။ ရေးပြီး သိမ်းထားတယ်၊ ဘယ်မှ မပို့ဖြစ်ပါဘူး။ ခေါင်းစဉ်ကလည်း ရေးနေရင်းနဲ့ ဇာတ်သိမ်းပိုင်းကျမှ ပေးဖြစ်ခဲ့ပါတယ်။
နောက် သုံးလလောက်နေတော့ မင်မိုရီစတစ်ထဲ သိမ်းထားတာလေးတွေ စစ်ရင်းနဲ့ ရေးလက်စ စာပိုဒ်လေး ထပ်တွေ့တယ်။ ခေါင်းစဉ်လဲမတပ်ထားတော့ ရေးထားပြီးသားဆိုတာ သတိမရမိဘူး။ ခေါင်းထဲမှတ်ထားလို့ ရင်းနှီးနေတယ်ပဲထင်တာ။ ကွန်ပျူတာထဲပြန်ကူးပါတယ်။ ပြန်ဖတ်ကြည့်တော့ အက်ဆေးလေးရေးမယ် စိတ်ကူးမိတယ်။ အဲဒီအချိန်မှာ ကျွန်တော်က အက်ဆေးရေးရတာကို တော်တော်သဘောကျနေပါပြီ။ (၂၀၁၃)လောက်ကတည်းက အက်ဆေးကို ပိုကြိုက်လာတာ။ (၂၀၁၅)မှာမှ အားစိုက်ရေးဖြစ်တော့တယ်။ အက်ဆေးအဖြစ်ရေးပြီး သိမ်းထားလိုက်ပါတယ်။ ဘယ်မှ မပို့ဖြစ်ပါဘူး။ နှစ်ပုဒ်စလုံးဟာ (၂၀၁၅) ဇွန်နဲ့ စက်တင်ဘာမှာ ရေးပြီးခဲ့ပါတယ်။
(၂၀၁၇)ရောက်တော့ နှစ်ဦးအဓိဌာန်တွေ ဘာတွေချလို့ (နှစ်ဦးအဓိဌာန်ကတော့ နှစ်တိုင်းလုပ်ပါ တယ်။ ဒီနှစ် စာဘယ်လိုရေးမယ်၊ စာမူတွေ ဘယ်လိုပို့မယ်ဆိုပြီးပေါ့။ ဒါပေမယ့် ဘယ်တော့မှ အကောင်အထည် မဖော်ဖြစ်ပါဘူး…)။ မပို့ရသေးတဲ့ စာမူတွေထဲက ဝတ္ထုတိုတစ်ပုဒ်ကို မဟေသီ မဂ္ဂဇင်း ပို့လိုက်ပါတယ်။ ကွန်ပျူတာစာစီထားတာတောင် (၈)မျက်နှာရှိပါတယ်။ အရင်ကပို့တဲ့ စာမျက်နှာက လေးငါးမျက်နှာပါ။ (၂၀၁၇)ဇွန်လထုတ်မှာ ပါလာပါတယ်။ နောက်တစ်ပုဒ်ကတော့ (၂၀၁၇)ဧပြီလောက် ထင်ပါတယ် ကျောင်းမဂ္ဂဇင်းတစ်ခုကို ပေးလိုက်ပါတယ်။ သူက (၂၀၁၇-၂၀၁၈)ထုတ်ဆိုတော့ (၂၀၁၈)မှာ ပါလာပါတယ်။ စာမူရှင် ဂုဏ်ပြုပွဲက (၂၀၁၉)မှာပါ။ စာမူရှင် ဂုဏ်ပြုပွဲ ဖိတ်စာရပေမယ့် အဲဒီနေ့ကို မေ့နေပါတယ်။ ကျန်တဲ့ဆရာတွေ ဖုန်းဆက်မှ စာမူရှင်ဂုဏ်ပြုပွဲဟာ အဲဒီနေ့လို့ သတိရပါတယ်။ တိုက်ဆိုင်စွာပဲ အလုပ်ကိစ္စနဲ့ တက္ကသိုလ်ဝင်းထဲ ရောက်နေချိန်မို့ ပွဲတက်ဖြစ်လိုက်ပါတယ်။ တခြားစာရေးဆရာတွေက တိုက်ပုံတွေ ဘာတွေနဲ့ စမတ်ကျနေချိန် ကျွန်တော်က တိုက်ပုံမပါ၊ စတစ်မပါနဲ့ ဂွပ်နေပါတယ်။
လက်ဆောင်ရတဲ့ စာအုပ်လေးထဲက ကိုယ့်စာပြန်ဖတ်ကြည့်ရင်း (မဂ္ဂဇင်းမှာ ကျွန်တော့်စာမူပါရင် ကိုယ့်စာမူပဲ အရင်ဖတ်ပါတယ်။ ပြီးမှ ဘယ်သူတွေပါသေးလဲ မာတိကာ ကြည့်ပါတယ်။ နောက်ပြီး သိမ်းထားလိုက်ပါတယ်။ နောက်တစ်ကြိမ် မဂ္ဂဇင်းစာအုပ်ဆွဲ ကိုယ့်စာမူလေးထပ်ဖတ်။ အဲဒီအခါမှ တစ်ခြားသူ စာမူလေးတွေ ဖတ်ပါတယ်။ တွေ့တဲ့အခါ ကောင်းတယ် ဘာညာ ရွှီးရအောင်ပါ။ မဖတ်ရသေးရင် မရွှီးရဲဘူးခင်ဗျ…)။ ဒီအကြောင်းအရာမျိုး ဖတ်ဖူးသလိုလို ဖြစ်နေရော။ ဒါနဲ့ အိမ်ပြန်ရောက်တော့ မဂ္ဂဇင်းတွေ ပြန်ရှာဖတ်ကြည့်တဲ့အခါ ပြီးခဲ့တဲ့နှစ် ဇွန်လမှာ ပါတဲ့ ဝတ္ထုတိုနဲ့ စာပျိုးတူနေတာကိုး။ အဲဒီကျမှ တော်ပါသေးရဲ့ဖြစ်သွားတာ။ တစ်ပုဒ်ထဲကို မဂ္ဂဇင်းနှစ်တိုက် ပို့မိမှာကို အစိုးရိမ်ဆုံးပဲ။ (၂၀၀၈)ကနေ (၂၀၁၃)လောက်ထိတော့ စာမူပို့ရင် စာရင်းစာအုပ်မှတ်ထားတာ။ နောက်တော့ မမှတ်ဖြစ်တော့ဘူး။
အဲဒီအကြောင်းလေး ဟိုတစ်နေ့က မြို့နယ်စာရေးဆရာအသင်း တတိယအကြိမ်မျက်နှာစုံညီ အစည်းအဝေး မစခင် ညီငယ် ရှားမင်းဦး(မင်းကင်း)ရယ်၊ လဝန်းသန့်ရယ်၊ နောက်ပြီး ချင်းတွင်းဂျာနယ်မှာ လက်ထောက်အယ်ဒီတာ လုပ်ခဲ့တဲ့ မစန်းမော်ရယ်ကို ပြောပြဖြစ်သေးတယ်။ ကျွန်တော်က ကိုယ့်အကြောင်းဆို ပြောပြခဲတယ်ရယ်။ အဲဒီနေ့က လူနည်းနည်းစုံလို့။ အခုလည်း မပြောပြချင်ပေမယ့် ခင်ဗျားတို့သိစေချင်လို့ ဝမ်းမြောက်ဝမ်းသာ ရေးလိုက်တာဗျ။ ဖတ်ဖြစ်အောင် ဖတ်ဗျာ။
ဖတ်ဖြစ်အောင် တိုက်တွန်းရတာလည်း ဒီလိုကြောင့်ပါ။ ပေ့ခ်ျမှာ၊ ဘလော့မှာတင်တာဆိုတော့ ခင်ဗျားတို့ ဘီလ်နဲ့ ခင်ဗျားတို့ ဖတ်ရမှာကိုး။ ကျွန်တော့် ဘီလ်ထဲကမှ မဟုတ်ဘူးလေ…။ စတာပါ။ ဖတ်ပြီးသွားရင် ကျွန်တော့်ကို အဖြေတစ်ခုခုတော့ ပေးသွားပါ။ အဲဒီ ဝတ္ထုတိုနဲ့ အက်ဆေးလေးရဲ့ အမည်။ ကျွန်တော့်စာ ဖတ်နေကျဆိုရင် သိမယ်ဗျ။ စာဖတ်များတဲ့ စာချစ်သူ “ စိမ်း” တို့ဆို သိမယ် ထင်တာပဲ။ အဲဒီနှစ်ပုဒ်အမည်ဖော်နိုင်တ့အထဲက ပထမဦးဆုံးသုံးယောက်ကို ကျွန်တော့်ရဲ့ မထွက်သေးတဲ့ အက်ဆေးစာအုပ်လေး လက်ဆောင်ပေးမလို့ပါ။ ဘယ်တော့လဲလို့တော့ မေးရင် ထွက်တဲ့အခါလို့ ဖြေရပါလိမ့်မယ်။ ဘာပဲဖြစ်ဖြစ် ဒီစာဟာ ခင်ဗျားတို့ ဖတ်ဖို့ရေးလိုက်တဲ့စာပါ…။
ရှဥ့်ညိုလေး
(၁၉.၉.၂၀၂၀ နေ့လည် ၁၂း၃၃ မိနစ်)
Comments
Post a Comment