ကျွန်တော့်မှာ အလာ့ဂျစ်ရှိတယ်
ကျွန်တော့်မှာ
အလာ့ဂျစ်ရှိတယ်
စကားချိုပေမယ့် စိတ်တိုတတ်ပါတယ်။ ဟောဟောဒိုင်းဒိုင်းပြောတာနဲ့
ရိုင်းစိုင်းတာက တစ်ကဏ္ဍပါ။ လူသား တစ်ယောက်ရိုင်းစိုင်းပြတာ သရုပ်ဖော်ဇာတ်ကွက်ထဲမှာတော့
အနုပညာမြောက်တာပေါ့။ အပြင်လောကမှာ လာရိုင်းတာတော့ (အော့အော့)။ ကင်မရာကြီးတကားကားနဲ့
သတင်းထောက်ကြီး တစ်ယောက် လက်ပတောင်းအရေးတုန်းက ဟိုပြေးဒီလွှားနဲ့ ပြာယာခတ်နေတာ မြင်ဖူးတယ်။
သူ့အလုပ်သူ တန်ဖိုးထားတာ သိပ်လေးစားစရာကောင်းတာပဲ။ နှမျောဖို့ကောင်းတာက သူ့အလုပ်သူ
တန်ဖိုးထားသလောက် သူတပါး အသက်မွေးမှုအလုပ်ကို မထီမဲ့မြင်လုပ်တာတော့ ရွံဖို့ကောင်းပါတယ်။
ကိုယ့်ထက်(၇)နှစ်လောက်ငယ်တဲ့ ဒါရိုက်တာလေးတစ်ယောက်နဲ့
ခွန်းကြီးခွန်းငယ် အော်ခဲ့ဖူးတယ်။ ဒါရိုက်တာဆိုတာ ရိုက်ကွင်းမှာ ဘုရင်ဆိုပဲ။ မီးထိုး၊
မှန်ထိုးကိုပဲ ဟောက်လို့၊ ငေါက်လို့ ရမှာပါ။ အပြင်လောကမှာတော့ ဘယ်ရမလဲ။ ဟောက်လို့၊
ငေါက်လို့ရတယ်ဆိုရင်လဲ သူ့အသိုင်းအဝိုင်း၊ သူ့ဝန်းကျင်က သူ့လူတွေပဲ ဖြစ်မှာပါ။ သူပညာသင်ပေးရတဲ့
သရုပ်ဆောင်တွေအပေါ်ပဲ ဖြစ်မှာပါ။ အပြင်လောကမှာ ရှိနေကြတဲ့သူတွေက သရုပ်ဆောင်တွေဆိုပေမယ့်
ဒါရိုက်တာက သူမဟုတ်ဘူးလေ။ ဒါရိုက်တာ ကံဇာတ်ဆရာ တင်ပေးတဲ့အတိုင်း၊ သင်ပေးတဲ့အတိုင်း
ကပြသရုပ်ဆောင်နေရတဲ့အထဲမှာ သူလည်း အပါဝင်မဟုတ်လား။
လအနည်းငယ်ခြားပြီး သူထပ်ရောက်လာတယ်။
" မင်းငါ့ကို မှတ်မိလား…"
ကိုယ်ပြုံးပြီး ပြန်ပြောလိုက်တယ်။
" မှတ်မိပါတယ်…"လို့။
ဒီတစ်ခါတော့ သူ့ကဒ်ကို ထုတ်ပေးတယ်။
ကိုယ်လိုချင်တာလည်း ဒါပါပဲ။ ကိုယ်ဖတ်ကြည့်လိုက်တော့ ရုပ်သံတစ်ခုရဲ့ အယ်ဒီတာပါ။ သူတို့တတွေက
ဆယ်လီတွေ ဖြစ်ချင်ဖြစ်မယ်။ ဟိုတယ်တည်းတဲ့အခါမှာတော့ အထိမ်းအမှတ်ကဒ်လေး တစ်ခုခုတော့
လိုပါတယ်။ (Regist:) လုပ်ပြီးတဲ့အခါ ကျွန်တော်တို့ ချက်ခြင်းပြန်ပေးပါတယ်။ တချို့တွေက
လူကိုယ်တိုင်ရှေ့မှာရောက်နေတာ ကဒ်လိုသေးလို့လားတဲ့။ ကျွန်တော်သိချင်တာက တခြားပြည်ပနိုင်ငံတစ်ခုခုမှာ
သူအဲလိုပြောဖူးသလား။ ဒါမှမဟုတ် ပြောခဲ့ရဲ့လားဆိုတာကိုပါ။ (Mind Set) တွေကို ချိန်းဖို့လိုပြီ၊
ပြောင်းလဲချိန်တန်ပြီလို့ တော်တော်များများ အော်ခဲ့ကြတာပဲ။ (VIP) ဖြစ်ချင်နေတုန်းပဲ၊
(VIP) အခွင့်အရေး လိုချင်တုန်းပဲ။
ကျွန်တော်ကိုယ်တိုင်ကလည်း ပြောင်းလဲဖို့
လိုပါသေးတယ်။ မိသားစုအတွက် ပိုက်ဆံရှာတာ၊ အမှန်တရားရှာတာ မဟုတ်ဘူးလို့ စိတ်ထဲက သိထားပေမယ့်
ဝန်ထမ်းတွေရဲ့ လုပ်အားခနဲ့ (Complimentary) တည်းနေတဲ့ (VIP) တွေက ကိုယ့်ဝန်ထမ်းတွေကို
မောက်မောက်မာမာ ဆက်ဆံတာမြင်တိုင်း အချဉ်ပေါက်တဲ့စိတ်က ရင်ထဲကတစ်ဆင့် လေချဉ်တက်တယ်။
ပြည်သူချစ်တဲ့ဆယ်လီတွေ ကိုယ့်ဝန်ထမ်းတွေကို ပရိတ်သတ်လို့မမြင်နိုင်ဘဲ မတူမတန်ဆက်ဆံပုံမြင်တိုင်း
ရင်ခံတယ်။ (ဝန်ထမ်းတိုင်းက ဆယ်လီမြင်တိုင်း ဓာတ်ပုံတွဲရိုက်၊ အော်တိုရေးခိုင်းမယ်ထင်တဲ့
အမြင်လေးလည်း ပြောင်းသင့်ပါတယ်။) ကျွန်တော်ကတော့ တယူသန်စွာနဲ့ ဆယ်လီတွေကို ကဒ်တစ်ခုခု
တောင်းမြဲပါ။ ဒါ့ကြောင့် ညီအစ်မတတွေရှိတဲ့ နှုတ်ခမ်းထော်ထော်နဲ့ အဆိုတော်မလေး မကြည်တာကို
သိတယ်။ ရာထူးကြီးကြီးတစ်ယောက်ကို ယောက္ခမတော်ထားတဲ့ တစ်ချိန်က မော်ဒယ်(ယခု အယ်အယ်)နဲ့
ကွိုင်တက်ဖူးတယ်။ သူကတော့ ပေးနိုင်တာထက် ပိုလိုချင်လို့ပါ။ သတင်းထောက်တစ်ယောက်နဲ့ ငြိဖူးတယ်။
နိုင်ငံရေးကလိတတ်တဲ့ စားသောက်ဆိုင်ရှင်တစ်ယောက်ကိုလည်း ကဒ်တောင်းတဲ့ကိစ္စနဲ့ သိသိမှတ်မှတ်ဖြစ်ဖူးတယ်။
တကယ်တော့ ကျွန်တော့်အားနည်းချက်တွေပါ။ အဆင်ပြေဖို့ လိုရင်းဆိုတာ သိပေမယ့် ပြောင်းလဲမယ်ဆိုပြီး
အခွင့်အရေးယူချင်နေသူတွေကို အလာ့ဂျစ်ဖြစ်နေတာပါ။ တကယ်တော့ ကျွန်တော်မကောင်းတာပါ…။ ဘာလို့လဲဆို
ကျွန်တော်က ဝန်ထမ်း မဟုတ်လား…။ ကျွန်တော့်မှာ ဖြစ်နေတဲ့ အလာ့ဂျစ်ကလည်း မပျောက်နိုင်သေးသရွေ့တော့…။
ချစ်ခြင်းများဖြင့်
သင့်ရဲ့
ရှဥ့်ညိုလေး
https://shintnyolay.blogspot.com
Comments
Post a Comment