အ-အ အိပ်မက်

အ-အ အိပ်မက်

        ကျွန်တော်တို့အားလုံး ထာဝရ မအိပ်စက်ခင်ကြားမှာ ခဏခဏ အိပ်စက်ခဲ့ကြတယ်။ အိပ်စက်ချိန်တွေ၊ အိပ်ပျော်ချိန်တွေ မတူကြပေမယ့် အိပ်စက်ကြတဲ့အခါတိုင်း တချို့တွေက နှစ်နှစ်ခြိုက်ခြိုက်အိပ်ပျော်လို့၊ တချို့တွေကတော့ ကြက်အိပ် ကြက်နိုးနဲ့ ခဏခဏလန့်နိုးလို့။ တချို့တွေကတော့ အိပ်စက်ဖို့အတွက် အိပ်ဆေးဆိုတာတွေနဲ့ မိတ်ဖွဲ့လို့။

          အိပ်ဖူးသူတိုင်း၊ အိပ်ကြသူတိုင်း အိပ်မပျော်ခင်စပ်ကြား အိပ်တစ်ဝက်၊ နိုးတစ်ဝက်နဲ့ အိပ်မက်မက်ဖူးသူတွေ များပါလိမ့်မယ်။ အဲဒီအထဲမှာလည်း ကျွန်တော်ပါတယ်။ တချို့အိပ်မက်တွေက ပျော်စရာကောင်းတယ်။ တချို့အိပ်မက်တွေက လှိုက်လှိုက်၊ လှိုက်လှိုက်နဲ့ ဝမ်းနည်းဖို့ သိပ်ကောင်းတယ်။ အိပ်ယာနိုးလို့ ပြန်တွေးကြည့်မိရင်တောင် တကယ်မဟုတ်မှန်းသိရက်နဲ့ စိတ်ထဲမှာ နင့်နင့်နဲနဲ။ တချို့အိပ်မက်တွေက အိပ်မက်နေချိန်မှာ ပျော်ဖို့သိပ်ကောင်းတယ်၊ ဝမ်းနည်းဖို့သိပ်ကောင်းတယ်။ နိုးလာတော့ အဖြစ်အပျက်ကို မမှတ်မိတောင် ပျော်နေတတ်သေးတယ်။ ဝမ်းနည်းစရာဆိုလည်း ဝမ်းနည်းလို့ပေါ့။

          တချို့အကြောင်းအရာတွေကိုတော့ ပြန်မှတ်မိပေမယ့် တခြားတစ်ယောက်ပြောပြဖို့ရာကျ ဘယ်က စပြောရမှန်းမသိ ဖြစ်နေတတ်ပြန်ရော။ အ-အ အိပ်မက် မက်သလိုပေါ့။ မအ-ပေမယ့် ဘယ်လိုပြောရမှန်း မသိတဲ့ အိပ်မက်တွေ၊ အဖြစ်အပျက်တွေ ကျွန်တော့်ဆီမှာရှိတယ်။ ဆိုပါတော့ လေရူးသုန်သုန်ဖတ်ပြီး စိတ်ထဲမှာ တမျိုးကြီး ခံစားခဲ့ရဖူးတယ်။ (၁၈)နှစ်သားဆိုတော့ စာကြီးပေကြီးလည်း သိပ်မဖတ်ဖူးတော့ တစ်ခုခုခံစားရပေမယ့် ပြန်မပြောတတ်ခဲ့ဖူး။ စကားလက်အိုဟာရာရဲ့ အားတင်းစကားလေးတော့ နားထဲစွဲတာပေါ့။ နောက်ပြီး ဆရာမ ဂျူးရဲ့ ကံကြမ္မာကို မယုံကြသူများနဲ့ ပင်လယ်နဲ့တူသော မိန်းမများ။ ကြိုက်တော့ကြိုက်တယ်၊ ဘာကိုကြိုက်တာလဲဆိုရင် ပြောမပြတတ်တော့ဘူး။ ဟုတ်ကဲ့… အခုလည်း ကျွန်တော့်ရဲ့ အ-အ အိပ်မက်လေးကို ပြောပြချင်ပါတယ်။ ဆရာမ ပြည့်ပြည့်ကို လှမ်းမေးချင်ပေမယ့် အလုပ်အား၊ မအား မသိတာရယ်၊ အ-အ အိပ်မက်ဆိုတော့ ဗူးလုံးနားထွေးဖြစ်နေမှာပဲဆိုပြီး မမေးဖြစ်တော့တာပါ။ ဒီဇာတ်လမ်းလေးကို ကြိုက်တယ်။ ဘာ့ကြောင့် ကြိုက်မှန်း၊ ဘယ်အချက်ကြောင့် ကြိုက်မှန်း မသိတာပါ။ ဒါ့ကြောင့် စိတ်ပြေလက်ပျောက်ဆိုပြီး ဇာတ်လမ်းလေးပြီးတာနဲ့ ချရေးလိုက်တာ။ ဆရာမ ပြည့်ပြည့်တို့၊ ဆရာရဲတို့၊ ဆရာစက်တို့ဆိုရင်တော့ ဇာတ်လမ်းကြည့်လိုက်တာနဲ့ ဘာ့ကြောင့်၊ ဘယ်လိုကြောင့်ဆိုပြီး တန်းသိမှာပါ။ ကျွန်တော်ကစာမကျေခဲ့သူဆိုတော့ အိမ်စာမလုပ်ခဲ့တာ များတယ်မဟုတ်လား။

ဒီနေ့ နေ့လည် (၂း၃၀)မှာ (Sky net) (World Movie) က လွှင့်တဲ့ (The Words) ဇာတ်ကားကို ကြည့်ရတယ်။ လွန်ခဲ့တဲ့ သုံးလေးလကလည်း တစ်ပိုင်းတစ်စ ကြည့်ခဲ့ဖူးတယ်။ ခုလည်း တစ်ပိုင်းတစ်စပဲ။ ဇာတ်လမ်းက လူတစ်ယောက်ရေးထားတဲ့ ဝတ္ထုတစ်ပုဒ်ကို တစ်ယောက်က ကောက်ရတယ်။ သူက သူ့နာမည်တပ်ပြီး ထုတ်လိုက်တယ်။ ကောက်ရတဲ့ စာမူက ဝါကြန့်နေပြီး နှစ်မနည်းတော့ဘူးဆိုတာ သိသာနေလို့ပဲ။ အဲဒီဝတ္တုနဲ့ သူနာမည်ကြီးသွားတယ်။ ကျွန်တော် စကြည့်ရတဲ့နေရာက တကယ်စာရေးခဲ့တဲ့ အဖိုးကြီးနဲ့ နာမည်တပ်ထုတ်လိုက်တဲ့ စာရေးဆရာ အမည်ခံ စာရေးဆရာလေးနဲ့ ခုံတန်းလေးပေါ်မှာ စကားပြောနေတဲ့ အခန်းပဲ။

          အဘိုးကြီးက ဝတ္ထုထဲက ဇာတ်လမ်းနဲ့ သူ့နောက်ခံဇာတ်လမ်း အဖြစ်အပျက်ကို ပြောပြတယ်။ စာရေးဆရာဖြစ်ဖို့ ကြိုးစားဖူးတဲ့ အဖိုးကြီးက စာရေးဆရာ မဖြစ်ခဲ့ဘူး။ တကယ်စာမရေးတဲ့ လူငယ်လေးက သူများရေးထားတဲ့ စာမူလေး ခိုးချပြီး နောက်မှ သူရေးတဲ့ စာမူတွေထုတ်တယ်။ သူက ရေစီးအတိုင်း မျောလာတဲ့ စာရေးဆရာလေး ဖြစ်နေတယ်။

          နောက်တော့ လူငယ်စာရေးဆရာလေး ရှက်သွားတယ်။ အရက်တွေအမူးသောက်ပြီး သူ့အမျိုးသမီးဆီမှာ ဝန်ခံတယ်။ ရှော့ခ်ရသွားတဲ့ သူ့အမျိုးသမီးက အိမ်ကနေထွက်သွားတယ်။ သူက သူ့ရဲ့ စာအုပ်ထုတ်ဝေသူဆီသွားပြီး အဖြစ်အပျက်ကို ပြောပြတယ်။ ထုတ်ဝေသူကလည်း သူကိုယ်တိုင် အရှုပ်ထုပ်ထဲပါနေမှန်းသိသွားတော့ စာမူခိုးချတဲ့အဖြစ်အပျက်က မထူးဆန်းပါဘူး၊ မင်းပေးချင် မူရင်းစာရေးသူ အဖိုးကြီးကို ကားပေးပေး၊ ဘာပေးပေး ကြိုက်တာထောက်ပံ့လို့ရတယ်၊ စာမူကိစ္စကိုတော့ ဒီအတိုင်းဆက်ထားလိုက်ပါလို့ အကြံပေးတယ်။

          ဒါနဲ့ လူငယ်စာရေးဆရာလေး တကယ်ဝတ္ထုရေးခဲ့တဲ့ အဖိုးကြီး အလုပ်လုပ်နေတဲ့ ပျိုးပင်ဆိုင်ကိုရောက်သွားတယ်။ အဖိုးကြီးက လူငယ်စာရေးဆရာလေးပေးတဲ့ ပိုက်ဆံကို မယူဘူး။ ပျိုးပင်တစ်ပင်ကိုပဲ ဝယ်သွားလို့ခိုင်းတယ်။ နောက်ပြီး ဝတ္ထုပြင်ပက ကျန်နေတဲ့ အဖြစ်အပျက်တချို့ကို ပြောပြတယ်။

          လူငယ်စာရေးဆရာလေးက မေးတယ်။ သူပေးတဲ့ငွေကိုလည်း မယူဘူး၊ တကယ်ရေးတဲ့ သူကိုလည်း မဖော်ထုတ်စေချင်ဘူးဆိုတော့ သူ့ကိုစိတ်ဒုက္ခပေးချင်ရုံသက်သက်လားလို့ မေးတယ်။ အဖိုးကြီးပြန်ပြောတဲ့ အဓိပ္ပါယ်က သူ့အမျိုးသမီးကို ချစ်တယ်၊ သူချစ်တဲ့အမျိုးသမီးထက်ကို စကားလုံးတွေကိုချစ်တယ်။ အဲဒါကြောင့် သူရေးထားခဲ့တဲ့ဝတ္ထု(စကားလုံး)တွေရဲ့အစွမ်းနဲ့ အောင်မြင်မှုကိုရနေတဲ့ စာရေးဆရာလေးဟာ စကားလုံးတွေရဲ့ဝေဒနာ(ပျော်ရွှင်မှု၊ ဝမ်းနည်းမှု) ကိုလည်း လက်ခံရလိမ့်မယ်တဲ့။ နောက်ပြီး  အဖိုးကြီးပြောသွားတာ တစ်ခုရှိသေးတယ်။ ရေးထားတဲ့ ဝတ္ထုကို ပိုင်သွားတာနဲ့ တကယ်ကြုံခဲ့ရတဲ့ သူ့အတွေ့အကြုံအသိအမြင်ကို ပိုင်ဆိုင်သွားပြီလို့ မထင်နဲ့တဲ့။ ပိုင်ဆိုင်သွားချင်လို့လည်း မရဘူးလို့ ပြောသွားတယ်။ နောက်တော့ စာရေးဆရာလေးနဲ့တွေ့ပြီး မကြာခင်မှာပဲ အဖိုးကြီးသေသွားတယ်။ သူပြောချင်တဲ့အရာတွေ၊ သူဖြစ်ချင်တာတွေ၊ လျှို့ဝှက်ချက်တွေ အကုန်လုံး သူနဲ့အတူပါသွားတယ်။

          ဒီအဖြစ်ပျက်အားလုံးကို စာရေးဆရာကြီးတစ်ယောက်က သူနောက်ထပ်ထုတ်မယ့် စာအုပ်အဖြစ် စာအုပ်မိတ်ဆက်ပွဲမှာ ပြောရင်းကြော်ငြာသွားတယ်။ ဒီဇာတ်လမ်းကို စိတ်ဝင်စားလွန်းတဲ့ ကောင်မလေးတစ်ယောက်က စာရေးဆရာကြီး အိမ်ကိုအလည်လိုက်သွားတယ်။ ဝိုင်သောက်ရင်း ဇာတ်လမ်းထဲက အဖြစ်အပျက်နဲ့ ဇာတ်သိမ်းပိုင်းကို ပြောနေကြရင်း အဆုံးသတ်သွားတယ်။ ဇာတ်လမ်းပြောပြနေတဲ့ စာရေးဆရာကြီးက ဟိုးတစ်ချိန်က စာမူခိုးချခဲ့တဲ့ လူငယ်စာရေးဆရာလေးပါ။ တကယ်တော့ သူ့အိမ်အထိလိုက်ပြီး ဇာတ်လမ်းကို စိတ်ဝင်တစားမေးနေတဲ့ ကောင်မလေးက…။

                                                                                      ချစ်ခြင်းများဖြင့်

                                                                                                            သင့်ရဲ့

                                                                                                                                                                                                                   ရှဥ့်ညိုလေး

https://shintnyolay.weebly.com