နားလည်ပါ
နားလည်ပါ
မနေ့က ကျွန်တော့်မွေးနေ့ပါ။ ဝန်ထမ်းအင်အားကြောင့်
ခွင့်ယူလို့မရတဲ့အခြေအနေပေါ့။ ညဂျူတီထွက်မို့ မအိပ်ရသေးပေမယ့် အများသူငါရဲ့ အချိန်ဇယားအတိုင်း
လည်ပတ်ခဲ့ပါတယ်။ နာရီဝက်လောက်မောင်းမှ ရောက်မယ့် ညီမငယ်တစ်ဦးရဲ့မင်္ဂလာပွဲကို တက်ရောက်ချီးမြှင့်ခဲ့ပါတယ်။
ကျွန်တော့်အပေါ်မှာ အမြင်ကောင်းနဲ့ အကောင်းမြင်ခဲ့တဲ့ ညီမငယ်တစ်ယောက်မို့လည်း အရောက်သွားခဲ့တာပါ။
အိမ်ကို ပြန်ရောက်တော့ (၁၀း၄၅)။
ကိုယ့်ကိုတွေ့ချင်လို့ ခွင့်သုံးရက်လောက်ယူပြီး
မန္တလေးကနေ အလည်ရောက်နေတဲ့ ညီငယ်တစ်ယောက်ကို ဖုန်းဆက်ပြီး ဗောဓိတစ်ထောင်ကို လိုက်ပို့လိုက်တယ်။
နောက် ရာမညမှာ ထမင်းစားတော့ ဟိုတယ်ကြီးတစ်ခုရဲ့ စာဖိုမှူးကြီးဟာ အံကြိတ်ပြီးတော့ စားပါတယ်။
စားရင်းတန်းလန်း အများသူငါထုံးစံ ထမင်းပွဲကြီး ဓာတ်ပုံရိုက်ပြီး အွန်လိုင်းတင်ဖို့
လုပ်ပြန်ရော။ တကယ်တော့ ထမင်းတွေ၊ ဟင်းတွေဆိုတာ အပြင်မှာအနံ့အရသာနဲ့ အရောင်အဆင်းကြောင့်
စားကောင်းသောက်ဖွယ်အဖြစ် မြင်နေရပေမယ့် အွန်လိုင်းပေါ်မှာတော့ မည်းသည်းနေတဲ့ ဟင်းပွဲတွေအဖြစ်မြင်ရမှာပါ။
ခင်ဗျားတို့လည်း မြင်ဖူးမှာပါ။ ဟိုတယ်ကြီးတွေ၊ စားသောက်ဆိုင်ကြီးတွေမှာထိုင်ရင်း စားကြပါဦးလား၊
ဘာညာနဲ့ တင်တဲ့ပုံတွေ မြင်ဖူးမှာပါ။ တကယ်လည်း စားလို့ရတာ မဟုတ်ဘဲနဲ့လေ။ ရွံစရာ ကောင်းလိုက်တာ။
သူတို့လုပ်ရပ် ပြောတာမဟုတ်ပါဘူး။ မည်းသည်းနေတဲ့ ဟင်းပွဲတွေမြင်ရတာကိုပါ။
ခုလည်း စားဖိုမှူးကြီးက… စားဖိုမှူးကြီးလို့ ခေါ်ရတာ
ခက်တယ်နော်။ လွယ်အောင်လို့ ငတိလို့ပဲပြောတော့မယ်။ အဲဒီ ငတိက စားရင်းသောက်ရင်း ဓာတ်ပုံတဖြတ်ဖြတ်လုပ်လို့။
ကျွန်တော် သူ့ကိုကြည့်ရင်း သနားလာတယ်။ ငတိလေးကတော့ စားရင်း၊ စကားပြောရင်း၊ လူတိုင်းလက်ထဲရှိနေတတ်တဲ့
ဝရဇိန်လေးပွတ်ရင်းပေါ့။ (သူ့ကိုကြည့်ပြီး သနားနေတာ သူမသိဘူး။ အကြောင်းက ထင်ထားသလို
ကျွန်တော် ခင်ဖို့ မကောင်းတာ သူမသိဘူး။ ထင်ထားသလောက် ကျွန်တော် မကောင်းတာ သူမသိဘူး။
ကျွန်တော်က ထမင်းသိုး၊ ဟင်းသိုး မဟုတ်ပေမယ့် ထမင်းချိုးပါ။ များများစားဖို့ မကောင်းသလို
ကြာရှည်စားရင်လည်း ကင်ဆာဖြစ်စေမယ့် အရာပါ။) ကျွန်တော် အိမ်ပြန်ရောက်တော့ နာရီကြည့်လိုက်တယ်။
(၂း၃၅) ။
မိုးလင်းကတည်းက မိသားစုနဲ့နေခွင့်ရတဲ့ အချိန်တစ်ခုရဲ့အစပေါ့။
တရေးမှ မအိပ်ရသေးလို့ မျက်လုံးတွေကလည်း ဖန်စပ်နေပါပြီ။ ကျွန်တော်အိပ်ခွင့်မရသေးဘူး။
အများသူငါနဲ့ လိုက်လျောညီထွေနေခဲ့ရတဲ့ ကျွန်တော် ပင်ပန်းနေပါပြီ။ ဒါပေမယ့် နားခွင့်မရသေးဘူး။
ည(၉း၃၀)မှာ ကျွန်တော် ဂျူတီဝင်ရဦးမယ်။ အဲဒီအတွက် ကျွန်တော် အိပ်ရဦးမယ်။ ကျွန်တော်အလေးထားတဲ့
မိသားစုအတွက် အချိန်ပေးရဦးမယ်။ ဒီလိုနဲ့ အိပ်ချိန်ထဲကလျော့လို့ မိသားစုနဲ့နေခဲ့ပါတယ်။
ကျွန်တော့်ကို ပြေးကြိုတဲ့ သားငယ်ကို တက်ကြွဟန်အပြည့်နဲ့ ပွေ့ချီလိုက်တယ်။ သားတို့နဲ့ဆော့ပေးဖို့ကြိုးစားရင်း
အပြုံးတစ်ခုကို မျက်နှာထက်မှာဆွဲရင်း ချစ်ဇနီးကိုလည်း ပြခဲ့လိုက်တယ်။ ကျွန်တော် မှုန်မှိုင်းနေရင်၊
ခက်ထန်နေရင် သူစိတ်ဆင်းရဲမယ်ဆိုတဲ့အသိတစ်ခုက မွေးရာပါအသိဥာဏ်တစ်ခုလို စွဲမြဲနေတာလည်း
တစ်ကြောင်းပေါ့။ နောက်ပြီး ကျွန်တော်တို့နှစ်ယောက် မျက်နှာချင်းဆိုင်ထိုင်နိုင်တဲ့အခွင့်အရေး၊
အချိန်အခါကလည်း သိပ်ကိုနည်းပါးလွန်းတယ် မဟုတ်လား။
သူမနဲ့ ကျွန်တော်နဲ့က ပြတင်းတံခါးတစ်ချပ်လောက်တောင်
ဆုံနိုင်ခွင့် မရှိခဲ့တာပါ။ နေ့မှာဖွင့်ထားရင် ညမှာ ပြန်ပိတ်မှ ဆုံခွင့်ရှိတဲ့ တံခါးမဟုတ်ခဲ့ဘူး။
ချွင်းချက်နဲ့ တံခါးဖြစ်တယ်။ တစ်ဖက်က ပိတ်ထားရင် ကျန်တစ်ဖက်က ဖွင့်ထားရတာမျိုးပါ။ အဲဒီတော့
ဆုံနိုင်ခွင့် သိပ်ကိုနည်းတဲ့ တံခါးတစ်ချပ်ဖြစ်တယ်။ ကျွန်တော့် နားရက်လေးမှ မျက်နှာချင်းဆိုင်လို့
စကားပြောခွင့်ရသူပါ။ အဲဒါကြောင့် ကျွန်တော် ဆုံးဖြတ်လိုက်တယ်။ အားနာမှုနဲ့ဆွဲနေတဲ့ပန်းချီကားကို
ရိုးသားစွာနဲ့ပဲ ဆေးရောင်ချယ်တော့မယ်။ မျဉ်းတွေက အဖြောင့်တွေချည်းပဲဆိုရင်တောင် ရိုးသားမှု
ရာနှုန်းပြည့်ပါပါတယ်။ ခင်ဗျားမှာလည်း ဘဝရှိတယ်။ ကျွန်တော့်မှာလည်း ရှိတယ်။ ခင်ဗျားဝန်းကျင်မှာ
ခင်ဗျားတန်ဖိုးထားတဲ့အရာတွေရှိတယ်။ ကျွန်တော်တန်ဖိုးထားတာ မိသားစု ဖြစ်တယ်။ မိသားစုဟာ
ကျွန်တော့် သင်္ကေတဖြစ်တယ်။
ကျွန်တော် တောင်းပန်ချင်တယ်။ ဒါမှမဟုတ်
ပြောထားချင်ပါတယ်။ ကျွန်တော်က အတ္တကြီးသူမို့ လုပ်ချင်တာတွေ၊ လုပ်ရမှာတွေနဲ့စာရင် အချိန်နည်းလွန်းပါတယ်။
ခင်ဗျားကို အချိန်မပေးနိုင်လို့ ဆိုပြီး စိတ်မဆိုးဖို့ လိုပါတယ်။ ကျွန်တော်ရဲ့ ခပ်သေးသေး
နှလုံးသားထဲမှာ ခင်ဗျားရှိပါတယ်။ မတွေ့တာနှစ်ချီကြာနေတဲ့ သူငယ်ချင်းတချို့ ကျွန်တော့်မြို့လေးရောက်တဲ့အခါ
သွားမတွေ့နိုင်တဲ့ အချိန်တွေရှိတယ်။ မိုင်ရာချီဝေးတဲ့အရပ်ကနေ ပြန်လာတဲ့ သူငယ်ချင်းမိတ်ဆွေတချို့ကို
ဖုန်းလေးပဲဆက်နိုင်တဲ့ အချိန်တချို့လည်း ကျွန်တော့်မှာရှိတယ်။ ကျွန်တော်ဟာ အရောင်ရင့်လာတာလည်း
ဖြစ်နိုင်တယ်။ ဒါမှမဟုတ်…။
ကျွန်တော့်လက်ရှိဘဝက ဇီးကွက်တစ်ကောင်လို
ကျင့်သုံးနေရသူမို့ နေ့ခင်းမှာ အိပ်ချိန်ပြန်ဖဲ့ယူရပါတယ်။ ကျွန်တော့်မှာ ဖတ်ချင်တဲ့စာတွေ
ရှိတယ်။ ဖတ်ရမယ့် စာတွေရှိတယ်။ ရေးချင်တဲ့ စာတွေရှိတယ်။ ရေးရမယ့် စာတွေရှိတယ်။ ပေ့ခ်ျမှာ
တင်ချင်တဲ့ စာတွေရှိတယ်။ ဘလော့မှာ တင်ရမယ့် စာတွေရှိတယ်။ မိသားစုနဲ့ နေပေးရမယ့် အချိန်တွေရှိတယ်။
တချို့သူတွေနဲ့ အဆက်အသွယ် မပြတ်တောက်ဖို့ တစ်ခါတစ်ရံ ဖုန်းဆက်တယ်။ အွန်လိုင်းမှာ သူတို့တတွေရဲ့
လှုပ်ရှားနေတဲ့ဘဝလေးတွေ ကြည့်တယ်။ ကျွန်တော်ဟာ ဆယ်လီတစ်ယောက် မဟုတ်ဘူး။ သာမန်ထဲက သာမန်လေးပါ။
ပရဟိတ သမားတစ်ယောက်လည်း မဟုတ်ဘူး။ အဲဒါကြောင့်
သူတောင်းစားတစ်ယောက်ကို ပိုက်ဆံထည့်နေတဲ့ဓာတ်ပုံ ခင်ဗျား မြင်ဖူးမှာ မဟုတ်ဘူး။ နောက်လည်း
မြင်ဖို့ မရှိဘူး။ သစ်ကိုင်းထက်မှာ လူမသိ သူမသိ ရှိနေတဲ့ ရှဥ့်တစ်ကောင်ပါ။ အများနဲ့
ရောရောနှောနှောနေရတာကို မနှစ်သက်တဲ့၊ ဟန်ဆောင်ပြီး ပြုံး၊ မရယ်ရတဲ့ဟာသတွေ ရယ်မောပြရတာကို
မုန်းတဲ့ရှဥ့်တစ်ကောင်ပါ။ အဲဒါကြောင့် နားလည်ပါ။ ခင်ဗျားလာတိုင်း ထွက်မတွေ့နိုင်တာကို။
နားလည်ပေးပါ။ ဆက်တဲ့ဖုန်းတိုင်း ကိုင်မပေးနိုင်တာ။ နားလည်လိုက်ပါ။ မက်ဆေ့ခ်ျဘောက်ကနေ
ဟိုင်းတိုင်း ပြန် မဟိုင်းနိုင်တာ။ နားလည်စမ်းပါ။ တဂ်တွဲတိုင်း တိုင်းမ်လိုင်း မှာ
မဖော်ပြနိုင်တာ။
ဧည့်သည်ကို
ကြာကြာ ဧည့်မခံနိုင်တာ။ လက်ဖက်ရည်ဆိုင်မှာ ကြာကြာ မထိုင်နိုင်တာ။ နားခွင့်ရတဲ့ အားလပ်ချိန်လေး
အလည်မလာစေချင်တာ။ နားလည်ပါ…။ နားလည်ပါ…။ နားလည်ပါ…။
(PS:
ဇွန်လ(၉)ရက် (၂၀၁၆)မှာ ခံစားမိတဲ့ ဖီလင်လေးတစ်ခုပါ။ အဲဒီတုန်းက ကျွန်တော်က ဇီးကွက်တစ်ကောင်အဖြစ်နဲ့
ညမှာ ငုတ်တုတ်ထိုင်နေရသူပေါ့။ ခုတော့ ကျွန်တော်ဘဝပြောင်းသွားပါပြီ။ လူဟာ လူလို နေခွင့်ရသွားပြီ။
လူလိုအိပ်ခွင့် ရသွားပြီ။ မနက်ခင်းမှာ ကျင်းပတတ်တဲ့ လူတွေရဲ့ ပွဲတချို့ကို လူလိုသူလို
ပွဲတက်နိုင်ပါပြီ။ ခုနေခါတော့ ပြောပြချင်တာလေး ရှိတယ်။ နားလည်ပါ…)
ချစ်ခြင်းများဖြင့်
သင့်ရဲ့
ရှဥ့်ညိုလေး
https://shintnyolay.blogspot.com
Comments
Post a Comment