ရောက်တတ်ရာရာ ရေးတဲ့စာ

 

ရောက်တတ်ရာရာ ရေးတဲ့စာ

 

ကျွန်တော် (၁၉၉၅)မှာ (Karate) စသင်တယ်။ တစ်ပတ်မှာ (၃)ရက်။ ဝင်ကြေးက (၅၀)ကျပ်၊ လစဉ်ကြေးက (၅၀)ကျပ်။ ဝင်ကြေး (၅၀၀)၊ လစဉ်ကြေး (၅၀၀)ဖြစ်သွားတဲ့အချိန်ကျတော့ ကျွန်တော် ခါးစည်းအနက် ဖြစ်သွားပြီ။ (၂၀၀၁)မှာပေါ့။ ပြောချင်တာက ဒီသင်တန်းတက်တာကို ကျွန်တော် စိတ်မဝင်စားခဲ့ဘူး။ သူငယ်ချင်းတစ်ယောက်က သူတော့ သင်တန်းအပ်ခဲ့ပြီ၊ ကရာတေးသမားကြီးဖြစ်တော့မယ် ဆိုပြီး စိတ်ထဲမှာ ပျော်လိုက်တာလို့ ကျွန်တော့်ကိုလာပြောတယ်။ သည့်အရင်ကတည်းက ဖေဖေက သင်တန်းတက်ခိုင်းပေမယ့် စိတ်မဝင်စားခဲ့ဘူး။ ရန်ဖြစ်စားမှာမှတ်လို့ ဆိုပြီး ရှောင်ခဲ့တယ်။ အဲဒီသူငယ်ချင်းက ကျွန်တော့်ကို တအားခင်တာ။ ဒါပေမယ့် သင်တန်းတက်တဲ့ကိစ္စက ကြွားတယ်ထင်တာနဲ့ နောက်တစ်ရက် သင်တန်း သွားအပ်လိုက်တယ်။ ဝတ်စုံပါ အပ်လိုက်တယ်။ တစ်စုံကို (၆၀၀)ပေါ့။ အဲဒီတုန်းက ကိုယ်တွေက (၇)တန်းဖြေပြီးစလေ။ ကျွန်တော် သင်တန်းတက်ပြီး ခါးစည်နက်ရောက်တဲ့အထိ အဲဒီသူငယ်ချင်း သင်တန်းတစ်ရက်မှ မတက်ဖြစ်ခဲ့ဘူး။ ခုတော့ တန့်ဆည်မှာ ဆက်သွယ်ရေးဌာနမှ အကြီးဆုံးဖြစ်နေတယ်လို့ သူငယ်ချင်းတစ်ယောက်က ဆက်စပ်မိပြီး ပြောပြတယ်။

ကျွန်တော်တို့ သင်တန်းတက်တော့ ကီထိုင်ရတယ်။ ဗမာလိုဆို မြင်းထိုင်ပေါ့။ ပုခုံအကျယ်နှစ်ဆကို ခြေဖဝါးမျဉ်းပြိုင်ထားပြီး မလှုပ်မယှက်ထိုင်ရတာ။ ခါးအထက်ပိုင်းကို လျှော့ထားရတယ်၊ ညှစ်မထားရဘူး။ ညောင်းတဲ့အခါ သတိထားလိုက်မိရင် ညှစ်ထားမိပြီ။ ပေါင်တွေကလည်း ပူပြီး ဒူးတွေဆို တဆတ်ဆတ်တုန်တယ်။ ငယ်တုန်းကတော့ ဆရာမသိခင်(တကယ်က မမြင်ချင်ယောက်ဆောင်တာပါ) အနေအထားခိုးပြီး ပြင်ပါတယ်။ ကြီးလာတော့ မပြင်တော့ပဲ ကြိတ်ခံနိုင်သွားပါတယ်။ ကစားနေရင်း တအားမောလာတဲ့အခါ ထိုးတဲ့ လက်သီးတွေ၊ ခြေကန်ချက်တွေမှာ အားမပါတော့ဘူး၊ အားမထည့်ချင်တော့ဘူး။ စိတ်ထဲမှာ ဒီတစ်လုံးထိုးပြီးရင် ပြီးပြီ၊ ဒီတစ်ချက် ကန်ပြီးရင် ပြီးပြီ လို့တွေးပြီး အားထည့် ကစားခဲ့တယ်။ ကျွန်တော် ပြောပြချင်တာက စိတ်မဝင်စားတဲ့အလုပ်၊ ဝါသနာမပါတဲ့အလုပ်ဖြစ်ပါစေ အားစိုက်လုပ်ဖြစ်ခဲ့တယ် ဆိုတာကိုပါ။ “ လူဆိုတာ ကိုယ်လုပ်တဲ့ အလုပ်မှာ ဘုရင်တစ်ဆူ ဖြစ်နေရမယ် ” ဆိုတဲ့ မင်းသိင်္ခ ရဲ့ ဆောင်ပုဒ်ကို နှစ်သက်ခဲ့တာလည်း ပါမှာပါ။

ကရာတေးကို (၂၀၁၈)လောက်အထိ ကစားဖြစ်တယ်။ အိမ်ထောင်မကျခင် (၂၀၀၄)အထိ ဆက်တိုက် ကစားဖြစ်တယ်။ (Hotel Life) ထဲရောက်သွားတော့ ပြတ်တောင်း ပြတ်တောင်းပါ့။ အခုတော့ ကျွန်တော် စက်ဘီးစီးဖြစ်နေတယ်။ ရက်ပိုင်းပဲ ရှိသေးတာပါ။ မနေ့ကထိမှ (၉)ရက်ပဲ ရသေးတာ။ အုပ်စုလိုက် ဆုံပြီး လွှတ်တော်ထိစီးဖြစ်တယ်။ ကျွန်တော့်ဘီးက (၂၀၁၄)လောက်ကဆိုတော့ ဒိတ်အောက်နေပြီ၊ လေးနေပြီလို့ ပြောကြတယ်။ သူတို့မပါတဲ့ရက် ချင်းတွင်းတံတားဖြတ်စီးတယ်၊ နောက် အလုံဘက်က စာရေးဆရာတစ်ယောက်ဆီ အလည်ဝင်ပစ်လိုက်တယ်။ အေးဆေးပါ။ နင်းနိုင်ပါသေးတယ်။ မနေ့ကတော့ ဘုတလင်ဘက် စီးကြမလို့တဲ့ စက်ဘီးအုပ်စုကြီးနဲ့တွေ့တယ်။ အစီး(၂၀)လောက်ရှိမယ်။ အသိတွေချည်း…ကိုယ်ပဲ မသိသေးတာ။ မနင်းနိုင်တဲ့အချိန် ကားပေါ်တင်လိုက်ခဲ့လည်းရတယ် ကားကြီးတစ်စီးလည်းပါတယ် ဆိုတာနဲ့ လိုက်သွားလိုက်တယ်။ အပြန်ကျရင် ကားပေါ်တင်လိုက်မယ်လို့ ဆုံးဖြတ်ထားလိုက်တယ်။ တကယ်သွားတော့ ဘုတလင်ကြေးရုပ်ရောက်တော့ ညောင်ကန်ထိသွားမှာတဲ့။ ကျွန်တာ် ဒီနေ့စီးတဲ့ စက်ဘီးက တာယာအသေး၊ ဟိုဘက်မှာက သဲထူတယ်ဆိုတော့ အဆင်မပြေဘူး။ ဒါပေမယ့် ဟိုထိရောက်အောင် စီးမယ်ပေါ့။ အောင်အောင်မြင်မြင် ရောက်ခဲ့ပါတယ်။ အပြန်ကျ ကားပေါ်တင်မယ့် စိတ်ကူးဖျောက်ပြီး အရောက်ပြန်စီးမယ် စိတ်ကူးလိုက်တယ်။ အားလုံးက တွဲခေါ်တာရယ်၊ ဟိုက်ဝေး စီးနည်းကို သဘောပေါက်သွားတာရယ်၊ ကိုယ့်အားကိုယ်လည်း ချိန်ဆနိုင်တာရယ်ကြောင့်ပါ။

အပြန် ကျွန်တော့်ရှေ့မှာ သုံးစီးပဲ ရှိတယ်။ ခဝဲကျင်းနား မရောက်ခင်မှာ သူတို့က လက်ဖက်ရည်ဆိုင်ထဲက လှမ်းခေါ်တယ်။ ရေလည်း ကုန်နေတာမို့ ဝင်သွားလိုက်ပြီး ရေခဲရေ ရေနွေးကြမ်းဖန်ခွက်နဲ့ နှစ်ခွက် ဆင့်သောက်ပစ်လိုက်တယ်။ အသက်ရှုရခက်လာတယ်။ မှားပြီ ဆိုတာ သိလိုက်ပြီ။ မင်းသွေး ကိသွားတာ၊ လေယာဉ်မယ်လေး လစ်သွားတာ ဒါ့ကြောင့်ဆိုပြီး ချက်ခြင်းအတွေးပေါက်တယ်။ အခါတိုင်း ဘယ်လောက်မောမော ရေတဝ မသောက်ဖြစ်ဘူး သတိထားတယ်။ ဒီတစ်ခါတော့ သတိလွတ်သွားတယ်။ အဲဒါနဲ့ ဖြည်းဖြည်းချင်း စီးလာခဲ့လိုက်တယ်။ နောက်တော့ နှလုံးက နည်းနည်းအောင့်လာတယ် ထင်တာနဲ့ နားလိုက်တော့တယ်။ နောက်က ကားကို ဖုန်းဆက်ကြည့်တယ်။ စောင့်တယ်။ နောက်တော့ ဆိုက်တွဲနဲ့ တင်ပြီးပြန်လာခဲ့လိုက်တယ်။ သူငယ်ချင်းနှစ်ယောက်ကတော့ မင်း စာမေးပွဲအောင်တော့မလို့ဟာကွာ ဘာညာပြောပေမယ့် ကျေနပ်ပါတယ်။ (Trainning) ကောင်းကောင်းမရှိသေးဘဲနဲ့ ဒီလောက်အကွာအဝေး နင်းနိုင်တာရယ်၊ (ရေသောက်မမှားခဲ့ရင်) မုံရွာအရောက် နင်းနိုင်သေးတဲ့ ကိုယ့်ခြေအခြေအနေကို သိနေတာရယ်ကြောင့်ပါ။ အသွားတုန်းကထက် အပြန်က နင်းရတာ သက်သာနေတာကြောင့်ပါ။ အသွားတုန်းက မောနေတဲ့အချိန်မှာတောင် ကိုယ့်ဘီးရှေ့ (၃)ပေလောက်ပဲကြည့်ပြီး အရောက်သွားခဲ့တာ မဟုတ်လား။ ဘာပဲဖြစ်ဖြစ် အကောင်းဆုံး အားထုတ်ခဲ့တာမို့ (ကိုယ်ရည်သွေးတယ် မထင်စေချင်ပါ) ကျေနပ်ခဲ့ရပါတယ်။

ကျွန်တော် မနှစ်သက်ပေမယ့် အားစိုက်လုပ်ခဲ့တဲ့ အလုပ်တစ်ခုလည်း ရှိသေးတယ်။ ဟိုတယ်အလုပ်ပေါ့။ သင်တန်းတစ်ခုမှာ တွေ့တဲ့ (Hotel Site) က ညီငယ်တစ်ယာက်က ညွှန်းတာနဲ့ ဟိုတယ်လောကထဲ ဝင်ဖြစ်တယ်။ ဘာတွေလုပ်ရမှန်း မသိဘူး၊ ဌာန ဘယ်နှစ်ခု ရှိမှန်း မသိဘူး။ သူ့ကို မေးကြည့်တယ် “ ဘယ်ဌာန အမြင့်ဆုံးလဲ ” လို့။ ဧည့်ကြိုတဲ့။ ဒါနဲ့ ဧည့်ကြို လျှောက်ဖြစ်တယ်။ စိတ်ထဲမှာ ဧည့်ကြိုကို အထင်မကြီးဘူး။ သွားကြိုသွားကျဲ(သဂျိုသဂျဲ) နဲ့ ဧည့်သည် ဖားရတဲ့ ဌာနလို့ ထင်ထားလို့။ စလုံးထွက်မယ် စိတ်ကူးထားလို့ စကားပြောလေးကတော့ ထော့ကျိုးထော့ကျိုး ပြောတတ်သလိုပါ့။ ဥပမာ

“ What is your name U Ba Aye ?” တို့ ဘာတို့ မေးတတ်ပြီ။

“ What is my name? You are my father” တို့ ဘာတို့ ဘုရားတွေ့တဲ့ အဖြူကောင်တွေ၊ အမည်းကောင်တွေကို မေးတတ်ပြီ မဟုတ်လား။

အဲဒီတုန်းက ဟိုတယ်(GM) က ဟိုတယ်သင်တန်းဆရာဗျ။ ကျွန်တော့်ကို ကောင်းကောင်း ဖွပ်တာပေါ့။ ဧည့်ကြိုက မမတွေ၊ ကိုကိုတွေကလည်း ကိုယ့်ထက် အငယ်လေးတွေ၊ မန်နေဂျာတစ်ယောက်ပဲ ကိုယ့်ထက်ကြီးတာ။ အားလုံးကို ခယဝယ ဆက်ဆံနေရတော့ မဖြစ်သေးဘူး၊ သင်ပေးမှာထက် ကိုယ့်ဘာသာလေ့လာမှ ဖြစ်မယ်၊ နောက်ပြီး ဒီဟိုတယ်နဲ့ ပတ်သက်ပြီး တစ်နေ့အသစ်တစ်ခု သိရတတ်ရမယ်ဆိုပြီး စလေ့လာဖြစ်တယ်။ ပထမဆုံး မန်နေဂျာမမရဲ့ မှတ်စုစာအုပ်ကို ကူးယူတယ်။ နောက်တော့ တခြားသူတွေပါ လိုက်ကူးကြတယ်။ မန်နေဂျာမမကို ကျေးဇူးတင်စရာပါ(ဝေမျှပေးချင်တဲ့ စိတ်က လေးစားစရာပါ)။ နောက်တော့ ဟိုတယ်နဲ့ ပတ်သက်တဲ့ စာအုပ်တွေ၊ (Website) တွေ လေ့လာတယ်။ အဲဒီမှာ (SOP) အမျိုးမျိုး (JD) အမျိုးမျိုးကို သိလာရတယ်။ တချို့(Website)တွေက ကူးမရအောင် လုပ်ထားတယ်။ ရအောင်ကူးတယ်၊ မရရင် စာပြန်စီပစ်တယ်။ စလေ့လာကာစမို့ မူရင်း (Source/Author) မှတ်မထားမိတာတွေ ရှိတယ်။ သင်တန်းတွေ တက်တဲ့အခါ မေးခွန်းတွေ မေးတယ်။ အောင်မြင်တဲ့ (Complaint) ဖြေရှင်းနည်း သိချင်ပါတယ်တို့ ဘာတို့ပေါ့။ အဲဒီမှာ ဆရာတွေကလည်း သူတို့ သုံးနေတဲ့၊ သင်နေတဲ့ ဖြေရှင်းနည်းတွေ ပြောပြသင်ပေးကြပါတယ်။ အဲဒီအထဲက နည်းတွေနဲ့ စပ်ဟပ်ပြီး ဖြေရှင်းကြည့်ပါတယ်။ နောက်တော့ ကိုယ့်ဘာသာ မှတ်စုထုတ်ထားလိုက်တယ်။ ဖေ့စ်ဘွတ်ခ်မှာ ဟိုတယ်နဲ့ ပတ်သက်တဲ့ ဆောင်းပါးလေးတွေ သိပ်မတွေ့မိတာနဲ့ (ကျွန်တော် မတွေ့မိတာဖြစ်မှာပါ) ဟိုတယ်နဲ့ ပတ်သက်တဲ့ ဆောင်းပါးလေးတွေ ရေးတင်တယ်။ မှတ်စုထဲက ကူးထားတာတွေ တင်တယ်။ မူလရေးသူ မှတ်မထားမိရင် Credit:Original Writer ပေါ့။ တချို့က ပြန်တင်ထားကြတာ။ အဲဒီမှာ မူလရေးသားသူရော၊ ပြန်တင်ပေးတဲ့သူ နာမည်ပါ မှတ်ချက်နဲ့ ရေးတင်ပါတယ်။ ကျွန်တော့် ပေ့ခ်ျ ဝင်ဖတ်နေကြသူတွေ သတိထားမိမှာပါ။ တချို့က (Group/Page) မှာ ပြန်တင်ကြတယ်။ ကျွန်တော်ရေးတဲ့စာကို လေးစားစွာဖြင့် ထိ ဖော်ပြကြတယ်။ တချို့ သူတို့ရေးသလိုလို လုပ်ကြတယ်။ ပြန်ရှယ်တာ ကိစ္စ မရှိပေမယ့် ပြန်တင်တဲ့အခါ ရေးသူအမည် မဖော်ပြချင်တာက ပြဿနာပါ။ တချို့သိကြပေမယ့် Credit:Original Writer ဆိုပြီး တင်တတ်ကြတယ်။ အဖေမခေါ်ချင်လို့ အမေ့ယောက်ျား ခေါ်တယ်လို့ ရိုင်းရိုင်းပြောရမလား မသိပါဘူး။ အခုလောလောဆယ် စာမရေးနိုင်သေးလို့ ဟိုတယ်နဲ့ဆိုင်တဲ့ တခြားသူပို့စ်တွေ Credit: ပေးပြီးပြန်တင်ဖြစ်ပါတယ်။ တချို့ကိုတော့ စာစီပြန်တင်ပေးရတာပါ။ တချို့စာတွေက ဖောင်းပွပါတယ်။ မဆိုင်တာတွေဖယ်ပြီး ပြန်တင်တယ်၊ အောက်ခြေမှာ မူလရေးသူအမည် တပ်ပေးတယ်။ အဲဒီမှာတင် စာရိုက်ပြန်တင်တဲ့ ကျွန်တော့်ပို့စ်ကို (Like) မပေးတာ ကိစ္စမရှိဘူး။ (Copy) ယူပြီး မူလရေးသူ အမည်တပ်မပေးတာက ပြဿနာပါ။ အောက်တန်းကျတယ်လို့ပဲ ကျွန်တော်ယူဆပါတယ်။ ရှက်တဲ့စိတ်ကလေး ရှိသေးရင် ရှက်စေချင်ပါတယ်။ တချို့ဆရာတွေ ပညာဝေမျှနေတာ ကျွန်တော်လေးစားပါတယ်။ သူတို့အသိပညာလည်း ဝေမျှတယ်။ တခြားသူအသိပညာကိုလည်း လက်ဆင့်ကမ်းဝေမျှတယ်။ သူတို့ပေ့ခ်ျတွေ၊ ဂရုတွေမှာ မူလရေးသူစာတွေကို ပြန်ရှယ်ပေးနေတာတွေတွေ့နေရတာ ဝမ်းသာစရာပါ။ (Honesty is the best policy) ပါ။ ကျွန်တော့် အတွေ့အကြုံကို ခင်ဗျား မရနိုင်ဘူး၊ ခင်ဗျားအတွေ့အကြုံကို ကျွန်တော် မရနိုင်ဘူး။ ကျွန်တော့် အတွေ့အကြုံက ပေါက်ဖွားလာတဲ့ စာကို ခင်ဗျားစာ လုပ်လို့ မရနိုင်ဘူး။ တခြားသူ နှလုံးသားက စာကို ခင်ဗျားစာ မလုပ်သင့်ဘူး။ ဘာပဲဖြစ်ဖြစ် ကိုယ်လုပ်တဲ့ အလုပ်ကို အမြင့်ဆုံး အားထုတ်မှုနဲ့ လုပ်ပါ။

ကျွန်တော် မနှစ်သက်တဲ့ အလုပ်ပဲဖြစ်ဖြစ်၊ နှစ်သက်တဲ့ အလုပ်ပဲဖြစ်ဖြစ် အားစိုက်လုပ်ဖြစ်တော့ အောင်မြင်သည်ဖြစ်စေ၊ မအောင်မြင်သည်ဖြစ်စေ ကျွန်တော့်ကိုယ် ကျွန်တော် ကျေနပ်တယ်။ ကျွန်တော့်စည်းကမ်း ကျွန်တော်ရိုသေတော့ သူများဘယ်လိုပဲမြင်စေ၊ ထင်စေ (ကြောင်တောင်တောင်တော့ နိုင်တယ်လို့ ခင်ဗျားထင်နိုင်ပါတယ်) ကိုယ့်ကိုယ်ကိုယ် လေးစားတယ်။ စာအုပ်ကြီးဆန်ပေမယ့် စိတ်ချမ်းသာရပါတယ်။

ဒီစာဟာ ကျွန်တော့်(Page) လေး (20 K) ကျော်သွားတဲ့ အထိမ်းအမှတ်နဲ့ တွေးမိတွေးရာလေးတွေကို ရေးမိရေးရာ ရေးလိုက်တာပါ။ ခင်ဗျားတို့အတွက် စိတ်အနှောက်အယှက် မဖြစ်ဘူးလို့ ကျွန်တော် သေချာသိထားလို့ပါ။ ခင်ဗျားတို့ဟာ သက်ဆိုင်ရာအလုပ်မှာ စိုက်လိုက်မတ်တပ် အားစိုက်လုပ်နေကြသူတွေ မို့လို့ပါ။ လုပ်ငန်းခွင်တစ်ခုရောက်တာနဲ့ ဘယ်လိုခိုလိုက်မယ်၊ ဘယ်လိုညစ်လိုက်မယ်၊ ဘယ်လိုပို့လိုက်မယ်ဆိုပြီး ရောက်လာတဲ့ဝန်ထမ်းရယ်လို့ တစ်ယောက်မှ မရှိကြပါဘူး။ (အဆင်မပြေမှု အမျိုးမျိုးကြောင့်သာ တချို့ ပြောင်းလဲသွားကြရတာပါ)။ ကျွန်တော့်စာထဲကလို သူများစာ ကိုယ့်စာလုပ်နေတဲ့ သေးဖွဲတဲ့သူမျိုးတွေ မဟုတ်ကြလို့ပါ။ ကျွန်တော့် (Page) မှာ ရှိတဲ့ သူငယ်ချင်းအားလုံး ပိုမိုပျော်ရွှင်အောင်မြင် တိုးတက်ကြပါစေ။

 

လေးစားစွာဖြင့်

ထူးအောင်ဝင့်

(၉.၂.၂၀၂၀ နံနက် ၁၁း၅၃ မိနစ်)