လူလိမ္မာထင်ခံချင်တဲ့ လူရိုင်း

 

လူလိမ္မာထင်ခံချင်တဲ့ လူရိုင်း

 

           ကျွန်တော် ဟိုတယ်တစ်ခုမှာ အလုပ်ဝင်တုန်းကပေါ့ မှတ်မှတ်ရရ နှစ်ခါလောက် နောက်ပြောင်ဖူးတယ်။ တစ်ယောက်က (G.R.O)။ နောက်တစ်ယောက်က (Bell Boy) ထဲက။ (G.R.O) က ရှမ်းမလေးဗျ။ ရှုပ်နေမှာစိုးလို့ နာမည်တော့ မပြောတော့ဘူး။ ဥပမာ ပြောရရင် အိဖြူဖြူကို ဆိုပါစို့။ သူ အလုပ်ဝင်စမှာ ဂျူတီဝင်ပြီဖြစ်ကြောင်း ကိုယ့်ကိုပြောတယ်။ အဲဒါနဲ့ အလေးပြုပြီးပြီလားဆိုပြီး မေးလိုက်တယ်။ သူကလည်း မပြုရသေးဘူးတဲ့။ (Reception) နောက်မှာ ချိတ်ထားတဲ့ဟာလေးပြပြီး ရောက်လာရင် အလေးပြုရတယ်ဆိုပြီး အလေးပြုခိုင်းလိုက်တယ်။ (ဟိုတယ်စတားသတ်မှတ်ထားပေးထားတဲ့ဘုတ်ပြားလေးပါ။) ကိုယ်လည်း ပျော်စေပျက်စေ ပြောပြီး ရေသောက်ထွက်သွားတယ်။ ခဏနေတော့ (Bell Boy) တစ်ယောက် လိုက်လာပြီး အစ်ကို ဟိုကောင်မလေး အစ်ကိုတို့ (Reception) ကို အလေးပြုနေတယ်ဆိုတော့ ဟေ ဆိုပြီး ရေတောင် သီးချင်သွားတယ်။ အေးအေး အဲဒါ ငါနောက်ထားတာဆိုပြီး ချက်ခြင်း အထဲပြန်မဝင်ဘဲ စောင့်နေလိုက်တယ်။ တော်နေ ကျန်တဲ့သူတွေက စနေကြတာဆိုရင် ကိုယ့်ကို မျက်စောင်းတွေ ဘာတွေ လာနေနိုင်တယ် မဟုတ်လား။

အဲ နောက်တစ်ခါ နောက်ပြောင်တာက (Bell Boy) တွေကို။ အဲဒီနေ့က (Pay Day) ဆိုတော့ သူတို့က (Accounting) ဌာန တကြည့်ကြည့်ပေါ့။ ကိုယ်တွေက ကောင်တာကနေမြင်နေရတာကိုး။ အပြင်ထွက်ပြီး ညီရေ လစာထုတ်လို့ ရပြီတဲ့ ဆိုပြီး စလိုက်တယ်။ ဟုတ်ကဲ့ အစ်ကို ခဏနေ သွားလိုက်မယ်ဆိုတော့ ကိုယ်လဲ အထဲပြန်ဝင်လာတယ်။ သူတို့ တစ်အုပ်လုံး သွားမယ် မထင်ဘူး။ ခဏနေမှ အစ်ကိုရာ နောက်တာဗျာ...ကျွန်တော်တို့က အစ်ကိုပြောလို့ သွားကြတာ၊ အစ်ကို နောက်မယ် ထင်မထားဘူးဗျာ တဲ့။ အဲဒါနဲ့ ကျွန်တော် တောင်းပန်လိုက်ပြီး နောက်ကို မစနောက်ဖို့ ဆုံးဖြတ်လိုက်တယ်။ သတိထားရတယ်။ သူတို့က စိတ်မဆိုးကြပါဘူး။ စမယ် မထင်တဲ့ အစ်ကိုကြီးက စလိုက်တော့ အံ့သြတဲ့သဘောမျိုးပါ။ ကျွန်တော် မစနောက်တော့ဘူး ဆုံးဖြတ်တာကလည်း သူတို့ တန်ဖိုးထားတာကို အလေးထားတဲ့ သဘောပါ။ သူတို့က တန်ဖိုးထားပြီးသား၊ ကိုယ့်အပြုအမူကြောင့် တန်ဖိုးကျသွားတတ်တယ်လို့ သိလိုက်ရတယ်။

အခုလည်း အခြေအနေ အကြောင်းကြောင်းကြောင့် မဂ္ဂဇင်းနှစ်ခုလောက်အတွက် စာစစ်ပေးနေရတယ်။ အဲဒီမှာ တွေ့ရတာက စာရေးသူကြောင့် စာလုံးပေါင်းမှားတယ်။ ဒါပေမယ့် နည်းတယ်။ စာစီသူကြောင့် စာလုံးပေါင်းမှားတာ များတယ်။ မလုပ်တတ်ဘူး၊ မကိုင်တတ်ဘူး ဆိုရင် ခေတ်ကာလ ငတိတွေ စာစီတာဆိုတော့ မလုပ်တက်ဘူး၊ မကိုင်တက်ဘူး တို့ ဘာတို့ ဖြစ်လာရော။ ဖေ့စ်ဘွတ်ခ်မှာလည်း ဇော်ဂျီ၊ ယူနီကြောင့် မဟုတ်ဘဲ ဖြစ်သလို စာရိုက်တင်နေကြတာကို တွေ့တွေ့နေရတော့ အာရုံနောက်လာရော။ စာလုံးပေါင်းအလွဲများဆိုပြီး အယ်လ်ဘမ်လေးလုပ်ပြီး ခဏခဏလွဲမှားကြတဲ့စာလေးတွေ တင်တယ်။ မြို့မေတ္တာခံယူလိုက်တာပေါ့လေ။ တစ်နေ့က ဗိုလ်ချုပ်ကတော်လှန်ပြီ ဆိုတဲ့ စာကြောင်းလေးကို စပေ့အမျိုးမျိုးခွဲပြီး တင်လိုက်တယ်။ အဲဒီမှာ အဓိပ္ပါယ်တစ်ခုက တော်တော်ပြင်းပါတယ်။ ညီငယ် ကဗျာဆရာတစ်ယောက်က အဲဒီပို့စ် ဆရာရေးတင်တယ်ဆိုတာ မယုံချင်ဘူးတဲ့။ သူ့စိတ်ထဲမှာ ကျွန်တော့်ကို နေရာတစ်ခုပေးထားတယ် ထင်ပါတယ်။ ကျွန်တော်ကလည်း ရိုင်းသာရိုင်းတာ လူယဉ်ကျေး အထင်ခံချင်သေးတာကိုး။ လူရိုင်း အထင်ခံရတဲ့ အဲဒီပို့စ်လေး ဖျက်လိုက်တော့မယ်လို့ တစ်ခါတည်း ဆုံးဖြတ်ချက် ချလိုက်တော့တယ်။ ဘာ့ကြောင့်လဲဆို ကျွန်တော်က လူလိမ္မာထင်ခံချင်တဲ့ လူရိုင်းလေးကိုး...။

 

ရှဥ့်ညိုလေး

(၆.၁၀.၂၀၁၉ ည ၁၁း၀၈မိနစ်)