ကျွန်တော် မကောင်းဘူး
ကိုရန်နိုင်လေးရေ ကျွန်တော့်အကြောင်းလေး တချို့ ပြောပြချင်လို့။ ကိုးတန်း၊ ဆယ်တန်းလောက်က ကျွန်တော် သဘောကျတဲ့ သူငယ်ချင်းမလေးတစ်ယောက်ရှိသဗျ။ သူတစ်ခုခု လိုအပ်ရင်၊ ဒါမှမဟုတ် သူမလိုအပ်ရင်တောင် သူ့အတွက်ဘာမဆို အဆင်သင့်ဖြစ်နေသလိုမျိုး ကျွန်တော့်ဘက်က ရှိခဲ့ဖူးတယ်။
ကျွန်တော့်နောက်မှ အိမ်ထောင်ကျပေမယ့် ခုတော့ သူလည်း သမီးတစ်ယောက်ရဲ့ အမေပေါ့။ ခုချိန်ထိ ကူညီနိုင်တဲ့ အရေးလေးများပေါ်လာရင် ကူညီပေးနေတုန်း။ ပြောရရင် အဆင်သင့် ဖြစ်နေတုန်းပါ။ (ဘာမျှော်လင့်ချက်မှ မထားဘူး၊ ရိုးရိုးသားသားဆိုတာတော့ သိထားပေးပါ)။ ပြောချင်တာက ကျွန်တော်လိုအပ်တဲ့ အကူအညီမျိုး၊ အရေးကိစ္စမျိုးမှာ သူကူညီခွင့် မရခဲ့ဘူး။ ကျွန်တော်ကလည်း အကူအညီ မတောင်းခဲ့တာမျိုးလည်း ဖြစ်မှာပါ။ ဘာပဲဖြစ်ဖြစ်ကျွန်တော် ကျေနပ်ပါတယ်။ နောက်သူငယ်ချင်းမလေး ကတော့ ဆယ်တန်းနောက်ပိုင်းမှာ သူငယ်ချင်းတစ်ယောက်နဲ့ ဆက်စပ်ပြီး ခင်ခွင့်ရခဲ့တယ်။ ခင်ပြီးတဲ့နောက်ပိုင်း ကျွန်တော်လိုအပ်သမျှအကူအညီကို ခုချိန်ထိဆိုပါတော့ သူပေးတုန်း။ (ခုချိန်မှာ သူက သမီးနှစ်ယောက်အမေပါ၊ သူငယ်ချင်းဆိုတဲ့ ခင်မင်မှုတစ်ခုပဲ ရှိတာပါ)။ သူလိုအပ်တဲ့ အကူအညီမျိုးဆို ကျွန်တော်လုပ်မပေးနိုင်ခဲ့တာ များတယ်။ လုပ်ပေးနိုင်တောင် ကျွန်တော့်အကူအညီက သူ့အတွက် အထောက်အပံ့သိပ်မဖြစ်တာ သိတယ်။ ရှင်းရှင်းပြောရရင် ဘာတစ်ခုမှ ကျွန်တော်မကူညီနိုင်ခဲ့ဘူး။ ဒါပေမယ့် ကျွန်တော်တစ်ခုခု လိုအပ်ခဲ့ရင် သူကူညီနိုင်ရင် ကူညီပေးဦးမှာ ဆိုတာ ယုံတယ်။ ဒါဟာ ကံကြမ္မာလားလို့တောင် တစ်ခါတစ်ခါ စဉ်းစားမိတယ်။ တစ်ယောက်အတွက် ကျွန်တော် အဆင်သင့်ဖြစ်နေတတ်တယ်။ ကျွန်တော် ဘာတစ်ခုမှ အကူအညီမပေးနိုင်ခဲ့တဲ့ နောက်တစ်ယောက်က ကျွန်တော့်အတွက် အဆင်သင့်။ အဲဒီအကြောင်း ပန်းပုံပြင် ဆိုပြီး ဝတ္ထုတိုလေးတောင် ရေးဖြစ်ခဲ့တယ်။ ပရင့်မီဒီယာကို မဖြတ်ရသေးလို့ နောက်မှပေးဖတ်ပါဦးမယ်။ ခုပြောချင်တာက မိတ်ဆွေတစ်ယောက်အနေနဲ့ ကိုရန်နိုင်လေးရဲ့ ခင်မင်မှုက အားနာဖို့တောင် ကောင်းနေပြီ။ အားနာတယ်ဆိုတော့ စိတ်ဆိုးဦးမယ်။ တကယ်အားနာတာ။ မိတ်ဆွေတစ်ယောက်အနေနဲ့ ကျွန်တော့်ဘက်က ပျက်ကွက်မှုတွေ ရှိနိုင်တယ်။ ကျွန်တော့် သူငယ်ချင်းမလေး တကယ်အကူအညီလိုအပ်နေတုန်း ဘာတစ်ခုမှ မကူညီနိုင်ခဲ့တဲ့ ကျွန်တော် သူနဲ့ဆုံရမှာကို ဝန်သင့်တယ်။ သူ့ဘက်က နားလည်တယ်ဆိုပေမယ့် ကျေးဇူးတရားနဲ့ အားနာခြင်းက ကျွန်တော့်ကို အနေခက်စေတယ်။ နောက်ထပ် ကျေးဇူးဆိုတဲ့အရာတွေနဲ့ အားနာခြင်းဆိုတဲ့အရာတွေကြောင့် အနေခက်ရမှာကို ရှင်းရှင်းပြောရရင် ကျွန်တော်ကြောက်တယ်။ ဒီနေ့လည်း ခင်ဗျားနဲ့ ချိန်းထားပြီး ပြန်တော့မှာမို့ ခင်ဗျားလာနှုတ်ဆက်မှပဲ အိပ်ချင်မူးတူးနဲ့ ထလာရတဲ့ ကျွန်တော့်အဖြစ်ကို တွေ့မှာပါ။ ကျွန်တော်ဟာ ခင်ဖို့ကောင်းတဲ့ မိတ်ဆွေမဟုတ်ဘူးဆိုတာ ခင်ဗျားသိမှာပါ...။ ကျွန်တော် မကောင်းဘူးဆိုတာ သိထားစေချင်လို့ပါ...။
ချစ်ခြင်းများဖြင့်
သင့်ရဲ့
ရှဥ့်ညိုလေး
(၁၀.၆.၂၀၁၆ ညနေ ၆း၂၇မိနစ်)
သင့်ရဲ့
ရှဥ့်ညိုလေး
(၁၀.၆.၂၀၁၆ ညနေ ၆း၂၇မိနစ်)
Comments
Post a Comment