တစ်ယောက်ယောက် စောင့်ကြည့်နေတယ်
တစ်ဦးတစ်ယောက် ခင်ဗျားကို စောင့်ကြည့်နေတဲ့ ခံစားချက်မျိုး ခံစားဖူးပါသလား။ အပြင်သွားတဲ့အခါ အဲဒီခံစားချက်မျိုး ဖြစ်လာရင်လှည့်ကြည့်လိုက်။တစ်ဦးတစ်ယောက်က မရည်ရွယ်ဘဲနဲ့ ဖြစ်ဖြစ်၊ရည်ရွယ်ချက်နဲ့ပဲဖြစ်ဖြစ် ကြည့်နေတာမျိုး တွေ့ရတတ်တယ်။ ဒါပေမယ့် ဘယ်သူမှမရှိဘဲ တစ်ခါတစ်ရံ ခံစားမိဖူးမယ် ထင်ပါတယ်။
ကျွန်တော် (၇)တန်းလောက်တုန်းက သူငယ်ချင်းတစ်ယောက်အိမ်မှာ စာသွားကျက်တယ်။ အပြင်ဘက်က တစ်ယောက်ယောက်က ကြည့်နေတဲ့ခံစားချက်မျိုး အမြဲတမ်း ခံစားမိတယ်။ ကြည့်လိုက်ပြန်ရင်လည်း ဘာမှ မရှိဘူး။ တစ်ခုခုတော့ တစ်ခုခုပေါ့ဗျာ။ အဲဒီတုန်းက ဘာကိုမှ သိပ်မတွေးမိဘူး။ နောက်ပြီး ကြောက်တဲ့ ခံစားမှုမျိုးလည်း မခံစားမိဘူး။
ကျွန်တော် အလုပ်ဝင်တော့ ဧည့်ကြို ကောင်တာမှာပါ။ (Night Shift) အတူဆင်းရတဲ့ ၀န်ထမ်းတွေပြောတာတော့ ကောင်တာထိုင်ပြီး စာရိုက်နေရင်၊ တစ်ခုခုလုပ်နေရင် ဘေးနားကထောင့်မှာ လူလာရပ်သလို ခံစားရသတဲ့။ ကျွန်တော်တော့ ဘယ်လိုမှ မခံစားရပါဘူး။ ကျွန်တော်ထင်တာတော့ လူဝင်လူထွက်များတဲ့နေရာတွေမှာ အကျင့်ဖြစ်နေသလိုမျိုးပေါ့။ တံခါးပေါက်ကနေ တစ်ယောက်ယောက် ၀င်လာတယ်ဆိုတဲ့ ခံစားချက်မျိုး ခံစားရတာ ဒီတံခါးကနေ လူတွေဝင်လာတာကို အမြဲတမ်း မြင်တွေ့နေရလို့ ထင်ပါတယ်။
ခု (Lobby) မှာ ဧည့်သည်တစ်ယောက် အိပ်ပျော်နေတယ်။ သူယူထားတဲ့ အခန်းမှာ ဘာ့ကြောင့် မအိပ်လဲဆို တစ်ယောက်ယောက် ကြည့်နေသလိုမျိုး ခံစားနေရလို့တဲ့။ ဘာမြင်ရလဲ၊ ဘာတွေ့ရလို့လဲ ဆိုတော့ စိတ်ခံစားမှု သက်သက်ကြောင့်ပါတဲ့။ (Lobby) မှာ (Wifi) သုံးရင်း အိပ်ပျော်သွားပြီ။ တကယ်တော့ ဒါဟာ စိတ်က စိတ်ကို ခြောက်တာပါ။ တစ်ယောက်ထဲလည်း ဖြစ်ပြန်၊ နေရာစိမ်း ဒေသစိမ်းလည်း ဖြစ်ပြန်ဆိုတော့ စိတ်အထာမကျတာလို့ပဲ ယူဆပါတယ်။ ဒါက ကျွန်တော့်ထင်မြင်ချက် သက်သက်ပါ။
မှောင်မည်းနေတဲ့ နေရာတွေကို ညပိုင်း အဖော်မပါဘဲသွားရရင် ကျွန်တော်လန့်ပါတယ်။ မကြောက်ပါဘူး။ ဖြိုးခနဲ ဖြတ်ခနဲ အသံကြားရရင် လူက အသင့်ဖြစ်သွားတယ်။ ဆိုလိုတာက ကိုယ့်ကိုယ် ရန်ပြုမယ့်သူဆိုလဲ ခုခံရန်အသင့်၊ တစ်ခုခုဆိုလည်း စူးစမ်းရန် အသင့်ပေါ့။ ကျွန်တော် သတ္တိကောင်းလှတယ်လို့ မဆိုပါဘူး။ မနက်(၂)နာရီ၊ (၃) နာရီလောက် တစ်ယောက်ထဲ ဓာတ်လှေကားစီးရရင် လန့်သလို ဖြစ်ပါတယ်။ ဓာတ်လှေကားပျက်သွားရင် လူမသိ၊ သူမသိ ပိတ်မိနေမှာကို စိုးတယ်ပဲ ထင်မိတယ်။ နောက် ဓာတ်လှေကားခန်းထဲက နံရံမှာ မပီဝိုးဝါးပေါ်နေတဲ့ ကိုယ့်အရိပ်ကိုယ်ကြည့်ပြီး အကြောင်းရင်းမှန်ကို စဉ်းစားမိတယ်။ တကယ်တော့ ရုပ်ရှင်ကြည့်များသွားတာပါ။ သရဲ ဘာညာတွေ အခန်းထဲပေါ်လာမှာ၊ လူပြတ်တဲ့ ကားပါကင်တွေမှာ သရဲခြောက်ခံရမှာကို ကြောက်တာပါ။ တကယ်စဉ်းစားကြည့်မိပြန်တော့လည်း ကြောက်တာ မဟုတ်ပြန်ဘူး။ ကြောက်ရင် မျက်လုံးစုံမှိတ်ထားမှာပေါ့။ ကျွန်တော်တို့အခြေအနေက တစ်ခုခု မသင်္ကာရင်တောင် ပြူးပြဲလိုက်ရှာရတာမျိုး မဟုတ်လား။ တကယ်တော့ ကိုယ့်စိတ်က ကိုယ့်ကို ခြောက်တာပါ။ သရဲဟာ ကိုယ်ပါပဲ။ တစ္ဆေဟာလဲ ကိုယ်ပဲ။ ခုချိန်ထိ ဘာဆို ဘာမှ မတွေ့ဖူပါဘူး။ တွေ့ဖို့လည်း မတောင့်တပါဘူး။ လောင်းကြေးစားကြေးနဲ့ ဟိုသွားပါလား၊ ဒီသွားပါလားမျိုးကိုလည်း လုံးဝ စိတ်မ၀င်စားပါဘူး။ သရဲက တစ်တောင်လောက် လျှာထုတ်ပြရင်တောင် ကြောက်ချင်မှ ကြောက်မယ်ထင်ပါတယ်။ လျှာထုတ်ပြောင်တယ် ထင်ပြီး ရယ်မိမလား မသိဘူး။
တကယ်တော့ ကျွန်တော်ပြောချင်တာက ကိုယ့်စိတ်က ကိုယ့်ကိုယ်ခြောက်တာပါ။ ကိုယ့်စိတ်ကပဲ ကြောက်လောက်အောင် ခြောက်နိုင်တာပါ။ သေချာလေး ပြန်တွေးကြည့်ပေးပါ။ ကိုယ့်စိတ်က ခြောက်လို့ ပြေးခဲ့ရပေါင်းလည်း များပြီမဟုတ်လား။
ချစ်ခြင်းများဖြင့်
သင့်ရဲ့
ရှဥ့်ညိုလေး
https://shintnyolay.weebly.com
Comments
Post a Comment