ဝင်းငြိမ်း နှင့် စာရေးဆရာများ အပိုင်း (၄၅)
ဝင်းငြိမ်း နှင့် စာရေးဆရာများ အပိုင်း (၄၅)
(နောက်
ကိုယ် ရွှေတိဂုံဘုရားဖူးရင်း ပြုရင်းနဲ့ ဒီသဘောကို စဉ်းစားမိတယ်။ ဒီသဘောလေး ၀တ္ထုရေးရရင်၊
ကဗျာရေးရင် ကောင်းမှာပဲလို့။ ဒါပေမဲ့ မရေးဖြစ်ခဲ့ဘူး။ နောက် ရန်ကုန်မှာ လာပြီး ရှစ်နှစ်
ဗွီအိုင်ပီ လာလုပ် ရတယ်။ အဲဒီတုန်းက ကိုယ်ကတော့ အားလုံးကို လက်ခံတွေ့ခဲ့တာပဲ။ ကူညီနိုင်တဲ့ကိစ္စဆိုရင်
ကူညီခဲ့တာပဲ။ ဒါပေမဲ့ ကိုယ် ရာထူးလက်ကိုင် မရှိတော့တဲ့အချိန်မှာ ကိုယ် ကူညီခဲ့ဖူးသူ
တချို့တွေက လမ်းမှာတွေ့ရင် တောင် မတွေ့သလို မမြင်သလို လုပ်လာကြတယ်။ မခေါ်ချင်သလို မပြောချင်သလို
လုပ်လာကြတယ်။) ကို
ဆက်ဖတ်ရန်.........
ကိုယ်က တုန်လှုပ်တာတော့ မဟုတ်ပါဘူး။ ဒါပေမဲ့ ခံစားချက်တွေ ရှိလာတယ်။ ဒါကို ၀တ္ထုနဲ့ ရေး
မလား၊ ကဗျာ နဲ့ ရေးမလား စဉ်းစားပြီး ဒီကဗျာကို ရေးခဲ့တာပဲ။ ဒါက ဘယ်သူ့ကိုမှ မထိခိုက်ပါဘူး။
တွေးယူ ရတဲ့ ကဗျာပဲ။ ဒီကဗျာကို မန္တလေးအသင်း(ရန်ကုန်)က ၁၉၇၈ ခုနှစ်က ထုတ်ခဲ့တဲ့ မဂ္ဂဇင်းမှာ
ပါခဲ့တယ်။ကိုယ် ပြန်ရတော့မယ်ဆိုတာ သိတော့ ရေးခဲ့တဲ့ ကဗျာတစ်ပုဒ် ရှိသေးတယ်။ ဒီမှာ ဖတ်ပြမယ်။
ဒီတစ်ချီတော့
လက်နှီးဘ၀
ရောက်ရမှတော့
ဘာကြောင့် အိုးမဲ
ကြောက်နေသလဲ။
အရင်အချိန်
ဂုဏ်မသိန်မီ
အရည်ဝင်းလဲ့
စားပွဲထက်တွင်
လက်သုတ်ပ၀ါ
ဖြစ်ခဲ့တာကို
သင့်မှာ အနေကျပ်နေသလား။
ဟို့ဟိုဘ၀
သင်ရောက်စက
မွမွနုနု
ဥဥကလေး
ကြက်သွေးပန်းခက်
ရွှေဝါစွက်သည့်
မျက်နှာသုတ်ပ၀ါ
ဖြစ်ခဲ့ပါ၍
အဲဒါ စားမြုံ့ပြန်နေသလား။
အိုဘယ့်လက်နှီး
ဘ၀ဆည်းဆာ
သင် ရောက်လာပြီ
ဒီတစ်ချီတော့
အမှိုက်ပုံး။
ပြန်ရတော့မယ်ဆိုတာ သိနေတော့ ရေးခဲ့တာပဲ။ ဒီကဗျာက ၁၉၇၇ နိုဝင်ဘာထုတ် ရှုမ၀မဂ္ဂဇင်းမှာ ပါခဲ့တယ်။ အဲဒီလိုပေါ့။ ခံစားချက်ရှိတဲ့အခါမှာ ကဗျာလေးတွေ ရေးဖြစ်သွားတယ် "
" ကျေးဇူးတင်ပါတယ် ဆရာ။ ကျွန်တော့် အသက်လောက် စာရေးသက် ရှိနေတဲ့ဆရာ့ကို နောက်ဆုံး မေးချင်တာ တစ်ခု မေးခွင့်ပြုပါ ဆရာ။ အသက်အရွယ် ရလာတဲ့အမျှ တချို့ စာရေးဆရာတွေက စာရေးသား တဲ့ အကြောင်းအရာ ရွေးချယ်မှုကအစ ပုံစံပြောင်းလာကြတယ်။ ဆရာဆိုရင် စောစောက ပြောသလို သဲကြွေ လုဖန်တို့၊ သက်ထားတို့လို အနုအရွကလေးတွေကနေ တရားဓမ္မဘက်နွှယ်တဲ့ ၀တ္ထု တွေ ရေးလာ တာ တွေ့ရပါတယ်။ ဒီလို ပြောင်းလာတာဟာ အသက်အရွယ် ရလာလို့လား၊ ဒါမှမဟုတ် ပင်ကိုဗီဇ အရလား သိပါရစေ"
" ကိုယ့်အယူအဆအရ ပြောရရင်တော့ အသက်အရွယ်အပေါ် မူတည်တယ်လို့ ထင်တယ်။ ဥပမာတစ်ခု ကိုယ် ပြောပြမယ်။ လွန်ခဲ့တဲ့ နှစ်ပေါင်း ၃၀ လောက်က အင်္ဂလန်မှာ ကွန်ဆာဗေးတစ် အမတ် တစ်ယောက်က သတင်းစာ ရှင်းလင်းပွဲ လုပ်တယ်။ မေးတဲ့ မေးခွန်းတွေ ပြန်ဖြေတော့ သူက ဘာပြောသလဲ ဆိုရင် ကျုပ် ကျောင်းသားဘ၀တုန်းကတော့ ကွန်မြူနစ်ပဲတဲ့။ ကျုပ် မိန်းမရတဲ့ အခါ ကျတော့ ဆိုရှယ်လစ် ဖြစ်လာတယ်။ နောက် သားတွေ၊ သမီးတွေ ရလာတဲ့အခါကျတော့ လေဘာ ဖြစ်လာတယ်။ အခု မြေးတွေ ရလာတဲ့အခါ ကျတော့ ကွန်ဆာဗေးတစ် ဖြစ်လာတယ်တဲ့။ အဲဒီလို ဖြစ်တယ်.. ဆိုတော့ ကိုယ် မြင်တာကတော့ အသက်အရွယ်အရ မြင်တတ်တဲ့ အာရုံချင်း မတူတော့ဘူး။ အခု ကိုဝင်းငြိမ်း တို့ အရွယ်မြင်တဲ့ အာရုံနဲ့ ကိုယ်တို့ အရွယ်နဲ့ မတူတော့ဘူး။ ကိုယ့်အသက်ဆိုရင် အခု ၆၅ နှစ် ရှိနေပြီ။ ဒီအသက်အရွယ်မှာ အာရုံများတဲ့ ရန်ကုန်မှာ ကိုယ် မနေချင်တော့ဘူး။ လူငယ်တွေအတွက် ရန်ကုန်ဟာ ပျော်စရာကောင်းပေမယ့် ကိုယ်တို့ အသက်အရွယ်မှာ မပျော်တော့ဘူး။ မန္တလေး ကို ပြောင်း တော့မယ်။ စီစဉ်လို့တောင် ပြီးနေပြီ။
ကိုယ်နဲ့ခေတ်ပြိုင် ရေးခဲ့ကြတဲ့ သူတွေဆိုလည်း တဖြုတ်ဖြုတ် သေကုန်ကြပြီ။ စာရေးတဲ့နေရာမှာ ပတ်ဝန်း ကျင် က ဒီနေရာမှာလည်း စကားပြောလာပြန်တယ်ကွ။ ကိုယ်ဆိုရင် လူငယ်တွေနဲ့ပဲ ပေါင်းတယ်။ ဒါကြောင့်လည်း ဒီနေ့ အချစ်ဝတ္ထု ရေးနိုင်သေးတာပဲ၊ ဟုတ်တယ် မဟုတ်လား။ တစ်ခုတော့ ရှိတာ ပေါ့လေ။ အချစ် ၀တ္ထု ရေးတယ်ဆိုပေမယ့် သမီးရည်းစား အချစ်မျိုးတော့ မရေးတော့ဘူး။ လင်မယား ဖြစ်ပြီးမှ ချစ်တဲ့ အတွေ့အကြုံမျိုးလေးပဲ ရေးချင်တော့တယ်။ ဒါ အသက်အရွယ်အရလို့ ပြောရမှာပဲ "
" ကျေးဇူးတင်ပါတယ် ဆရာ၊ ဆရာ့အတွေ့အကြုံ အယူအဆ တစ်စိတ်တစ်ဒေသကို မှတ်တမ်းတင်ခွင့်ရ တဲ့အတွက် ပေဖူးလွှာ စာတည်းအဖွဲ့ ကိုယ်စား ကျေးဇူးတင်ပါတယ်။ ဆက်လက်ပြီးတော့လည်း ဆရာ ကျန်းကျန်းမာမာ နဲ့ စာပေနဲ့ တစ်ဖက်တစ်လမ်းက တိုင်းပြည်အကျိုး သယ်ပိုးနိုင်စေဖို့ ဆန္ဒပြုခဲ့ပါတယ်"
ပေဖူးလွှာမဂ္ဂဇင်း၊ အမှတ်-၄၂၊ နိုဝင်ဘာလ၊ ၁၉၈၄ ခုနှစ်။
ပြောမယ်
ဆရာဦးသာဓု
ဆရာဦးသာဓု
" ဆရာ စာပေလောကထဲ ရောက်လာပုံကတော့ ခပ်ဆန်းဆန်းပဲ "
ကျွန်တော် နဲ့ စတွေ့စဉ်မှာပဲ ပထမမေးခွန်းဖြစ်တဲ့ "စာပေလောကထဲ ၀င်ရောက်လာပုံ" ကို ဆရာဦးသာဓု က စတင်ဖြေကြားပါတယ်။
" ရည်ရွယ်ချက် မရှိဘဲ ရောက်လာတာပဲ၊ ရည်ရွယ်ချက်မရှိဘူးလို့ ပြောရတာက ဟိုတုန်းက စာရေးဆရာ တွေရဲ့ စားဝတ်နေရေး အခြေအနေကလည်း သိတဲ့အတိုင်း လုံလောက်တာ မဟုတ်ဘူး။ ဒီတော့ ကိုယ့် မိသားစု စားဝတ်နေရေးအတွက် လုံလောက်အောင် လုံးပန်းနေရတယ်။ ပုံနှိပ်တိုက် ထောင်တယ်။ ပေါင်ဒါ လုပ် ရောင်းတယ်။ ဆရာ လုပ်ခဲ့တာတွေကတော့ စုံနေတာပါပဲ။ ဂျပန်ခေတ်တုန်းက မြင်းလှည်းတောင် မောင်းခဲ့ သေးတယ်။ ဆရာ သော်တာဆွေ တို့လိုပေါ့။ ဂျပန်ခေတ်ပြီး အင်္ဂလိပ်ခေတ် ရောက်လာတော့ အိမ်မှာ ရှိတဲ့ ကားလေး ကို ဘတ်စ်ကားလုပ်ပြီး မောင်းတယ်။
မြင်းလှည်းမောင်း၊ ဘတ်စ်ကားမောင်း လုပ်လာတော့ လူအမျိုးမျိုးနဲ့ ဆက်ဆံခဲ့ရတယ်။
ရှင်းရှင်းပြောရရင် ဒီလောကမှာ မိုက်ရိုင်းတာတွေ၊ လူကို လူမထင်တာတွေ၊ ကလိမ်ကျတာတွေ တွေ့လာ ရတယ်။ ပြီးတော့ မော်တော်ကား နဲ့ ပတ်သက်တဲ့ ဒိုင်နမိုဆိုင်၊ ဘက်ထရီဆိုင်၊ တာယာဆိုင်၊ ဘယ်နေရာမှာပဲ ကြည့်ကြည့် ကလိမ်ကျတာတွေချည်း တွေ့နေရတယ်။ ကိုယ့်ဖို့ ကိုယ် တွက်ကြတာ ချည်းပဲ တွေ့ရတယ်။ အဲဒါနဲ့ ငါ ဒီလူတွေကို ဘယ်လိုလုပ် ပြောရပါ့မလဲ၊ ငါ စာအုပ်တစ်အုပ် ရေးဦးမယ် ဆိုပြီး " ဒါတွေကိုပြင်" ဆိုတဲ့ စာအုပ် ရေးလိုက်တယ်။ ရည်ရွယ်ချက်ကတော့ ဒီလူတွေ အယူအဆ အတွေးအခေါ် တွေ မှန်သွားစေချင်တာပဲ ရှိတယ်။ စာအုပ်က နည်းနည်းပါးပါးပဲ ရောင်းရတယ်။
ဆရာ ရည်ရွယ်ပြီး ရေးလိုက်တဲ့ မြင်းလှည်းသမားတို့၊ ဘတ်စ်ကားသမားတို့က စာဖတ်ရကောင်းမှန်းလည်း သိတဲ့ လူတွေမှ မဟုတ်ဘဲကိုး။ ဒါလောက်တောင် ဖြစ်လှတာဆိုပြီး မြင်းလှည်းသမား၊ ဘတ်စ်ကား သမား တွေ ကို အလကား သွားဝေပစ်တယ်။ ရတဲ့လူတွေက စာအုပ်ဆိုင်မှာ ပြန်ပြီးသွားရောင်း ကြတယ်။ အောင်မြင် သင့်သလောက်တော့ မအောင်မြင်ဘူးပေါ့လေ။ တစ်ရာမှ နှစ်ယောက်၊ သုံးယောက်လောက် တော့ အသိ တရားလေး ရသွားကြမှာပေါ့။
ဆရာ က ရောင်စုံပုံနှိပ်စက်လည်း ထောင်ထားတော့ မဂ္ဂဇင်းတို့၊ ၀တ္ထု မျက်နှာဖုံးတို့ ရိုက်ဖို့လာကြတယ်။ အဲဒီ အထဲမှာ သွေးသောက်မဂ္ဂဇင်းပိုင်ရှင် ကိုကျော်ရိုး (စာရေးဆရာပြည့်စုံ)က " ဒါတွေပြင်" စာအုပ် ပေးလိုက် တော့ သူက ဖတ်ပြီး သဘောကျသွားတယ်။ ခင်ဗျား စာရေးကောင်းတယ်။ စာရေးဆရာ ဖြစ် နိုင်တယ်။ ၀တ္ထု တွေ ဘာတွေရေးရင် ရနိုင်တယ်။ ခင်ဗျား ၀တ္ထုတစ်ပုဒ် ရေးဗျာ။ ကျွန်တော့် မဂ္ဂဇင်းထဲမှာ ထည့် မယ်လို့ ပြော တယ်။ အဲဒီတော့ ဆရာက " ဟာ ဖြစ်မှာ မဟုတ်ပါဘူး၊ ကျွန်တော့် အလုပ်နဲ့ ကျွန်တော် ချာလပတ်လည် နေ တာပဲ" လို့ ဆိုတော့ သူက "ရေးသားရေးပါဗျာ၊ ဖြစ်ပါတယ် " လို့ ပြောတယ်။ ဆရာက "ရေးတာတော့ အရေးမကြီးပါဘူး။ ၀တ္ထုတိုတစ်ပုဒ် ခင်ဗျားက ပိုက်ဆံ ဘယ်လောက် ပေးသလဲ" လို့မေးတယ်။ သူက "ဟာဗျာ၊ ခင်ဗျားက ကလောင်သစ်ပဲ၊ ကလောင်သစ်ဆိုရင် မပေးဘူး" တဲ့။ ဆရာ ကလည်း "မပေးရင် မရေး ဘူးဗျာ" လို့ ပြောလိုက်တယ်။
ဆရာက ပိုက်ဆံမရတဲ့အလုပ်ဆိုရင် ဘာမှ မလုပ်ချင်ဘူး။ ကိုယ် ပင်ပန်းပြီးရင် ပိုက်ဆံရချင်တယ်။ ကုသိုလ် လုပ်တာက တစ်ပိုင်းပဲ။ ကိုကျော်ရိုးက " အဲဒီလိုဆိုလည်း ပေးပါ့မယ်ဗျာ" တဲ့။ "ဘယ်လောက် ပေးမလဲ" ဆိုတော့ "အစိတ်" တဲ့။ "ဒီ့ပြင် လူတွေ ဘယ်လောက်ပေးသလဲ" ဆိုတော့၊ "ဟာဗျာ ခင်ဗျားကလည်း ကျွန်တော် ကြည့်ပေးပါ့မယ်" တဲ့။ " ပေးမယ်ဆိုရင်တော့ ပေးရလိမ့်မယ်နော်" လို့။ အဲဒီခေတ်က တင့်တယ် တို့ က ၇၅ ကျပ်၊ ကျပ် ၁၀၀ လောက်ရတယ်။
ဝတ္ထုရေးပြီးတော့ ဆရာက ပေးလိုက်တယ်။ ငါးဆယ် ပေးရမယ်။ ခင်ဗျား ကျေနပ်မှ ထည့်ဆိုပြီး ပေးလိုက် တယ်။ ၀တ္ထုနာမည် က "၀န်ကြီး တစ်မတ်"။ အကြောင်းအရာက ဘာလဲဆိုတော့ ဗိုလ်ချုပ်အောင်ဆန်းတို့ ကျဆုံး တော့ ဂျူဗလီဟောမှာ အလောင်းလာထားတယ်။ ဆရာက အဲဒီနားမှာ နေတယ်။ လွတ်လပ်ရေး ဖခင် ကြီးကို အလေးပြုဖို့ ကန်တော့ကြဖို့ အမျိုးသမီးတွေ အများကြီး လာကြတယ်။ တချို့ကျတော့လည်း မျက်ရည် နဲ့ မျက်ခွက်၊ အင်မတန်ကို စိတ်ထိခိုက်လို့ ငိုယိုပြီး လာကြတယ်။ အဲဒီအထဲမှာ မိန်းကလေး တွေက အကဲဆုံးပဲ။ နိုင်ငံတော် ခေါင်းဆောင်ကြီးကို အလေးပြုဖို့ ဘတ်စ်ကားကြီးတွေနဲ့ လာကြတယ်။ အင်္ကျီလုံချည် ဆင်တူ နဲ့၊ နှုတ်ခမ်းနီ ပါးနီနဲ့ ၀တ်စားလာလိုက်ကြတာ မင်္ဂလာဆောင်သွားတာကျနေတာပဲ။ ဒါ လွတ်လပ်ရေး ဖခင်ကြီး ကို လာပြီး ကြည်ညိုကြတာလား။ သူတို့ ရှိုးလုပ်ဖို့ လာကြတာလား။ ဒါကို မျက်စိ နောက်တာ နဲ့ အဲဒီအကြောင်းကို "၀န်ကြီး တစ်မတ် "ဆိုပြီး ကောက်ရေးလိုက်တာပဲ။
အဲဒီဝတ္ထု သွေးသောက်ထဲ ပါလာတော့ တော်တော် သဘောကျသွားကြတယ်။ ဦးကျော်ရိုးကလည်း "ဆက်ရေးပါဦး၊ ရှုမ၀ဦးကျော်တို့ကလည်း ကျွန်တော်တို့အတွက် ရေးပါဦး" လို့ တိုက်တွန်းကြတာနဲ့ စာရေးဆရာ ဖြစ်မှန်းမသိ ဖြစ်သွားတာပဲ "
" ဆရာ "ဒါတွေပြင်" ရေးခဲ့တာ ဘယ်နှခုနှစ် လောက်ကပါလဲ"
" ၁၉၄၆ လောက်ကပဲ"
" ၀န်ကြီး တစ်မတ် ကကော "
" ဆရာ မေ့နေပြီ။ ဒါတွေပြင်နဲ့ မရှေးမနှောင်းပါဘဲ"
" သာဓု ဆိုတဲ့ ကလောင်နာမည်ကို ဘာကြောင့် ဆရာ ယူခဲ့တာလဲ ဆရာ "
" ဆရာ ကြိုက်တယ်။ သာဓု ဆိုတာ ကောင်းတာပဲ။ နောက်တစ်ချက်က အဲဒီခေတ်က စာရေးဆရာ အတော် များများ ရှိတဲ့အထဲမှာ ဆရာ့နာမည် တစ်ဘာသာ ထွက်လာစေချင်တယ်။ အဲဒီအချိန်က နေရတာ ကလည်း ကျားကူးကျောင်း (ဘုန်းကြီးကျောင်း)ဘေးမှာ ဆိုတော့ အိပ်ရာက နိုးတာနဲ့ တစ်ပြိုင်နက် သာဓု ဆိုတာ အမြဲ ကြားနေရတယ်။ သာဓု ... သာဓု ... သာဓု ဆိုတာ အမြဲကြားရတော့ ဟ ဒီအဓိပ္ပာယ်က ကောင်းလည်း ကောင်းတယ်။ လူတွေလည်း မှတ်မိလွယ်တယ်လို့ စဉ်းစားပြီး "သာဓု" ဆိုတဲ့ နာမည်ကို ကောက် တပ်လိုက် တာပဲ"
" ဆရာ့မှာ တခြား ကလောင်နာမည်တွေ ရှိသေးတယ်ဆို " " အများကြီးပဲ၊ ပဒေသာမဂ္ဂဇင်းတို့၊ သစ္စာမဂ္ဂဇင်း တို့မှာ ရေးတော့ တစ်ခါတလေ စာမူလိုရင် ကလောင်နာမည် အမျိုးမျိုး တပ်ပြီး ရေးပေး လိုက်တာပဲ၊ သုမောင် ဆိုတဲ့ နာမည်နဲ့လည်း ရေးဖူးတယ်။ မြကြည် ဆိုတဲ့ နာမည်နဲ့လည်း ရေးဖူးတယ်။ ဥသြ၊ သြဘာ၊ မောင်သောကြာ၊ ဘာဘူ၊ မွတ်တား၊ ဟာ ... စုံလို့ပါပဲ။ နာမည်တွေကတော့ မမှတ်မိ သလောက်ပါဘဲ"
" ဟုတ်ကဲ့ ဆရာ၊ ကျွန်တော်တို့ ငယ်ငယ်က ဖတ်ခဲ့ရဖူးတဲ့ "အတာ" ၀တ္ထုဟာ ဆရာ့ဘ၀အကြောင်းလို့ ပြော ကြ ပါတယ်။ ဟုတ်ပါသလား ဆရာ "
" ဟတ်ုပါတယ်။ "အတာ" ၀တ္ထုက ဆရာ့အကြောင်း ကိုးဆယ်ရာခိုင်နှုန်းလောက်ပါတယ်။ တစ်ခုတော့ရှိ တယ်။ အတာ နဲ့ ပတ်သက်ပြီး ဝေဖန်ခံရတာ ရှိတယ်။ အမေ မေတ္တာမဲ့ရသလား။ ဒါလောက်တောင် မေတ္တာ မဲ့ နိုင်ပါ့မလား။ ဆိုးနိုင်ပါ့မလားလို့ ဝေဖန်ကြတယ်။ ဆရာ့ကိုလည်း မေးကြတယ်။ ဆရာက တစ်ခွန်းတည်း ပဲ ပြောလိုက်တယ်။ ဒီထက်ဆိုးတာတွေတောင် ရှိသေးတယ်။ ရေးမကောင်းလို့၊ ရေးမဖြစ် လို့ မရေးတာလို့။
တစ်ခု ရှိတော့ရှိတယ်။ အမေအရင်း က ကိုယ့်သားသမီးအရင်းအပေါ်မှာ ဒါလောက်တောင် ဆိုးရသလား ဆို တာ ဒီသားသမီးရဲ့ အကုသိုလ်က ဘယ်လောက်တောင်မှ ကြီးခဲ့မှန်းမှ မသိတာ။ ၀ဋ်ခံရတာပါလို့။ သဘော ကတော့ အဲဒါပါပဲ။
စကားစပ်မိလို့ ရယ်စရာတစ်ခု ပြောရဦးမယ်။ ဆရာ့ဘ၀မှာ အမေအရင်းခေါက်ခေါက်က ဆရာ့အပေါ်မှာ ဆိုး ခဲ့တယ်။ ရက်စက်ခဲ့တယ်။ ဒါကြောင့် ဆရာ မိဘကံဆိုးခဲ့တယ်။ အခု ကြီးလာတော့ ဘာသိလာရ သလဲဆိုတော့ သားသမီးကံ လည်း မကောင်းပါဘူး။ ဆရာ နောက်တော့ ပြောပြပါ့မယ်"
" ဆရာ ၀တ္ထုတို နဲ့ ၀တ္ထုရှည်ကို ဘယ်လို ခွဲခြားရေးတယ်ဆိုတာ စာရေးချင်တဲ့သူများ သိနိုင်အောင် ခွဲခြား ပြောပြစေချင်ပါတယ် "
" ဘယ်လို ခွဲရေးသလဲဆိုတော့ ဆရာ့မှာ သီးခြားသဘော မရှိပါဘူး။ တော်တော်လေး အချိန်ယူပြီး ဖြေရမယ့် မေးခွန်းဖြစ်နေတယ်။ ၀တ္ထုရေးတဲ့နေရာမှာ ဆရာ့မူကို ပြောရရင် ၀တ္ထုတို၊ ၀တ္ထုရှည် ခွဲခြားပြီး ရေး တဲ့နေရာမှာ တိုတို နဲ့ လိုရင်း ရေးရင် ပြီးသွားနိုင်မယ့် နေရာတွေမှာ ဆရာ စာမျက်နှာ မဖြုန်းဘူး။ မဆိုင်တာ တွေ မထည့်တော့ဘူး။ ဒါနဲ့ ဒီလောက် လုံလောက်ပြီဆိုရင် ဒါ ၀တ္ထုတိုနဲ့ပဲ တော်တယ်။ အကျယ်ချဲ့ပြီး စာမျက်နှာ မဖြုန်းတော့ဘူး။
တစ်ခုခုကို စိတ်ကူးတည့်တဲ့အခါမှာ အကြောင်းတစ်စုံတစ်ခုကို အသေးစိတ် ဖော်ပြဖို့ လိုလာရင် ဒါ အရှည် ရေးမှ ဖြစ်မယ်။ သဘောအားဖြင့်တော့ ဒါ ဆရာ မှားချင်လည်း မှားလိမ့်မယ်။ ဆရာ့ အယူအဆကို ပြောတာ ပါ။ ဥပမာအားဖြင့် စုံထောက် ၀တ္ထုတစ်ပုဒ် ရေးတော့မယ်ဆိုရင် ၀တ္ထုကို ရေးလို့ မပြည့်စုံနိုင်ဘူး။ အရသာ မရှိနိုင်ဘူး။ လူသတ်သွားတယ်။ သဲလွန်စ ပျောက်နေတယ် ဒီသဲလွန်စကို ပိုက်စိပ်တိုက် ရှာဖို့ရာ ဆိုရင် ၀တ္ထု တိုနဲ့ မလုံလောက်ဘူး။ အဲဒီသဘောလေးပါတယ်။ စုံထောက် ၀တ္ထုကို ၀တ္ထုတို ရေးလို့ မပြည့်စုံ နိုင်သလို အချစ်ကိစ္စ၊ အိမ်ထောင်ရေးကိစ္စမှာလည်း ၀တ္ထုတိုနဲ့ မပြည့်စုံနိုင်တာတွေ ရှိတယ်။
တစ်ခါတလေ ကျတော့လည်း တိုတိုကလေးနဲ့ပဲ ဒိုင်းဆို ပြည့်စုံသွားတာတွေတော့ ရှိပါတယ်။ ဒါလောက်ဆိုရင် ရှင်းမယ် ထင်ပါတယ် "
" ခု နောက်ပိုင်းမှာ ဆရာ ၀တ္ထုရှည် မရေးတော့ဘဲ ၀တ္ထုတိုတွေပဲ ရေးနေတာ တွေ့ရပါတယ်။ ဘာဖြစ်လို့ ပါလဲ ဆရာ "
" ကျန်းမာရေးက သိပ်မကောင်းဘူး။ နောက်ပြီး စိတ်ကိုလည်း သိပ်အလုပ်မပေးချင်ဘူး။ အသက်ကလည်း ကြီး လာတော့ သားတွေ၊ မြေးတွေ ကိစ္စက ပိုရှုပ်လာတယ်။ ဟိုတုန်းက သား ငါးယောက် ရှိတယ်ထား။ သား ငါးယောက် ပြဿနာပဲ ရှိတယ်။ ခုတော့ ချွေးမတွေကို တံမြည်စည်းလှည်းနေရတာက ပိုပြီး အချိန် ကုန်တယ်။
တစ်ခါတလေကျတော့လည်း ရေးချင်တယ်။ တစ်ရက်လောက် ရေးလို့မပြီးခင်မှာ ပြဿနာတွေက ၀င်လာ ရော၊ ဆက်ရေးချင်စိတ် မရှိတော့ဘဲ ဒီအတိုင်း ထားလိုက်ရရော၊ အရှည်မပြောနဲ့ အတိုတောင်မှ သုံးလေး ပုဒ်လောက် လက်စ နဲ့ ပစ်ထားရတာတွေ ရှိတယ်။ သုံး လေးမျက်နှာ ရေးပြီး ပြဿနာဝင်လာလို့ ခေါက်ထား ရတာတွေပေါ့။
အခု ပေဖူးလွှာ၊ ရှုမ၀ စတဲ့ မဂ္ဂဇင်းတွေမှာ ရေးနေတာတွေက တစ်ရက်၊ နှစ်ရက်နဲ့ပြီးအောင် ရေးလိုက်နိုင် တာတွေပဲ။ ဟိုတစ်လောကတော့ ၀တ္ထုရှည်တစ်ပုဒ် ရေးလိုက်နိုင်တယ်။ မကြာခင် ထွက်လာပါလိမ့်မယ်။ အဲဒါ ရေးတုန်းကတော့ စိတ်လည်းဝင်စားတယ်။ စိတ်လည်း ပါတယ်။ နည်းနည်းလည်း နေကောင်း နေတော့ ရေးချလိုက်တာ လုံးချင်းဖြစ်သွားတယ် "
" ဘယ်လို နာမည်ပေးထားသလဲ ဆရာ "
" ဒီမျက်နှာလေးကို ချစ်တာ "
" သာဓု လူပါးဝတယ်မှာ ရေးခဲ့တာတွေဟာ ဆရာ့ကိုယ်တွေ့တွေချည်းပဲလား "
" အများဆုံး၊ အဲ ... ၉၅ ရာခိုင်နှုန်းလောက်က ကိုယ်တွေ့တွေချည်းပဲ။ ဒါမျိုးကျတော့လည်း ခက်သားပဲ။ ညီလေး တို့လည်း စဉ်းစားမိမှာပေါ့။ ကိုယ်တွေ့ မဟုတ်ဘဲနဲ့ တစ်ခုလုပ်ရေးကြည့်ရင် သဘာဝမကျဘူး။ ဒါကြောင့် ဆရာကတော့ ကိုယ်တွေ့ ကိုယ်ကိုယ်တိုင် သိလိုက်ရတာ၊ မြင်လိုက်ရတာ၊ ကြားလိုက်ရတာတွေ ပဲရေးချင်တယ်။
အခုလည်း "သာဓု လူဝါးဝတယ် ဒုတိယပိုင်း" ရေးနေတယ်။ ခေါင်းစဉ်ကတော့ "သာဓု လူဝါးဝတယ် ဒုတိယပိုင်း" တပ်ရမလား။ အမှတ်(၂) တပ်ရမလား မသေချာသေးဘူး။ ဆရာ့ ကိုယ်တွေ့တွေချည်း နည်းနည်း နည်းနည်း စုရေးထားတာပဲ။ အဲဒီထဲမှာ သူတောင်းစားကတောင် ဆရာ့ကို လူပါးဝသွားတာ ဆရာ ခံခဲ့ရတာပါ ထည့်ရေးထားတယ် "
" ကျေးဇူးပဲ ဆရာ။ စာရေးတာနဲ့ ပတ်သက်ပြီး နိုင်ငံခြားမဂ္ဂဇင်းတွေမှာ "How to Write" ဆိုပြီး စာရေးနည်း သင်တန်းတွေ ဖွင့်တာ တွေ့ရတယ် ဆရာ။ ၀တ္ထု၊ ဆောင်းပါး ကဗျာ ရေးနည်းအစုံပေါ့ ဆရာ။ ကျွန်တော် သိချင်တာက စာရေးတာ အပါအ၀င် အနုပညာလုပ်ငန်းတွေကို ဒီလို သင်ကြားပို့ချလို့ တတ်ကျွမ်း နိုင်ပါ့မလား ဆိုတာပါပဲ ဆရာ "
" ဒီကိစ္စနဲ့ ပတ်သက်ပြီး ဆရာတစ်ခု ပြောချင်တယ်။ သင်တန်း၊ သင်တန်းဆိုပြီး ဖွင့်ကြတာတွေဟာ တော် တော်လေး ပြဿနာရှိတယ်။ ၀တ္ထုရေးနည်း သင်တန်း၊ အနုပညာသင်တန်း၊ အက သင်တန်း၊ အဆိုသင်တန်း၊ အတီးသင်တန်း၊ ရုပ်ရှင်သရုပ်ဆောင် သင်တန်း ဘာညာ ဆိုတာတွေနဲ့ ပတ်သက်ပြီး ဆရာ နည်းနည်းကျယ်ကျယ်လေး ပြောချင်တယ်။
အနုပညာနဲ့ ပတ်သက်ပြီး သင်တန်းဖွင့်ကြတာတွေ ရှိတယ်။ အခု ကလေးတွေကို သူငယ်တန်းကစပြီး အသက်မွေးဝမ်းကျောင်းပညာ သင်ကြားပေးဖို့ ကျောင်းတွေ ဖွင့်ထားတယ်။ သူငယ်တန်းကနေ တက္ကသိုလ်ထိ စာသင်ပေးတယ်။ သင်တဲ့ ဆရာတွေက ဘယ်လိုလူတွေလဲ။ ဘွဲ့မရရင် သင်လို့ရမလား။ ကျောင်းဆရာ၊ ဆရာမ လုပ်ဖို့အတွက် လျှောက်လွှာတင်ကတည်းက ဘာဘွဲ့ရခဲ့ပါတယ် ဆိုတာ ပါရတယ်။ ဒီဘွဲ့နဲ့ လုံလောက်သလား၊ မလုံလောက်သေးဘူး။ ဆရာဖြစ်သင်ဆိုတာ ရှိသေးတယ်။
အနုပညာသင်တန်းတွေမှာ ဘယ်သူက သင်မှာလဲ၊ သင်တဲ့လူကကော ဘာဘွဲ့ရသလဲ။ အနုပညာနဲ့ ပတ်သက်လို့ ဘာအောင်ခဲ့သလဲ။ ဆရာ ပြောတာက စည်းကမ်းလေးရှိဖို့ လိုတယ် ဆိုတာပါ။ ရုပ်ရှင်ကောင် စီမှာ ဒါရိုက်တာသင်တန်း လုပ်မယ် ဆိုတုန်းက ဆရာ ကန့်ကွက်ခဲ့တယ်။ ဒါရိုက်တာတွေ ညံ့လို့ ကားတွေ ညံ့တဲ့ အတွက် ဒါရိုက်တာသင်တန်းဖွင့်မယ်ဆိုကြတယ်။ ဆရာက ပြောတယ်။ သင်မယ့် သူတွေက ဘယ်သူ တွေလဲ၊ သင်တဲ့သူတွေ ရိုက်ခဲ့တဲ့ ကားတွေကကော ဘယ်လောက် ကောင်းလို့လဲ၊ ကိုယ့်ဟာကိုယ် လည်း ပြန်စဉ်းစားပါ။ ဘာတွေ ပေးမယ်ဆိုရင် ခင်ဗျားတို့က ရုပ်ရှင်အနုပညာ တက္ကသိုလ်ကြီးလား၊ ပြဿနာ တွေ ရှုပ်လာမယ်။ ကားတစ်ကား ရိုက်တာ မကောင်းလို့ ရှုံးရင် သူ့ဟာသူ ရှုံးတာပဲ။ သူ အရှုံးခံ နိုင်လို့ လိုက်ရင် ရိုက်ပါစေ။
ရုံးဝန်ထမ်း လစ်လပ်လို့ ကြောငြာပြီး အလုပ်ခေါ်တယ်ဆိုပါတော့။ စည်းကမ်းကန့်သတ်ချက်တွေ ပါတယ်။ အချက်အလက်တွေထဲမှာ အောင်မြင်ခဲ့သော ဘွဲ့ဆိုတာ ပါတယ်။ အခု ဆရာတို့ ရုပ်ရှင်ရိုက်တဲ့နေရာမှာ အစိုးရက ဖလင်ထုတ်ပေးတယ်။ ဒါပေမဲ့ ဒါရိုက်တာသည် သင်တန်းအောင်ရမယ် ဆိုတဲ့ စည်းကမ်းချက် မပါဘူး။ အဲဒီလို ရှင်းနေတာကို ဘာကြောင့် သင်တန်းလုပ်ချင်ကြတာလဲ၊ ဆရာကတော့ ဒီအထဲမှာ မပါဘူး။
သင်တန်း ဆိုတာမျိုးက ဘယ်သူသင်သင် ရတာပဲ။ ဥပမာ ကျူရှင် ဆိုကြပါစို့။ အဖေက ကျူရှင် ထောင်တယ်။ သမီးတစ်ယောက်က ဆယ်တန်း၊ သားတစ်ယောက်က စိတ်ပညာပထမနှစ်။ ဒါပေမဲ့ အဖေ ဖွင့်တဲ့ ကျူရှင်မှာ ဆရာဝင်လုပ်လို့ ရကြတာပဲ။
အနုပညာ သင်တန်းတွေနဲ့ ပတ်သက်လို့ ဟိုတစ်လောကပဲ ဆရာ ဆောင်းပါးတစ်ပုဒ် ရေးလိုက် ပါသေးတယ်။ ရုပ်ရှင်ထဲက ကေသွယ်မိုးတို့၊ လှလှမိုးတို့လို ပရိသတ် မှတ်မိနေတဲ့ မင်းသမီးလေး တစ်ယောက် လောက်မှ ကိုယ်တိုင်လည်း မပါဖူးတဲ့ လူတစ်ယောက်က သရုပ်ဆောင်သင်တန်း ပေးမယ် ဆိုတော့ ရယ်စရာ ဖြစ် မနေဘူးလား။
ဆရာ ပြောတာက ဘွဲ့ရမှ ဒီသင်တန်းတွေ ပေးရမယ်လို့ ပြောတာ မဟုတ်ဘူး။ မလုပ်သင့်တာကို မလုပ်ပါနဲ့ လို့ ပြောတာပါ။ ဥပမာအားဖြင့် ဆရာမင်းသုဝဏ်တို့၊ ဆရာဇော်ဂျီတို့လို ထိတ်ထိတ်ကြဲ ပုဂ္ဂိုလ်ကြီး တွေကို ဆရာရယ် ကျွန်တော်တို့ ၀တ္ထုရေးနည်းသင်တန်း ဖွင့်မလို့ လာသင်ပေးပါ ဆိုရင် ဒီဆရာ ကြီးတွေ ခေါင်းခါမှာပဲ။ သူတို့ ကိုယ်တိုင်က လက်ခံမှာ မဟုတ်ဘူး။ ဆရာလည်း လက်မခံဘူး။ ပြောသာ ပြောတတ်တယ်။ ငါတော့ ဘယ်လို ရေးသွားတာပဲကွလို့။ ဒါပေမဲ့ သင်မပေးတတ်ဘူး။
ဒီဘက် ချုံစပ်ကနေ ဟိုဘက်ရောက်အောင် တောထဲကနေ ဖြတ်သွားတာ ငါတော့ ဒီလို ကွေ့ကောက် သွားတာပဲ လို့ ပြောပြတတ်မယ်။ တောင်ပေါ် တက်ရမယ့်ကိစ္စ ကြုံလာရင်တော့ ဆရာ ပြောပြတတ်မှာ မဟုတ်ဘူး။ ဆရာမှ တောင်ပေါ်မတက်ဖူးတာကိုး။ အဲဒီလိုရှိတယ်။ ဒီဥစ္စာက အင်မတန် ကျယ်ဝန်းတယ်။ လွယ်လည်း မလွယ်ပါဘူး။
အနုပညာကိစ္စက သင်ပေးလို့ မရဘူး။ အထူးသဖြင့် ၀တ္ထုရေးနည်းပေါ့။ ဆရာဝန် လုပ်ချင်ရင် သင်ပေးရတာ လွယ်တယ်။ အမှတ်ကောင်းအောင် ကြိုးစား၊ သူ့လိုင်းနဲ့သူ ၀င်လာရင် ဆေးကျောင်း ရောက်ပြီး ဆရာဝန် ဖြစ်လာမှာပဲ။စာရေးဆရာတစ်ယောက် ဖြစ်လာဖို့ကတော့ သေအောင် ရိုက်ပြီးသင် မရနိုင် ဘူး။ သူ့ပါရမီက ရှိသေးတယ်။
အခုတော့ ဘာသင်တန်းဟေ့ဆို တက်လိုက်ကြတာပဲ။ ငါးပွက်ရာ ငါးစာ ချနေကြတယ်။ သရုပ်ဆောင်သင် တန်း ဆိုပါတော့။ သရုပ်ဆောင်ဖို့ ၀ါသနာပါတာလား။ ဆွေဇင်ထိုက်တို့လို နာမည်ကြီးချင်လို့လား။ နာမည် ကြီးချင်လို့ ဆိုရင်တော့ ဒါ ၀ါသနာမဟုတ်တော့ဘူး။
စာရေးချင်တဲ့ သူတစ်ယောက် ကို သင်ပေးလို့ ရကိုမရနိုင်ဘူး။ ဘာဖြစ်လို့လဲဆိုတော့ ဆရာ ပြောပြမယ်။ သီချင်း ဆိုချင်တဲ့ သူတစ်ယောက်၊ ဆိုတာ ၀ါသနာပါတယ်။ ဆိုကြည့်စမ်းဆိုတော့ ဆိုကြည့်တယ်။ အသံ ကောင်းမှ၊ စည်းချက်ဝါးချက် နိုင်မှ၊ အသံ အနိမ့်အမြင့် နားလည်မှသာ ဖြစ်နိုင်မယ် မဟုတ်လား။ အေး ... စာရေးတာ နဲ့ ပတ်သက်ပြီး သင်လို့ရတာတစ်ခုတော့ ရှိတယ်။ ရည်းစားစာ ရေးနည်းတော့ သင်လို့ ရလိမ့်မယ်။ ၀တ္ထုရေးနည်းကတော့ ဘယ်နည်းနဲ့မှ မရနိုင်ဘူး။
အခု ဆရာ့သား တွေ စာရေးနေကြတယ်။ ဘယ်သူ့ကိုမှ ဆရာ သင်မပေးခဲ့ဘူး လေးယောက်ဟာ (၀ဏ္ဏ၊ သုမောင်၊ မင်းလူ၊ အာယု) ဖြစ်မလာဘဲ သာဓုဝမ်း၊ သာဓုထူး သာဓုသရီး၊ သာဓုဖိုးတွေသာ ဖြစ် လာလိမ့်မယ်။ ဆရာ့ရဲ့ သြဇာ ၀င်သွားမယ်။ ရေးပုံရေးနည်းအယူအဆတွေ သူတို့ ခေါင်းထဲဝင်သွားမယ်။ ဆရာက အဲဒါ မကြိုက်ဘူး။ လွတ်လွတ်လပ်လပ် လုပ်စေချင်တဲ့ ဆန္ဒရှိတယ် "
" ဆရာ့သား ငါးယောက်ထဲက လေးယောက်က စာရေးဆရာ ဖြစ်လာကြပြီ။ --ခြေရာကို နင်းလာကြတယ်၊ သူ့နည်းသူ့ဟန် နဲ့ အောင်မြင်မှု ရလာကြတယ်။ ဒီသားတွေရေးတဲ့ စာတွေအပေါ်မှာ ဆရာ ဘယ်လို မြင်ပါ သလဲ ဆရာ "
" စောစောက ပြောသလို ဆရာ့သားတွေကို စာရေးတာနဲ့ ပတ်သက်လို့ လုံးဝ သင်မပေးခဲ့ဘူး။ ကဗျာ ရေးတာတောင် မှ ကာရန်လွတ်နေတာ တွေ့ရင် ဒီလို ပြင်လို့ ပြင်မပေးခဲ့ဘူး။ ဟေ့ မင်းတို့ဟာက ကာရန် လွတ်နေတယ်၊ ပြန်ကြည့်ဦး။ ဒါလောက်ပဲ ပြောခဲ့တယ်။ သူ့ဟာသူ ပြင်ရတာပဲ။ သားတွေက အဖေ့ခြေရာ နင်းပြီး စာရေးလာကြတာ တွေ့ရတော့ကတော့ သာဓု ခြေရာနဲု့မိုင် ၂၀ လောက် ဝေးနေကြသေးတယ်။ မကြိုက်တာ တွေ အများကြီးပဲ။
တစ်ခါတလေ စာဖတ်ပရိသတ်၊ ရုပ်ရှင်ကြည့်ပရိတ်သတ်နဲ့ တွေ့ရင် ဆရာက တောင်းပန်ရတယ်။ ကျွန်တော့် သားတွေဗျာ၊ အပြောအဆို အပြုအမူ အနေအထိုင်များ တင်စီးသွားရင် သည်းခံပါလို့ တောင်းပန် ရတယ်။ ဒီကောင်တွေ အပြောအဆို သိပ်မတတ်ဘူး။ နောက်ပြီးတော့ လူမှုရေးနဲ့ ပတ်သက်ပြီး ဆရာ့ ကို မမီဘူး။ ပြောတာ ဆိုတာလေးတွေ ထောင့်မကျိုးတာလေးတွေ ရှိတယ်။ လူငယ်တွေနဲ့ကျတော့ ဟန်ကျလို့ "
" ရုပ်ရှင်ဘက် ဆက်လိုက်ကြရအောင် ဆရာ။ ဆရာ "ကကြီးရေ က" ရိုက်တော့မယ် ဆိုတော့ မရိုက်ခင်မှာ ရုပ်ရှင်ပညာ ကို ဘယ်သူ့ဆီမှာ ဆည်းပူးခဲ့ပါသလဲ "
" ဒီကား မရိုက်ခင်မှာ ဆရာ သင်္ဃန်းကျွန်းကခြံကို ၀ယ်လိုက်တယ်။ စတူဒီယိုတစ်ခု လုပ်ထားပြီး အပြင်က ကားတွေ လာရိုက်ပါလို့ ဖိတ်ခေါ်တယ်။ အဲဒီတုန်းက ဘီသုံးလုံး ကုမ္ပဏီက ဆရာ့ " တဇောက်ကန်း" ၀တ္ထုကို "ဗိုလ်မြဒင်" ဆိုပြီး ရုပ်ရှင်ရိုက်တယ်။ ထွန်းဝေနဲ့ပေါ့။ ဒီကားမှာ ထွန်းဝေ ပါဖို့လည်း ဆရာပဲ ရွေးခဲ့ တာပဲ။ ကုမ္ပဏီ ကတော့ နာမည်ကြီးမင်းသားနဲ့ ရိုက်ချင်တယ်။ ဆရာက မရဘူး။ ကျွန်တော့် "ဗိုလ်မြဒင်" မှာ မင်းသား က ဆံပင် အတွန့်အလိမ် အမောက်တွေနဲ့ဆိုရင် မဖြစ်ဘူးဆိုလို့ ဆရာ ကြိုက်တဲ့လူကို ရွေးပါ လို့ ပြောတယ်။
အဲဒီတုန်းက ထွန်းဝေက ဗြိတိသျှဘားများမှာ ဆိုက်ပတ်ပဲ ရှိသေးတယ်။ တစ်ခါ တလေ လူကြမ်း လုပ်ရတယ်။ ဒီကောင် မဆိုးဘူးဆိုပြီး ခေါ်သုံးတာပဲ။ အဲဒါနဲ့ ဗိုလ်မြဒင်၊ နောက်အသက်၊ နောက် လေး ငါးကားပါပဲ။ ဆရာ့ခြံထဲတင် လာရိုက်တော့ ဆရာ ထွေထွေထူးထူး ဝေးဝေးလံလံ သွားစရာ မလိုတော့ဘဲ လေ့လာ နိုင်ခွင့် ရခဲ့တာပဲ။
သူများရိုက်တာ၊ လုပ်တာကိုင်တာ ကြည့်ပြီးတော့ "ကကြီးရေ က"ကို စရိုက်တာပဲ။ တစ်ခုတော့ ရှိတယ်။ ဆရာ့ အနေ နဲ့ သဘောတရားလေးတွေ၊ ကင်မရာ ထောင်တာ ဘာညာတို့ကိုတော့ သူတို့ဆီက လေ့လာ ရတာပေါ့။ အဓိက အနှစ်သာရကိုတော့ ဘယ်သူ့ကိုမှ မကြည့်ဘူး။ ဘယ်သူ့ကိုမှလဲ မလေ့လာဘူး။ ရောသွားမျာစိုးလို့ပါ။ ဇာတ်ကားတစ်ကားကို ကိုယ် ဘယ်လို ကြည့်ချင်သလဲ၊ အဲဒီလို ရိုက်တာပဲ။
ဆရာ " ကကြီးရေ က"ရိုက်တဲ့ခေတ်မှာ ခေါင်းစီးစာတန်းကို လေး ငါးရာ အကုန်ခံပြီး ပန်းချီစာလုံးတွေ ဘာတွေနဲ့ ရေးနေကြတဲ့အချိန်၊ ဆရာ ဘာလုပ်လိုက်သလဲ ဆိုတော့ ပုဇွန်တောင်ကျောင်းက ကျောက်သင် ပုန်း တစ်ချပ် သွားငှားပြီး မောင်ဝဏ္ဏကို ခေါင်းစီးစာတန်းတွေ ရေးခိုင်းတာပဲ။ ရုပ်ရှင်ဆိုတာ နေရာတကာ မှာ အလှအပ သိပ်မလိုပါဘူး။ သူများထက် နည်းနည်းထူးခြားရတယ်။ အဓိပ္ပာယ် ရှိရမယ် ဒါပဲ "
" ကကြီးရေ က ရိုက်တာက "
" ၁၉၅၉ ခုနှစ် "
" ဒီကားအတွက် ဆရာ က ဒါရိုက်တာဆု၊ ဦးထွန်းဝေ က မင်းသားဆု၊ မြတ်မွန် က မင်းသမီးဆု၊ ဒေါ်ခင်ညွန့် က ဇာတ်ရံဆု အကယ်ဒမီတွေ ရခဲ့ကြတယ်။ ဘာကြောင့် ဒီလို အောင်မြင်သွားတယ်လို့ ယူဆပါ သလဲ "
" အလုပ်နဲ့ စေတနာကြောင့် အောင်မြင်တာပါ၊ မင်းသမီး မြတ်မွန်ဆိုရင် တစ်နှစ်လောက် ကြာအောင် သင်ခဲ့ ရတယ်။ မင်းသမီးသစ် ရှာတော့ ကျောင်းဆရာမတစ်ယောက်က ကောင်မလေးတစ်ယောက် သိပ် တော်တာ ရှိတယ်။ ဦးသာဓု စမ်းကြည့်ပါလားလို့ ခေါ်သွားတယ်။ နာရီဝက်လောက် စကားပြောကြည့် ပြီး ကတည်းက ဒီကောင်မလေး မင်းသမီး ဖြစ်တော့မယ်ဆိုတာ သိသွားတယ်။
ကောင်မလေး က ဆင်းရဲတော့ ခြံထဲမှာ အိမ်ကလေးတစ်လုံး ဆောက်ပေးပြီး ခေါ်ထားတယ်။ ခြံထဲကပဲ ကျောင်း ဆက်တက်ခိုင်းရတယ်။ အားတဲ့အချိန်မှာ သဘောတရားကအစ သင်ပေးတယ်။ ဆရာ ပြောတဲ့ အတိုင်း လုပ်နိုင်ရင်၊ လေ့လာနိုင်ရင် အကယ်ဒမီ ရမယ်လို့ ပြောခဲ့တယ်။ ကောင်မလေးက ဆယ့်ငါးနှစ်၊ ဆယ့်ခြောက်နှစ် လောက်သာ ရှိသေးတော့ နားမလည်ဘူး။ သူက ပြောတယ်။ ဆရာရယ် ခုပဲ စရိုက်၊ ခုပဲ အကယ်ဒမီ ရနိုင်ပါ့မလားတဲ့။ ဟဲ့ အကယ်ဒမီ ပေးတယ်ဆိုတာ မင်းသမီး အသက် ဘယ်လောက် ရှိရမယ်လို့ ကန့်သတ်ထားတာ မဟုတ်ဘူးလို့ ပြောရတယ်။ အခု ကောင်း၊ အခုပေးတာပဲ။ နင် ဒါတွေမပူနဲ့၊ ငါ ပြောတဲ့ အတိုင်းသာလုပ် ဆိုပြီး ခိုင်းရတယ်။
ဆရာကလည်း ဖလင်တွေ တော်တော် ဖြုန်းခဲ့တာပဲ။ မကြိုက် ပြန်ရိုက်၊ မကောင်းပြန်ရိုက် အဲဒီလို အလုပ် နဲ့ ကြိုးစားခဲ့တယ်။ ရုပ်ရှင်လောကမှာ သဘာဝကျကျနဲ့ ထူးထူးခြားခြား ထွက်လာနိုင်အောင် ကြိုးစား ခဲ့တယ်။ ဘာကြောင့် ကြိုးစားတာလဲဆိုတော့ အဲဒီအချိန်က စာပေနယ်မှာ " သာဓု" ဆိုတာ ထိတ်ထိတ်ကြဲ ဖြစ်နေ တဲ့ အချိန်။ အဲဒီလို ထိတ်ထိတ်ကြဲ ဖြစ်နေတဲ့အချိန်။ အဲဒီလို ထိတ်ထိတ်ကြဲတဲ့ သာဓု ရုပ်ရှင် ရိုက်ရာမှာလည်း သူများအောက်ကမနေဘူးဆိုပြီး ကြိုးစားခဲ့တာပဲ။ အဲဒါကြောင့် အကယ်ဒမီတွေ ရခဲ့ ကြတယ်။ မြတ်မွန် အကယ်ဒမီ ရတာကတော့ သူ့ရဲ့ ကြိုးစားမှု၊ ဆရာက ပြင်းပြင်းထန်ထန် သင်ပေးမှု တွေကြောင့် ရခဲ့တာ။`
ဆက်ရန်
Credit:shwezinu.blogspot.com
Comments
Post a Comment