ဝင်းငြိမ်း နှင့် စာရေးဆရာများ အပိုင်း (၃၇)

 

ဝင်းငြိမ်း နှင့် စာရေးဆရာများ အပိုင်း (၃၇)

ဧရာဝတီမြစ်ရေ စီးဆင်းနေသမျှ
ထီလာစစ်သူ

           ယခုလ တွေ့ဆုံခန်းကိုတော့ နိုင်ငံတော်ရဲ့ တာဝန်ကို တစ်ဖက်က တစ်ရွက်တစ်ပိုး ထမ်းဆောင် နေ လျက်က တစ်ဖက်ကလည်း စာပေတာဝန်ကို မလစ်ဟင်းရအောင် စဉ်ဆက်မပြတ် သယ်ပိုးလာခဲ့တဲ့ တပ်မတော်သား တစ်ယောက် ဖြစ်ခဲ့ပြီး ကြေးမုံသတင်းစာတိုက်တွင် သတင်းစာ တာဝန်များကို ထမ်းဆောင် ခဲ့ကာ ယခုအခါ အနုပညာဦးစီးဌာနတွင် ယဉ်ကျေးမှုတာဝန်များ ထမ်းဆောင်နေသူ ကဗျာဆရာ၊ ၀တ္ထုရေးဆရာ၊ သတင်းစာ ဆရာတစ်ဦးဖြစ်တဲ့ "ထီလာစစ်သူ" ရဲ့ အတွေးအခေါ် ယူဆချက် တို့ကို တင်ပြပေးဖို့ စာတည်းအဖွဲ့က တာဝန်ပေးလိုက်ပါတယ်။

ဆရာထီလာစစ်သူ ရေးခဲ့တဲ့ ၀တ္ထုတွေထဲမှာ "စီးဆင်းရစ်လေဦး ဧရာဝတီ" ၀တ္ထုက ဆရာ့စာပေမှတ်တိုင်ကို စိုက်ထူစေနိုင်ခဲ့ပြီး "မဲခေါင်မြစ်မှ အိုရွက်ဝါနှင့် အခြားကဗျာများကို ကဗျာစာအုပ်အတွက် စာပေဗိမာန် ကဗျာ စာပေဆု ရစေခဲ့ပါတယ်။ တပ်မတော်တာဝန်၊ နိုင်ငံတာဝန်တွေ ထမ်းဆောင်နေရင်းက စာချစ်သူပီပီ စာတွေ၊ ကဗျာတွေ ရေးနေဆဲဖြစ်တဲ့ ဆရာထီလာစစ်သူကို မအားမလပ်တဲ့ကြားကပဲ အချိန်လုပြီး မေးမြန်းခဲ့ ရပါတယ်။

" ထီလာစစ်သူဆိုတဲ့ ကလောင်နာမည် ခံယူတဲ့ ဆရာ့ ရည်ရွယ်ချက်ကို သိပါရစေ ခင်ဗျာ "
" ထီလာစစ်သူ ကလောင်အမည် ခံယူခဲ့တာ ရည်ရွယ်ချက် ရှိပါတယ်။ စစ်သူဆိုတာ စစ်မှန်မှုကို ယုံကြည်သူ လို့လည်း အဓိပ္ပာယ်ရပါတယ်။ စစ်သူကြီးလို့လည်း အဓိပ္ပာယ်ယူခဲ့ပါတယ်။ ထီလာကတော့ မွေး ရပ်မြေဖြစ်တဲ့ မိတ္ထီလာမြို့ကို ဂုဏ်ပြုတဲ့အနေနဲ့ ကလောင်အမည်မှာ ဒေသအမည် ထည့်သွင်းတဲ့ သဘော ဖြစ်ပါတယ်"
" ဆရာ စာပေနယ်ထဲ ရောက်လာပုံက "
" ကျွန်တော် စာပေလောကထဲ ၀င်ရောက်လာရတာကတော့ မိဘရဲ့ ဆုံးမသွန်သင်ပဲ့ပြင်မှုကြောင့် ဖြစ် ပါတယ်။

စာပေလောကထဲ မရောက်မီ စာရေးလိုတဲ့ ဗီဇ၊ စာဆိုလိုတဲ့ ဗီဇကို အမေနဲ့ အဖေ့ထံက ရပါတယ်။ အမေ က မဲဇာတောင်ခြေရတုကို နှုတ်တိုက်သင်ပေးပါတယ်။ ငါးနှစ် ခြောက်နှစ်သားလောက်က ဆိုပါတော့။ အဖေ က တေးထပ်တွေ၊ ဒွေးချိုးတွေ၊ လေးချိုးတွေကို နှုတ်တိုက်သင်ပေးပါတယ်။
အမေ က ကျွန်တော် ငယ်စဉ် စာရေးဆရာမကြီး ခင်မျိုးချစ် ဘာသာပြန်တဲ့ အင်္ဂလိပ်ကဗျာဆရာ "သောမတ်စ်ဂရေး"ရဲ့ လွမ်းချင်းတစ်ပုဒ်ကို သင်ပေးဖူးပါတယ်။ ကဗျာ သုံးပိုဒ် ဖြစ်ပါတယ်။ ပထမတစ်ပိုဒ်ပဲ အခု ရပါတော့တယ်။

အဲဒီကဗျာက -
" တစ်နေကုန်ညောင်း၊ ညနေစောင်းသော်၊ ခေါင်းလောင်းသံခြွေ၊ ၀င်သည့်နေကို၊ ဖော်ရွှေပျူငှာ၊ နှုတ်ခွန်းသာခဲ့၊ လယ်ယာကုန်းဆင်း၊ နွားသွင်းဓလေ့၊ ရွာဝင်ကွေ့၏။ တစ်နေ့လုံးဖား၊ လယ်သမားလမ်း၊ ရှည် လျားရွာလမ်း၊ အိမ်ဆီတန်း၍၊ ပင်ပန်းလှိုက်ဖို၊ ရောက်လိုစိတ်သာ၊ စောမိရှာလိမ့်၊ ဆည်းဆာညချမ်း၊ မှောင်ငွေ့လွှမ်းသော်၊ ရော်ရမ်းအပြီး၊ ထွေထွေညီးသည်၊ အထီး ကျွန်သာ ကျန်တော့သည်။
ကျန်တဲ့ နှစ်ပိုဒ်ကတော့ အချို့ပါဒတွေ မေ့နေလို့ မပြောတော့ပါဘူး။ ပြီးတော့ ဖေဖေဟာ ကျောင်းဆရာ ဆိုတော့ စာပေလောကထဲကို ၀င်ဖို့ ကြိုးပမ်းခဲ့တဲ့ သူ ဖြစ်ပါတယ်။ သူ ရေးခဲ့တဲ့ ဆောင်းပါးတွေ၊ ၀တ္ထုတို လေးတွေ လက်ရေးမူ အများအပြား ဖတ်ရပါတယ်။ ဖေဖေဟာ ခေတ်စမ်းအရေး အသားကို အလွန် နှစ်သက် သဘောကျတာ မှတ်မိပါတယ်။

စာပေလောကထဲကို ၁၉၄၇ ခုနှစ်ကစပြီး ကျွန်တော် ၀င်ရောက်တယ်လို့ ဆိုရပါလိမ့်မယ်။ ဗိုလ်ချုပ်အောင်ဆန်း နဲ့ အာဇာနည်ခေါင်းဆောင်ကြီးများ လုပ်ကြံခံရတဲ့လမှာ မိတ္ထီလာမြို့ အမျိုးသား အထက်တန်း ကျောင်းမှာ ထုတ်ဝေတဲ့ နံရံကပ်စာစောင်မှာ "တို့ ဗိုလ်ချုပ်" ဆိုတဲ့ လေးလုံးစပ်ကဗျာ လင်္ကာတစ်ပုဒ် စတင်ဖော်ပြခြင်း ခံရပါတယ်။ နောက်နှစ်ကျတော့ ကျောင်းသားသမဂ္ဂ အလုပ် အမှုဆောင် ထဲ ပါလာပြီး နံရံကပ်စာစောင်မှာ အဖွဲ့ဝင်အဖြစ် တာဝန်ယူ လုပ်လာပါတယ်။ The Highway Man ကဗျာကို ဘာသာပြန်ပြီး နံရံကပ် စာစောင်မှာ ဖော်ပြခဲ့ပါတယ်။ ၁၉၄၉ ခုနှစ်မှာ သတင်းစုံ ဂျာနယ်ကို ၀တ္ထုတိုနဲ့ ကဗျာတွေ စတင်ပို့ခဲ့ပါတယ်။ တိုင်းရင်းမေ ဂျာနယ်ကိုလည်း ကဗျာတွေ စတင်ပို့ခဲ့ပါတယ်။

ပို့တဲ့အခါတိုင်း လိုလို ပုံနှိပ်ဖော်ပြခြင်းခံရပါတယ်။ အဲဒီနောက်တော့ ကလောင်စုံမဂ္ဂဇင်း၊ တိုင်းသစ်ဂျာနယ်၊ ရှုမ၀မဂ္ဂဇင်း၊ မြ၀တီ မဂ္ဂဇင်းတို့မှာ ဆက်တိုက် စာတွေ ရေးလာခဲ့ပါတယ်။ န၀ဒေးကြီးနဲ့ နတ်သျှင်နောင်ရဲ့ ရတု တွေကို အလွန်စွဲလမ်းခဲ့ပါတယ် "

" တပ်မတော် တာဝန်ထမ်းဆောင်နေရင်းက ဆရာ စာရေးနေတာဆိုတော့ တာဝန်ချိန်မှာကော စာရေးချင် တဲ့ အတွေး မပေါက်ခဲ့ဘူးလား၊ ရေးကော ရေးဖြစ်ခဲပါသလား"
" ကျွန်တော် စာပေလောကထဲ ၀င်ရောက်စဉ်က တပ်မတော်ထဲ မရောက်သေးပါဘူး။ ဒါပေမဲ့ စာပေ လောက ထဲကို ၀င်ရောက်ပြီးတာနဲ့ တပ်မတော်ထဲကိုလည်း မရှေးမနှောင်းဘဲ ရောက်လာတယ်လို့တော့ ဆို နိုင်ပါတယ်။ ၁၉၄၉ ခုနှစ်မှာ ကရင် သောင်းကျန်းသူတွေကို ကျောင်းသားရဲခေါင်တပ်ဖွဲ့ဝင်အဖြစ်နဲ့ လက်နက် စွဲကိုင် တိုက်ခိုက်နေပါပြီ။ စစ်ဆင်ရေးတာဝန်တွေ ထမ်းဆောင်နေချိန်မှာ စာရေးချင်စိတ် ပေါ်တဲ့ အခါ ရှိပါတယ်။ ပေါ်သမျှ စိတ်ကူးစိတ်သန်းတွေကို ရသမျှ အချိန်ကလေးမှာ ဒိုင်ယာရီနဲ့ မှတ်သားပြီး တေး ထားပါတယ်။ စစ်ဆင်ရေးတာဝန်ပြီးလို့ တပ်ပြန်ပြီးနားတဲ့ အချိန်ပိုင်းကျမှ ရေးဖြစ်ခဲ့ ပါတယ်။ တိုက်ပွဲ ဖြစ်နေ တုန်းမှာ စာရေးလို့လည်း မရပါဘူး။ တိုက်ပွဲတွေ ဖြစ်နေတဲ့အချိန်မှာ ကျွန်တော့်ရဲ့ အသက် ကို သေမင်းထံ အပ်နှံပြီး တိုင်းပြည်အတွက် အသက်စွန့် တိုက်ခိုက်နေပါတယ်။ အဲဒီအချိန်မှာ ကျွန်တော် ဟာ တိုက်ပွဲ တွေ အောင်မြင်မှုတစ်ခုတည်းသာ စိတ်ထဲမှာ ရှိပါတယ်"

" ဆရာက ၀တ္ထုလည်း ရေးတယ်၊ ကဗျာလည်း ရေးတယ်ဆိုတော့ ၀တ္ထုနဲ့ ကဗျာဘယ်ဟာကို ပိုပြီး အရေး သန် ပါသလဲ "
" အတိအကျတော့ မဖြေတတ်ပါဘူး။ ကဗျာ အရေးများပေမယ့်၊ ကဗျာ အရေးသန်ပေမယ့် ၀တ္ထုတို၊ ၀တ္ထုရှည် ရေးတာကိုလည်း စိတ်ထဲမှာ အလွန်စွဲလမ်းပါတယ်။ ကဗျာစာအုပ်တွေ ရှစ်အုပ်၊ ကိုးအုပ် ထွက်ပြီး ခဲ့သလို ၀တ္ထုလုံးချင်းတွေလည်း ရှစ်အုပ်၊ ကပိုးအုပ် ထွက်နိုင်ခဲ့ပါတယ်။ ၀တ္ထုတွေ ဆက်ရေးဖို့ လည်း ခေါင်းထဲမှာ အမြဲတမ်း စိတ်ကူးစိတ်သန်းတွေ ရှိနေပါတယ်"
" ခံစားချက်တစ်ခုကို ၀တ္ထုပုံစံနဲ့ ရေးပြတာနဲ့ ကဗျာအဖြစ် ရေးပြရတာ ဘယ်ဟာက ပိုပြီး ထိရောက်မယ် ထင်ပါသလဲ ဆရာ"

" ခံစားချက်တစ်ခုကို ကဗျာနဲ့ ရေးပြီး တင်ပြရတာကတော့ စကားလုံးအရာမှာ ကျစ်ကျစ်လျစ်လျစ်နဲ့ ခိုင်ခိုင် မာမာ ခံ့ခံ့ညားညား ရသ ပြည့်ပြည့်၀၀ ထိထိရောက်ရောက် ရှိလှပါတယ်။ ၀တ္ထုရေးပြီး တင်ပြရတာ ကတော့ စကားပြေအရာမှာ ကျယ်ကျယ်ပြန့်ပြန့်၊ ရှည်ရှည်လျားလျားနဲ့ စာပေသရုပ်ဖော်ပြီး ပြင်းပြင်းထန်ထန် အားရ ပါးရ ရှိလှတယ်လို့ ဆိုနိုင်ပါတယ်။ ဒါပေမဲ့ ထိရောက်တာကတော့ တစ်မျိုးစီပါပဲ။ ဘယ်ဟာက ပိုပြီးထိရောက် တယ်လို့ မဆိုနိုင်ပါဘူး။ စာပေအနုပညာစွမ်းအားက သူ့နည်းနဲ့သူ ကြီးမားပြင်းထန်ပြီး ထက်မြက်စူးရှလှပါ တယ်။ ကမ္ဘာ့ဂန္ထ၀င်ဖြစ်တဲ့ ကဗျာကြီးတွေနဲ့ ၀တ္ထုကြီးတွေကို နှိုင်းယှဉ်ကြည့်ရင် ကောင်းကောင်းကြီး သိနိုင်ပါ တယ်။ ဂန္ထ၀င်ကဗျာကြီးတွေက ဘာနဲ့ တူသလဲဆိုတော့ ကမ္ဘာမြေကြီး တွေနဲ့ တူပါတယ်။ ဂန္ထ၀င်ဝတ္ထုကြီးတွေကတော့ မဟာသမုဒ္ဒရာကြီးတွေနဲ့ တူတယ်လို့ ဥပမာ ပေးချင်ပါတယ်"
" ကဗျာ ဆိုတာ ရင်ဖွင့်ရုံသက်သက်ပါလား ဆရာ။ ကဗျာမှာ တာဝန်တို့၊ ရည်ရွယ်ချက်တို့ ရှိပါသလား"

" ကဗျာဟာ စာပေယဉ်ကျေးမှု ပစ္စည်းတစ်ခု ဖြစ်ပါတယ်။ စာပေယဉ်ကျေးမှုဟာ ပြည်သူတို့ရဲ့ အမွေနှစ် ရတနာ ဖြစ်ပါတယ်။ သည်တော့ ကဗျာရဲ့ အဆင့်အတန်း၊ ကဗျာရဲ့ တန်ဖိုးကို ကိုဝင်းငြိမ်း ခန့်မှန်း သိရှိနိုင်မယ်လို့ ယုံကြည်ပါတယ်။ ကဗျာကို တကယ်တမ်း နေ့ရော ညပါ ကဗျာဆရာအဖြစ် စာဆိုအဖြစ် နှစ်ပေါင်း များစွာ၊ ကဗျာပေါင်းများစွာ ရေးသားလာပြီဆိုရင် အဲဒီကဗျာထုထည်ပစ္စည်းကြီးဟာ ကဗျာရေးသူ ရဲ့ ထုတ်လုပ်လိုက်တဲ့ စာပေယဉ်ကျေးမှု ပစ္စည်းတွေ ဖြစ်လာပြီလေ။ အဲဒီပစ္စည်းတွေကို တန်ဖိုး ရှိအောင် လုပ်မလား၊ တန်ဖိုးမဲ့အောင် လုပ်မလား။ တန်ဖိုး ရှိ၊ မရှိ အကဲဖြတ်တဲ့နေရာမှာ၊ ဝေဖန် သုံးသပ် တဲ့ နေရာမှာ ရည်ရွယ်ချက်ကောင်း မကောင်း ဆိုတာ ပေါ်လာလိမ့်မယ်။ ရည်ရွယ်ချက် မကောင်းရင် သူ့မှာ တာဝန်ရှိတယ်။ ကောင်းရင်လည်း တာဝန်ရှိလာတယ်။
အဲဒီတော့ ကဗျာရေးတဲ့နေရာမှာ ပေါ့ပေါ့ဆဆလုပ်ရင် တူသော အကျိုးကျေးဇူး ခံစားရမှာပါ။ လေးလေး နက်နက် လုပ်ရင် တူသော အကျိုးကျေးဇူး ခံစားရမှာပဲ။ ဒါတွေဟာ အားလုံး ဆက်စပ်နေပါတယ်။ ဒါကြောင့် ကဗျာမှာ ရည်ရွယ်ချက် ရှိတယ်၊ တာဝန်ရှိတယ်လို့ ကျွန်တော် အမြင်ရှိပါတယ်။

ဆက်ပြောရရင် မိမိ၏ ကဗျာ၊ ၀တ္ထု၊ ပြဇာတ်ကြောင့် စာဖတ်သူ ပြည်သူလူထုကို အဆိပ်အတောက် မဖြစ်စေသင့်ပါဘူး။ စေတနာဖြင့် အကျိုးပြုစာပေသာ ဖြစ်သင့်ပါတယ်။ တာဝန်မဲ့ ရေးပါက အဲဒီစာပေဟာ ပြည်သူအား အကျိုးမပြုဘဲ အဆိပ်အတောက် ဖြစ်စေတဲ့အတွက် မကောင်းပါ။ မျက်မှောက်မှာရော၊ အနာဂတ် မှာရော စာရေးသူဟာ တရားခံ ဖြစ်သွားမှာပါပဲ။ ဥပမာ ၁၉၅၀-၁၉၆၀ ပြည့်နှစ် ဆယ်စုနှစ် အတွင်း မှာ စာရေးဆရာ အချို့က အချို့ဝတ္ထုတွေမှာ တက္ကသိုလ်ပညာရေး မကောင်းကြောင်း၊ ပညာတတ်တွေကို ရှုတ်ချတဲ့အကြောင်း၊ လမ်းဘေးက ပါမောက္ခ ဆိုတာမျိုးတွေ ရေးခဲ့တော့ စာဖတ်သူ လူငယ်အချို့ဟာ တက္ကသိုလ် ပညာရေးကို ဆုံးခန်းတိုင်အောင် မသင်ကြတော့ဘူး။ ပညာရေး တစ်ပိုင်းတစ်စနဲ့ ဘ၀မှာ နစ်နာ ဆုံးရှုံးကြရတာတွေ မြင်ခဲ့ရပါတယ်။ အဲဒီ ၀တ္ထုအချို့ရဲ့ စာပေသြဇာ လွှမ်းမိုးမှုဒဏ် ကို ယနေ့အထိ ခံနေကြရ ဆဲပါပဲ။ မဲခေါင်မြစ်မှ အိုရွက်ဝါနှင့် အခြားကဗျာများ စာအုပ်ထဲက စာပေအပေါ် မှာ ကျွန်တော်ရဲ့ ယုံကြည်ချက်၊ ခံယူချက်ကို ဖော်ပြထားတဲ့ ကဗျာတစ်ပုဒ်ကို ဒီနေရာမှာ ပြောပြ ချင်ပါတယ်။ အဲဒီကဗျာရဲ့ အမည်က အနုပညာသည်၏ ပူပန်ခြင်းကဗျာ ဖြစ်ပါတယ်။

(၁)
ရွယ်လူးပျိုမျစ်၊ မျက်ကန်းချစ်ဖြင့်
နစ်မူးနေဆဲ၊ ချစ်သူကွဲ၍
သည်းထဲနာကျင်၊ ဆတ်ဆတ်ပင်တည့်
နေ လျှင် မပူ၊ လ မူမအေး
လွမ်းဆွေးမှိုင်းမှုန်၊ အတွေ့ကြုံလည်း
မတုန်လှုပ်နိုင်ခဲ့စေလေသေး။
(၂)
နိုင်ငံတော်တွက်၊ ရှေ့သို့တက်စဉ်
ကြောက်မက်ဖွယ်တည့်၊ ကြမ္မာပိကြောင့်
အသိလွတ်ဆဲ၊ ဦးခေါင်းကွဲလျက်
နှစ်ဖက်လက်ရိုး၊ ပိုင်းပိုင်းကျိုး၍
မေ့မြောသွေးလွန်၊ တမလွန်တွင်း
သေမင်းတံခါး၊ ရောက်ခဲ့ငြားလည်း
ငါ့အား မတုန်လှုပ်နိုင်စေလေသေး။
(၃)
စာပေလင်္ကာ၊ ယုံကြည်ရာကြောင့်
ရေးလှာစောင်စောင်၊ လက်စွမ်းပြောင်လည်း
ကလောင်တိမ်းမှား၊ မာန်ထောင်လွှား၍
ရွေ့လျားနောင်ခေတ်၊ အဆိပ်ဖြစ်က
ဖွင့်လှစ်ပြောဆို၊ အပြစ်ကိုလျှင်
ရင်ဖိုတုန်လှုပ်၊ ချွေးတုတ်တုတ်ကျ
ပူပန်ရသည်၊ မျက်ရည်လည်လျက်
ဤအချက်လျှင်၊ ငရဲထင်မိ
စိတ်တွင်သံဝေငြိတကား။     ။

ဤကဗျာကို ၁၉၅၃ ခုနှစ်ခန့် ရေးခဲ့တယ် ထင်ပါတယ်။

ကဗျာနဲ့ ပတ်သက်လို့ ပြည်သူ့အတွက် မဖြစ်စေဘဲ အလွမ်း၊ အဆွေး၊ အချစ်ချည်း သက်သက် ရေးခဲ့တဲ့ မြန်မာစာပေ ခေတ်တစ်ခေတ်၊ မြန်မာဘုရင် အုပ်စိုးတဲ့ ခေတ်တစ်ခေတ်၊ မြန်မာစာပေသမိုင်းမှာ ကြီးထွားခဲ့လို့ မျိုးချစ်စိတ် မျိုးချစ်အားမာန်တွေ ကျဆင်းစေခဲ့တဲ့အကြောင်း စာပေပညာရှင် သုတေသီ ပုဂ္ဂိုလ်ကြီးများက ထောက်ပြတာ ကျွန်တော် ဖတ်ဖူး၊ မှတ်ဖူးပါတယ်။ ဒါတွေကို ပြန်လေ့လာသင့်ပါတယ်။ နယ်ချဲ့ ကိုလိုနီခေတ်မှာ ဆရာကြီး သခင်ကိုယ်တော်မှိုင်းရဲ့ နယ်ချဲ့ဆန့်ကျင်ရေး လေးချိုးကြီးတွေ၊ ဦးကျော်လှရဲ့ နယ်ချဲ့ဆန့်ကျင်ရေး သံချိုတွေ၊ ဆီးဘန်နီ ဆရာတော်ကြီးရဲ့ ရတုတွေ၊ အခြားမျိုးချစ်ကဗျာ ဆရာကြီးတွေရဲ့ ကဗျာတွေဟာ နယ်ချဲ့ဆန့်ကျင်ရေး၊ ဖက်ဆစ်တော်လှန်ရေး၊ ပြည်သူ့လွတ်မြောက်ရေး အရေးတော်ပုံကြီးတွေကို တစ်တပ်တစ်အား အထောက်အကူ ဖြစ်ကြောင်း ဘယ်သူမှ မငြင်းနိုင်ပါဘူး။ ဒီ အချက်တွေကို ကြည့်ရင် ကဗျာ ရေးရာမှာ ရည်ရွယ်ချက်ရှိပါတယ်။

ကဗျာမှာ တာဝန်ရှိပါတယ်။ တိုင်းပြည် ကြီးပွားတိုးတက်အောင် ကဗျာက တစ်ဖက်တစ်လမ်းက တစ်တပ်တစ်အား စွမ်းဆောင်နိုင်ပါတယ်ဗျာ။ ကဗျာကောင်းအောင်၊ ရသမြောက်အောင် ရေးစွမ်း နိုင်ခြင်း က အတတ်ပညာ ထူးချွန်မှု၊ သို့မဟုတ် ပါရမီ ကောင်းလို့ပါလို့ ဆိုနိုင်ပါတယ်။ အဲဒီလို ကဗျာအရာမှာ ထူးချွန်ပြီး တိုင်းပြည်ကို ချစ်သော စာပေ၊ ပြည်သူကို အကျိုးပြုသော စာပေတွေ စေတနာနဲ့ ထပ်ဆင့်ပြီး ကြိုးပမ်းဖို့ အထူးအရေးကြီးပါတယ်။ ရှုမ၀မဂ္ဂဇင်းမှာ ကျွန်တော် ပြည်သူတို့ဘက်မှ ရပ်တည်သော ကဗျာ များ ဆောင်းပါး ကို လေးလ ဆက်တိုက် ဖော်ပြခဲ့တာကို နမူနာအဖြစ် ပြောပြလိုပါတယ် "
" ကာရန်မဲ့ကဗျာနဲ့ ပတ်သက်လို့ ဆရာ ဘယ်လို ယူဆပါသလဲ "

" ကာရန်မဲ့ကဗျာဟာ ကဗျာဖွဲ့ဆိုပုံ ပုံစံသစ်၊ ပုံသဏ္ဍာန်အသစ် စမ်းသပ်တယ်လို့ ယူဆပါတယ်။ ကာရန်မဲ့ ကဗျာ ဖွဲ့ဆိုသူတွေ လို ကျွန်တော် မရေးဖွဲ့တတ်လို့ မရေးဖွဲ့ရဲပါဘူး သူတို့လို ရေးဖွဲ့လို့ တတ်ရင်တော့ ရေး ကြည့်မှာပါပဲ "

" မြန်မာကဗျာဆရာ၊ ဆရာမကြီးတွေရဲ့ ကဗျာတွေနဲ့ ပတ်သက်ပြီးတော့ သုံးသပ်ချက် စာတမ်းတွေ ဆရာ ရေးနေတာတွေ့ရပါတယ်။ ဒီစာတမ်းတွေ ရေးတဲ့ ဆရာ့ရည်ရွယ်ချက် သိပါရစေ"
" ဒီသုံးသပ်ချက်စာတမ်း ရေးနေတာ ကျွန်တော့်မှာ ရည်ရွယ်ချက် ရှိပါတယ်။ ကျွန်တော်နဲ့ ခေတ်ပြိုင်စာဆို ကဗျာဆရာကြီးတွေ၊ ဆရာမကြီးတွေ ကဗျာတွေကို အတတ်နိုင်ဆုံး စုစည်းပြီး ၂၀ ရာစု မြန်မာ ကဗျာသမိုင်း အတွက် ကဗျာကျမ်းအဖြစ် ရှိရစ်အောင် ကြိုးပမ်းခြင်းဖြစ်ပါတယ်။ သူတို့ ရေးသမျှ ကဗျာ တွေ အားလုံး လိုက်လံ စုဆောင်းပါတယ်။

သက်ရှိ ထင်ရှားရှိနေတဲ့ ကဗျာဆရာကြီးတွေရဲ့ အကူအညီ၊ ရန်ကုန် တက္ကသိုလ် စာကြည့်တိုက်က ဆရာ ဦးသော်ကောင်း၊ ဒေါ်ကြော့ကြော့၊ တင်တင်မော်တို့ အကူအညီ၊ အခြား ကဗျာဆရာတွေရဲ့ အကူအညီ၊ မြေနီကုန်းက ဦးစောလှိုင်၊ ဒေါ်မြမြ (စာပေတိုက်)တို့ အကူအညီရယူပြီး စာအုပ် မထုတ်ရသေးဘဲ စာနယ်ဇင်း အစောင်စောင်မှာ ပြန့်ကျဲနေတဲ့ ကဗျာတွေ တစ်ပုဒ်ချင်း ရယူရပါတယ်။ စပါး ကောက်သင်းကောက်သလို တစ်နှံချင်း ကောက်သလို ကောက်ရပါတယ်။ မြန်မာစာ မဟာဝိဇ္ဇာဘွဲ့ ယူဖို့အတွက် ပြုစုထားတဲ့ ကျောင်းသူ၊ ကျောင်းသားတွေရဲ့ စာတမ်းတွေလည်း စုရပါတယ်။ ဒီကဗျာကျမ်း တွေဟာ မြန်မာစာပေလောကအတွက် တစ်ဖက်တစ်လမ်းက အထောက်အကူ ဖြစ်မယ်လို့ ယုံကြည် ပါတယ်။

ကျွန်တော်တို့ တစ်တွေဟာ မြန်မာစာပေကို လေ့လာရပါတယ်။ ကျမ်းပြုရမှာတွေကို ကျမ်းပြုရပါမယ်။ ဒါကြောင့် ကျွန်တော်တို့ မြန်မာစာပေဖွံ့ဖြိုးရေးအတွက် ကြိုးစားတာပါပဲ။ ၂၀ ရာစု မြန်မာစာဆို မြန်မာကဗျာ (ငွေတာရီ၊ နုယဉ်၊ ဗန်းမော်ညိုနွဲ့၊ မင်းယုဝေ၊ ဘုတလင် ချစ်လေး) ကျမ်းပြုစုပြီးသွားပါပြီ။ ဒီနှစ်ထဲ မှာ ထွက် နိုင်ပါလိမ့်မယ် "
" ကဗျာ ရေးတဲ့နေရာ မှာ ကာရန်အကြောင်းအရာ ဘယ်ဟာ အဓိကကျပါသလဲ ဆရာ"

"ကဗျာ ရေးရာမှာ အကြောင်းအရာဟာ အဓိကဖြစ်ပါတယ်။ ဒါပေမဲ့ ကာရန်ကိုလည်း အကြောင်းအရာ ထက် လျှော့တွက်လို့မရပါဘူး။ ကဗျာကောင်းတစ်ပုဒ်ကို လူသားတစ်ယောက်အဖြစ် ဥပမာ ပေးချင်ပါတယ်။ ကာရန်ကို လူသားတို့ရဲ့ ကိုယ်ခန္ဓာအဖြစ် သဘောထားပြီး အကြောင်းအရာကို ၀ိညာဉ် အဖြစ် သဘောထား ရင် ရမယ်လို့ ဆိုချင်ပါတယ်။ အသက်ဝိညာဉ် မရှိရင် ခန္ဓာကိုယ်ဟာ ဘာမှ အသုံးချ လို့ မရပါဘူး။ အဲဒီလိုပဲ အသက်ဝိညာဉ်ဟာ ကိုယ်ခန္ဓာမရှိရင် နားခိုစရာ၊ တွယ်စရာ မရှိပါဘူး။ ဒီတော့ အသက်ဝိညာဉ် ရော၊ ကိုယ်ခန္ဓာရောရှိမှ လူသားဘ၀ဟာ ရှင်သန် ကြီးပြင်းလာပြီး အဓိပ္ပာယ်ရှိပါ့မယ်။ ကဗျာ ကို ဥပမာအဖြစ် လူသားအနေနဲ့ တူကြောင်း ပြောပြလိုပါတယ်"
" ကဗျာ ဝေဖန်ရေးနဲ့ ပတ်သက်လို့ ဆရာ ဘယ်လို ယူဆပါသလဲ"

" ကဗျာ ဝေဖန်ရေးနဲ့ ပတ်သက်လို့ ပြောရရင် ကဗျာဝေဖန်ရေးဟာ လိုအပ်ပါတယ်။ ကဗျာဝေဖန်တဲ့နေရာ မှာ သူ့အတိုင်းအတာနဲ့သူ ရှိပါတယ်။ ဆင်ချည်တဲ့ကြိုးနဲ့ ဆိတ်ကို မချည်ကောင်းပါဘူး။ ဆိတ်ချည်တဲ့ ကြိုးနဲ့ လည်း ဆင်ကို ချည်လို့ မရပါဘူး။ ဆင်ချည်တဲ့ကြိုးနဲ့ ဆင်ကိုချည်မှ အဆင်ပြေပါတယ်။ ဆိတ်ချည်တဲ့ ကြိုးကို ဆိတ်ချည်မှ အဆင်ပြေပါတယ်။ ကျွန်တော် ဒီလိုပဲ ယူဆပါတယ်။ ပြီးတော့ ကဗျာ ဝေဖန်တဲ့ နေရာမှာ စေတနာတရားဟာ အလွန်လိုအပ်တယ်လို့ ယူဆပါတယ်။ စေတနာမှန်သော ဝေဖန်ရေး ဟာ စာပေကို ဖွံ့ဖြိုးတိုးတက်စေတယ်လို့ ယူဆပါတယ်။ စာပေကို အပြုသဘောနဲ့ ဝေဖန်ဦးစားပေးဖို့ ဆိုလို ပါတယ်။ နောက်တစ်ချက် ပြောချင်တာကတော့ စာဖတ်သူနဲ့ စာရေးသူကြားမှာ ဝေဖန်ရေး ဆရာဟာ ရှိပါ တယ်။ ဝေဖန်သူဟာ တာဝန်အလွန်ကြီးပါတယ်။ အရည်အချင်းနဲ့ ပြည့်စုံပြီး စေတနာ ရှေ့ထားတဲ့။ ဝေဖန်တတ်တဲ့ ဝေဖန်ရေးဆရာဟာ စာကောင်း ပေကောင်းကို ထုတ်ဖော်ပြသသည်သိရပါတယ်။ စာပေ အရသာ ခံစားတတ်အောင် တင်ပြနိုင်စွမ်းရှိသူလို့ ဆိုကြောင်း သိရပါတယ်။ ဒါကြောင့် စာပေဝေဖန်ရေးဟာ စာပေတိုးတက်မှုအတွက် အလွန်အရေးပါ အရာ ရောက်ကြောင်း ပြောကြားလိုပါတယ်"

" ဒီနေ့ မဂ္ဂဇင်းကဗျာတွေအပေါ် ဆရာ ဘယ်လို သုံးသပ်မိပါသလဲ "
" ယနေ့ လစဉ်ထုတ်မဂ္ဂဇင်း ၁၄ စောင်မှာ ပါဝင်ဖော်ပြနေတဲ့ ကဗျာတွေ ဖတ်သလောက်မှာ ကဗျာအများစု ဟာ မြန်မာစာပေ ဖွံ့ဖြိုးတိုးတက်မှုကို အထောက်အကူပြုနေတယ်လို့ ယူဆပါတယ်။ ပြည်သူတွေရဲ့ အကျိုးစီးပွား ကို သယ်ပိုးနေတဲ့ ကဗျာတွေ အများမပြားတွေ့ရပါတယ်။ ပြည်သူ့အကျိုးပြု ကဗျာတွေဟာ ဘယ်တော့မှ၊ ဘယ်ခေတ်မှာမှ မတိမ်ကောပါဘူး။ ပြည်သူ့အကျိုးစီးပွားကို ဆန့်ကျင်ရင်တော့ အဲဒီကဗျာ ဟာ ကျဆုံးမှာပါပဲ။

ယနေ့ ကဗျာဆရာအများစုဟာ မြန်မာကဗျာ ရေးဖွဲ့ပုံ ရေးဖွဲ့နည်းစနစ်ကို လိုက်နာ ဖွဲ့ဆိုနေကြပါတယ်။ မြန်မာ့ ယဉ်ကျေးမှု အမွေအနှစ်ကို ထိန်းသိမ်းရင်း အကြောင်းအရာသစ်တွေကို တင်ပြနေကြပါတယ်။ တိုင်းချစ်ပြည်ချစ်စိတ် ဓာတ်၊ လူ့ဘောင်သစ် တည်ဆောက်ရေး စိတ်ဓာတ်၊ မြန်မာ့ရိုးရာ ယဉ်ကျေးမှု ဓလေ့ထုံးစံ ကို ထွန်းကားစေလိုသော စိတ်ဓာတ်၊ အတွေးအခေါ်၊ ဘ၀အားမာန်၊ ဘ၀ရုန်းကန် လှုပ်ရှားမှု၊ ဘ၀အမြင်၊ လောကအမြင်တွေကို ဖွဲ့ဆိုနေတာ တွေ့ရပါတယ်။ ယနေ့ခေတ်မှာ နှစ်စဉ်နှစ်တိုင်း နိုင်ငံတော် က ချီးမြှင့်တဲ့ အမျိုးသား စာပေဆုတွေထဲမှာ နှစ်စဉ် ဆက်တိုက်လိုလို ဆုချီးမြှင့်ခံနေရတာကိုက မြန်မာ ကဗျာဆရာ အများစုဟာ ပြည်သူ့အကျိုးပြုကဗျာတွေ ရေးဖွဲ့နေလို့ ဖြစ်တယ်ဆိုတာ သက်သေခံ နေပါတယ်"

" ကဗျာ လေ့လာလိုက်စားသူတွေအနေနဲ့ ပတ်သက်ပြီး ဆရာ ဘယ်လို အကြံပေးချင်ပါသလဲ ဆရာ "
" ကဗျာ လေ့လာလိုက်စားသူတွေဟာ မြန်မာကဗျာကို သေချာစွာ လိုက်စားပြီး ပျို့၊ လင်္ကာ၊ ရတု၊ ရကန်၊ သံပေါက်၊ ဧချင်း၊ အိုင်ချင်း၊ ကာချင်း၊ တျာချင်း၊ ဒွေးချိုး၊ လေးချိုး စတဲ့ မြန်မာ့ယဉ်ကျေးမှု ကဗျာစာပေ တွေကို စေ့စေ့စပ်စပ် အလေးအနက်ထားပြီး လေ့လာကြပါလို့ စေတနာနဲ့ အကြံပြုချင်ပါတယ်"
" ဒီနေ့ ကျွန်တော်တို့ စာပေလောကမှာ ပင်ကိုရေးဝတ္ထုတွေ အရည်အသွေး ကျဆင်းနေတာနဲ့ ပတ်သက်ပြီး ဆရာ ဘယ်လို မြင်ပါသလဲ "
" ယနေ့ ပင်ကိုရေးဝတ္ထုတွေ ရောင်းအား ကျဆင်းတာကတော့ ဆွေးနွေးစရာတွေ အများကြီး ရှိမယ်လို့ ထင် ပါတယ်။ စာရေးသူ၊ ထုတ်ဝေသူ၊ စာဖတ်သူ ဒီသုံးဦးအပေါ်မှာ အများဆုံး တည်ပါတယ်။ ပင်ကိုရေးဝတ္ထုတွေကို ယခုထက် ကောင်းအောင် မြန်မာစာရေး ဆရာတွေ အထူးကြိုးစားပြီး ရေးဖို့လည်း လိုမယ်လို့ ယူဆပါတယ်။ ပင်ကိုရေးဝတ္ထုတွေဟာ ၀တ္ထုစံနှုန်း သတ်မှတ်ချက်တွေ ရှိတဲ့အတိုင်း စာပေအဆင့် အတန်းမြင့်ဖို့၊ စာပေအရည်အသွေး ကောင်းဖို့လိုပါတယ်။ ပင်ကိုရေးဝတ္ထု ဆိုပြီးတော့ စာပေ အဆင့်အတန်း၊ မမီ၊ စာပေအရည်အသွေး ညံ့ဖျင်းရင်လည်း အချည်းနှီး ဖြစ်မှာပဲ။

ပင်ကိုရေးဝတ္ထုကြီးတွေ ပြန်လည်ထွန်းကား လာအောင်၊ ရောင်းအားရှိလာအောင် ပထမဆုံး လုပ်ပေးနိုင်တဲ့ ဌာနကတော့ လစဉ်ထုတ် မဂ္ဂဇင်းကြီးတွေ ဖြစ်ပါတယ်။ ပင်ကိုရေးဝတ္ထုကောင်း ရေးနိုင်စွမ်း ရှိတဲ့ စာရေးဆရာကြီးတွေနဲ့ အယ်ဒီတာချုပ်တွေ တွေ့ဆုံညှိနှိုင်းပြီး အခန်းဆက် ပင်ကိုရေးဝတ္ထုကြီးတွေ ပြန်လည် ထွန်းကားမှုအတွက် ကြိုးပမ်းသင့်ပါပြီ။

ဒီလို ကြိုးပမ်းခဲ့တဲ့ အစဉ်အလာလည်း ရှိပါတယ်။ ရှုမ၀ မဂ္ဂဇင်း၊ မြ၀တီမဂ္ဂဇင်း၊ ငွေတာရီ မဂ္ဂဇင်း၊ သွေးသောက်မဂ္ဂဇင်း အရှိတဲ့ မဂ္ဂဇင်းကြီးတွေက ပုံနှိပ်ဖော်ပြခဲ့တဲ့ ပင်ကိုရေးဝတ္ထုကြီးတွေဟာ အထင် အရှား ရှိပြီး ဖြစ်ပါတယ်။ ဦးသိန်းဖေမြင့်ရဲ့ "အရှေ့က နေ၀န်းထွက်သည့်ပမာ"၊ ခင်နှင်းယုရဲ့ "ကျွန်းဧကရီ"၊ "ချစ်လှချည်"၊ ဂျာနယ်ကျော်မမလေးရဲ့ "သူမ"၊ "မုန်း၍မဟူ"၊ တက္ကသိုလ်ဘုန်းနိုင်ရဲ့ "သူ့ကျွန်မခံပြီ"၊ ဒဂုန်တာရာရဲ့ "ကြာပန်းရေစင်"၊ ဗန်းမော်တင်အောင်ရဲ့ "မြိုင်"၊ ၀င်းဦးရဲ့ "ဆွေး"၊ ၀င်းလှိုင် ရဲ့ "ဘ၀ နေ၀င်ချိန်"၊ အောင်လင်းရဲ့ "အရိုင်းစံပယ်"၊ "စင်ရော်"၊ မင်းရှင်ရဲ့ "မိုးနဲ့မြေ"၊ "ပြင်ဦးလွင် မှ လွမ်းရိပ်သာ" စတဲ့ ၀တ္ထုကြီးတွေဟာ လစဉ်ထုတ် မဂ္ဂဇင်းကြီးတွေက အယ်ဒီတာချုပ် တွေဟာ စိတ်ရှည်လက်ရှည်နဲ့ ထည့်သွင်း ဆောင်ရွက်ပေးခဲ့လို့ ပေါ်ထွက်လာတဲ့ ၀တ္ထုကြီးတွေ ဖြစ်ပါတယ်။ မဂ္ဂဇင်း ကြီးတွေမှာ ထည့်သွင်းဖော်ပြပြီးတဲ့နောက်မှာ လုံးချင်းဝတ္ထုအဖြစ် ထုတ်ဝေလိုက်တဲ့အခါမှာ အောင်မြင် ကျော်ကြားတဲ့ ၀တ္ထုကြီးတွေအဖြစ် မြန်မာစာပေလောကမှာ ရပ်တည်နေနိုင်ခဲ့ကြပါတယ်။

ကျွန်တော် စိတ် မကောင်းစရာတစ်ခု ပြောချင်တာကတော့ မဂ္ဂဇင်းဝတ္ထုရှည်ဆိုပြီး ယနေ့ အချို့မဂ္ဂဇင်းကြီးတွေ အမည်တပ်ပြီး ထည့်ပေးကြတာ ဖတ်ကြည့်တော့ ၀တ္ထုတိုလောက်သာပဲ ရှိတော့ ဘယ်လို နားလည်ရမှန်း တောင် မသိတော့ပါဘူး။ တစ်ခုခုတော့ ကွဲလွဲချက် ရှိနေတယ်လို့ ထင်ပါတယ်"
" ဒီနေ့ ဘာသာပြန်တွေနဲ့ ပတ်သက်ပြီးတော့ ဆရာ ဘယ်လို ယူဆပါသလဲ "
" ဘာသာပြန်စာပေအပေါ်မှာလည်း ဆွေးနွေးစရာတွေ အများကြီး ရှိပါတယ်။ မြန်မာစာဖတ်ပရိသတ်နဲ့ ကမ္ဘာ့စာပေ ဆက်သွယ်မှု အခြေအနေပေါ်မှာလည်း ထည့်တွက်ရပါလိမ့်မယ်။

မြန်မာစာဖတ်ပရိသတ်က ကမ္ဘာ့ စာပေတွေကို ကျယ်ကျယ်ပြန့်ပြန့် လိုက်စားလာလို့ ဖြစ်တယ်လို့ ယူဆနိုင်ပါတယ်။ ဘာသာပြန်စာအုပ်တိုင်း ကောင်းသလားဆိုတော့ စာအုပ်တိုင်း မကောင်းပါဘူး။ ဒါပေမဲ့ စာအုပ်ကောင်း အများအပြားလည်း ပါပါတယ်။ အထူးသဖြင့်ကတော့ ဖတ်လို့ကောင်းအောင် ရေးထားတဲ့ အပျော်ဖတ်စာ အုပ်တွေ၊ သူတို့ဆီမှာ Best seller ဆိုတဲ့ စာအုပ်တွေက ကျွန်တော်တို့ဆီမှာ စာဖတ်သူတွေ အကြိုက်ဖြစ် နိုင်မယ့် အလားအလာရှိရင် ပြန်ဆိုကြတာတွေ့ရပါတယ်။ ဘာသာပြန် စာပေတွေ အထူးသဖြင့် ဘာသာပြန် ၀တ္ထုကြီးတွေ နေရာယူလာတာကတော့ ပင်ကိုရေး မြန်မာ ၀တ္ထုကောင်း တွေ၊ ၀တ္ထုကြီးတွေ မထွက်နိုင်တဲ့ အတွက်ကလည်း အကြောင်းတစ်ကြောင်း ဖြစ်ပါတယ်။

၁၉၅၀ ပြည့်နျစ်၊ ၁၉၆၀ ပြည့်နှစ် ၁၀ စုနှစ် တစ်စုကို စံထားပြီး ပြောကြရအောင်ဗျာ။ အဲဒီ ၁၀ စုနှစ် အတွင်းမှာ ဘာသာပြန် ၀တ္ထုကောင်းတွေ၊ ၀တ္ထုကြီးတွေ အတော်များများ ထွက်တာ တွေ့ရပါလိမ့်မယ်။ ထိုနည်းတူစွာပဲ ပင်ကိုရေး မြန်မာဝတ္ထုကြီးတွေ အတော် များများ ထွက်တာ တွေ့ရပါလိမ့်မယ်။ ထိုနည်းတူစွာပဲ ပင်ကိုရေး မြန်မာဝတ္ထုတွေ ၀တ္ထုကောင်းတွေလည်း အတော်များများ ထွက်ခဲ့ပါတယ်။ ဘာသာပြန်ဝတ္ထုအချို့ဖြစ်တဲ့ အမေ၊ မြေပဒေသာ၊ မျှော်တလင့်လင့်၊ သွေးစုပ်မြေ၊ ဒေးဗစ်ကော့ပါးဖီးလ်၊ တောင်လေသွေးတော့၊ ပန်းရောင်၊ အဘိုးအို နှင့် ပင်လယ်၊ ရော်ဘင်ဆန် ကရူးဆိုး၊ ဇင်းဒါးအကျဉ်းသမား၊ ဖရူဆို၊ ခါးကုန်းကြီး အစရှိတဲ့ ၀တ္ထုကြီးတွေ ထွက်ခဲ့သလို ပင်ကိုရေးဝတ္ထု ကောင်း ၀တ္ထုကြီးတွေဖြစ်တဲ့ မိုးနှင့်မြေ၊ မေ့ဘူးကွယ့် သက်လှယ်ရယ်၊ အရိုင်းစံပယ်မွှေး၊ သူ့ကျွန်မခံပြီ၊ ပစ် တိုင်းထောင်၊ ဘုန်းမောင် တစ်ယောက် တည်းရယ်၊ လွမ်းရစ်တော့ သက်လှယ်ရယ်၊ ကြာပန်းရေစင်၊ ကမ္မဖလ၊ ရွှေချစ် ငွေချစ်၊ တစ်မိုးသောက်သော်၊ မိုးအောက်မြေပြင်၊ မောင့်မမငြိမ်း၊ ဗေဒါ၊ တို့တိုင်းဌာနီ၊ မင်းမှုထမ်း၊ တပ်ထဲက မြတ်ကိုကို၊ မုန်း၍မရ၊ အရှေ့က နေ၀န်းထွက်သည့်ပမာ၊ သူမ၊ ငဘ အစရှိတဲ့ ၀တ္ထု ကြီးတွေ ထွက်ခဲ့ပါတယ်။ ၁၉၆၀ ပြည့်နျစ်၊ ၁၉၇၀ ပြည့်နှစ်အတွင်း ၁၀ စုနှစ် တစ်စု ကာလကို စံပြုကြည့်ရင်လည်း တွေ့နိုင်ပါတယ်။

ဒါက ဘာသာပြန်စာပေထဲက ၀တ္ထုအကြောင်း ပြောပြတာပါ။ အခြားဘာသာပြန် ဘာသာရပ်တွေကတော့ အထူးပြောစရာ မလိုပါဘူး။ စီးပွားရေး၊ နိုင်ငံရေး၊ လူမှုရေး၊ ပညာရေး၊ သိပ္ပံဘာသာရပ်တွေ ဘာသာပြန်အနေနဲ့ ထွက်ပေါ်လာတာ ပြည်သူတွေအတွက် ကောင်းမွန် တိုးတက်တဲ့ အသိဥာဏ်တွေ ဖြစ်စေတယ်လို့ ယူဆပါတယ်"
" မဲခေါင်မြစ်မှ အိုရွက်ဝါ ကဗျာစာအုပ် အမှာစာ ရေးတဲ့နေရာမှာ ဆရာက "စာပေဟာ ခေတ်ရဲ့ ကြေးမုံဖြစ် တယ်"လို့ ရေးထားတာ တွေ့ရပါတယ်။ ဒီနေ့ ကျွန်တော်တို့ စာပေမှာ တကယ်ပဲ ခေတ်ရဲ့အရောင် တိတိ ကျကျ ထင်ဟပ်ပါသလား"

" စဟာပေဟာ ခေတ်ရဲ့ ကြေးမုံဖြစ်ပါတယ်။ တကယ်ပဲ ခေတ်ရဲ့ ကြေးမုံဟာ စာပေမှာ အရောင် တိတိ ကျကျ ထင်ဟပ်နိုင်ပါတယ်ဗျာ။ ကျွန်တော်တို့ မြန်မာစာပေသမိုင်းကို အတိုချုံးပြီး ပြန် စကောက် ကြည့်ရအောင်။ ပုဂံခေတ်၊ ပင်းယခေတ်၊ အင်းဝခေတ်၊ တောင်ခုခေတ်၊ ညောင်ရမ်းခေတ်၊ ကုန်းဘောင်ခေတ်၊ အင်္ဂလိပ်ခေတ်၊ လွတ်လပ်ရေးခေတ်၊ ဆိုရှယ်လစ်ခေတ်ပြောင်း အရေးတော်ပုံ တော်လှန်ရေးခေတ်၊ ဒီခေတ်အသီးသီးတို့မှာ ပေါ်ထွက်လာတဲ့ ကျောက်စာ၊ ပေစာ၊ စာအုပ်စာတမ်းတွေ ဖတ် ကြည့်ရင် သိနိုင်ပါတယ်။ ကျောက်စာဆိုရင် ပုဂံခေတ်က သျှင်ဒိသာပါမောက္ခ ကျောက်စာဟာ မဖော် ပြရင် မဖြစ်တဲ့ စာပေမှတ်တမ်းဝင် ကျောက်စာဖြစ်ပါတယ်။ အဲဒီ ကျောက်စာဟာ စာပေအရေးအသား အတွက်သာ မဟုတ်ဘူး ပြည်တွင်းရေး အနှောင့်အယှက်ရှိပုံ၊ မြန်မာရဟန်းတော်များ တိုင်းပြည်အရေးန့ ပတ်သက်လို့ ဆောင်ရွက်ခဲ့ပုံတွေကို ဖော်ပြထားပါတယ်။

ပင်းယခေတ်က ကာချင်းဟာ နိုင်ငံတော် အချုပ်အခြာအာဏာကို ကာကွယ်စောင့်ရှောက်ရေး၊ ကျူးကျော် စစ်ကို တရားသောစစ်ဖြင့် ခုခံကာကွယ်ရေးတို့အတွက်၊ တိုင်းပြည်အတွက် သူရဲကောင်းတွေ အသက်စွန့်၍ အလောင်းချင်းထပ်၍ အသေခံပုံ၊ ရန်သူတွေ၊ ဆုတ်ခွာထွက်ပြေး ဆုံးရှုံးကြရပုံတွေ တွေ့နိုင်ပါတယ်။ ကျန်တဲ့ ခေတ်တွေကတော့ အထူးမပြောတော့ပါဘူး။ သိပ်ပြီး များနေမှာစိုးလို့ပါ။ စာရေးဆရာကြီး မောင်ထင် ရေးတဲ့ "ငဘ" ၀တ္ထု၊ ဦးသိန်းဖေဖြင့်ရေးတဲ့ " အရှေ့က နေ၀န်းထွက်သည့်ပမာ" ၀တ္ထုကြီးတွေဟာ နောက်ခံပြုထားတဲ့ ခေတ်ရဲ့ အကြောင်းတွေကို ဂဃနဏ တွေ့ရမှာပါ။ အလားတူပဲ စာနယ်ဇင်းတွေမှာ ဖတ်ကြည့်ရင် အများကြီး သိနိုင်ပါတယ်"
" တာဝန်တွေ များတဲ့အထဲက ဆရာ စာရေးနေတယ်ဆိုတော့ စာရေးဖို့ အချိန်ရယ်လို့ သီးခြားသတ်မှတ် ထားတာများ ရှိပါသလားဆရာ"

" ကျွန်တော်ဟာ ကျွန်တော့်ရဲ့ နိုင်ငံ၊ ပြည်သူကို အလွန်ချစ်မြတ်နိုးပါတယ်။ ဒါကြောင့် စစ်ပညာကို ဂျပန်ခေတ်ကတည်းက သင်ကြားခွင့်ရသမျှ သင်ကြားခဲ့ပါတယ်။ စစ်ပညာ သင်ခဲ့သလို စာပေတွေလည်း ရသမျှ ရှာဖွေပြီး ဖတ်ရှုလေ့လာမှတ်သားခဲ့ပါတယ်။ ကဗျာ၊ ၀တ္ထု၊ ဆောင်းပါးစာပေတွေ ရေးဖို့ ကြိုးစားခဲ့ရပါ တယ်။ အရွယ်ရောက်စကာလ ပြည်တွင်းသောင်းကျန်းဆူပူမှုနဲ့ ရင်ဆိုင်ရတဲ့အခါမှာ တပ်မတော်ထဲ ၀င်ရောက်ပြီး တိုက်ပွဲများစွာ ပါဝင်ဆင်နွှဲခဲ့သလို စာပေတွေလည်း အများကြီး ရေးခဲ့ပါတယ်။ နိုင်ငံချစ်တဲ့ တိုင်းသူပြည်သားတစ်ယောက်ဟာ သူ့နိုင်ငံအတွက်၊ လူမျိုးအတွက် သူ စွမ်းဆောင်နိုင်တဲ့ဘက်က သူ ရောက်ရာနေရာ၊ ကျရာ တာဝန်ကို ထမ်းဆောင်ရမယ်လို့ ကျွန်တော် ပြတ်ပြတ်သားသား ယုံကြည်ချက်၊ ခံယူချက် ရှိပါတယ်။ ရောက်ရာဒေသ၊ ကျရာတာဝန်ကို အသက်ရှင်နေသမျှ ကာလပတ်လုံး ကျွန်တော်ဟာ ကျွန်တော့် နိုင်ငံအတွက် အလုပ်အကျွေး ပြုနေမှာပါပဲ။ ကျွန်တော် အသက်သေဆုံးတဲ့ ကာလကျမှ ရပ်ဆိုင်း သွားမယ် ထင်ပါတယ်။ စာရေးတဲ့အချိန် ရယ်လို့ သီးခြားသတ်မှတ်မထားနိုင်ပါဘူး။

ဒီနေရာမှာ ချက်ကော့ရဲ့ ငှက်စင်ရော်ပြဇာတ်ထဲက ပြောပြချက်ကို သိပ်သဘောကျတယ်။ ချက်ကော့က "ကျုပ်ဟာ ကျုပ်နိုင်ငံကိုလည်း ချစ်တယ်၊ ကျုပ်ပြည်သူတွေလည်း ချစ်တယ်၊ ကျုပ်နိုင်ငံ ကျုပ် ပြည်သူတွေရဲ့ အနာဂတ်၊ ကျုပ်နိုင်ငံ ကျုပ်ပြည်သူတွေရဲ့ သိပ္ပံပညာတင်ပြဖို့ ကျုပ်မှာ တာဝန်ရှိတယ်၊ နောက်ပြီး လူသားတွေရဲ့ အခွင့်အရေးကိုလည်း တင်ပြဖို့ ကျုပ်မှာ တာဝန်ရှိတယ်"လို့ ဆိုထားပါတယ်။
ကျွန်တော့်ရဲ့ အပေါင်းအသင်းတွေက ကိုဝင်းငြိမ်း မေးသလိုပဲ မေးကြပါတယ်။ ကျွန်တော် အထက်က ဖြေတဲ့အတိုင်းပဲ ဖြေခဲ့ပါတယ်။ ကျွန်တော်ဟာ စာ အမြဲတမ်း ဖတ်နေပါတယ်။ စာရေးတာနဲ့ ပတ်သက်လို့ ကတော့ ဧရာဝတီဖြစ်ကြီး စီးနေသလို အစဉ်အဆက်မပြတ် တသွင်သွင် တဒီးဒီး စီးနေသလို ရေးနေမှာပါပဲ။ အချိန် သတ်မှတ်ထားခြင်း မရှိပါဘူး"
" စီးဆင်းရစ်လေဦး ဧရာဝတီ ရေးဖြစ်သွားတဲ့ ရည်ရွယ်ချက်ကို သိပါရစေ ဆရာ"
" စီးဆင်းရစ်လေဦး ဧရာဝတီ ရေးဖြစ်သွားတဲ့ ရည်ရွယ်ချက်က နှစ်ချက် ရှိပါတယ်။ တစ်ချက်က အဲဒီစာအုပ် မှာ ဖော်ပြထားပြီးဖြစ်ပါတယ်။

နောက်တစ်ချက်ကတော့ ကမ္ဘာ့ဝတ္ထုကြီးတွေ၊ မြန်မာ့ဝတ္ထုကြီးတွေကို ဖတ်ရှုလေ့လာခွင့်ရပြီး အားကျတဲ့ အတွက် ဖြစ်ပါတယ်။ ကမ္ဘာ့ဝတ္ထုကြီးတွေအနက် က လီယိုတော်လ်စတွိုင်းရဲ့ "စစ်နှင့် ငြိမ်းချမ်းရေး"၊ မာဂရက်မစ်ချယ် ရဲ့ "လေရှုးသုန်သုန်"၊ မီးခေးရှိုလိုတော့ဗ် ရဲ့ "တငြိမ့်ငြိမ့်ဒွန်"၊ "တောရိုင်းမြေ"၊ James A Michener ရဲ့ "Hawaii The Source Centenial" ၀တ္ထုကြီးတွေ၊ "Herman Wark" ရဲ့ "Young Blood Hawke"၊ မြန်မာ ၀တ္ထုကြီးတွေထဲက ဆရာကြီး သခင်ကိုယ်တော်မှိုင်းရဲ့ "ရှာပုံတော်"၊ ဒဂုန်ခင်ခင်လေးရဲ့ "စာဆိုတော်"၊ နန္ဒရဲ့ "သံနဲ့သွေး"၊ "ငါ့သွေး ငါ့ဓား ငါ့ဧရာဝတီ"၊ နတ်နွယ်ရဲ့ "မြန်မာပြည် မြောက်ပိုင်း"၊ မင်းကျော် ရဲ့ "မဟာ"၊ "တစ္ဆေ"၊ "ငါတို့ခေတ်နှင့်အပြိုင်"၊ တက္ကသိုလ်ဘုန်းနိုင်ရဲ့ "သူငယ်ချင်းလို့ပဲ ဆက်၍ ခေါ်မည်ခိုင်၊ မောင်နေ၀င်းရဲ့ "မိုးမြေသိမ့်သိမ့်"၊ စောဦးရဲ့ "တစ်မိုးသောက်သော်"၊ ကျော်အောင်ရဲ့ "အရေး ကြီးပြီ သွေးနီးကြစို့"၊ မောင်သိန်းဆိုင်ရဲ့ "ရေနံ့သာခင်ခင်ကြီး" စတဲ့ ၀တ္ထုကြီးတွေကို သိပ်နှစ်သက် သဘောကျ ခဲ့ပါတယ်။ ဒီတော့ မြန်မာဝတ္ထုလောကမှာ မှတ်တိုင်တစ်တိုင်အဖြစ် ပါဝင်နိုင်ဖို့ မြန်မာဝတ္ထုကြီး စစ်စစ် တစ်အုပ် ပေါ်ထွက်လာဖို့ ရည်ရွယ်ခဲ့ခြင်းဖြစ်ပါတယ်"

" ဆရာ စာပေဗိမာန် ကဗျာဆုရတဲ့ "မဲခေါင်မြစ်မှ အိုရွက်ဝါ" ကဗျာရှည်ကြီးနဲ့ "စီးဆင်းရစ်လေဦး ဧရာဝတီ" နှိုင်းယှဉ်ကြည့်ရင် ဘယ်လို ခံစားရပါသလဲ။ ကျွန်တော် မေးတဲ့မေးခွန်းက သားသမီး နှစ်ယောက် ထဲက ဘယ်သူ့ကို ပိုချစ်သလဲလို့ မေးတာမျိုးပါပဲ ဆရာ"

" ဒီနှစ်ခု နှိုင်းယှဉ်ပြောရရင်တော့ ခံစားရမှုဟာ တစ်မျိုးစီပါပဲ။ ကဗျာရှည်ကြီးက စာပေရသမြောက် ဂန္ထ၀င် ကဗျာကြီးတစ်ပုဒ် ဖြစ်သလို ၀တ္ထုကြီးကလည်း တိုင်းပြုပြည်ပြု မြန်မာ့ဂန္ထ၀င်ဝတ္ထုကြီးတစ်ပုဒ်လို့ စာပေ မြတ်နိုးသူတွေက ဝေဖန်ကြပါတယ်။ ကျွန်တော်ကတော့ ဒီသားသမီး နှစ်ယောက်လုံးကို အတူတူပဲ ချစ်မြတ် နိုးပါတယ်။ ဘယ်သူ့ ဘယ်သူကိုမှ မပိုပါဘူးဗျာ။ ပိုလို့လည်း မရပါဘူး။ ဘာကြောင့်လဲ ဆိုတော့ ဒီအနုပညာ ပစ္စည်းနှစ်ခုမှာ တစ်မျိုးစီ အနုပညာတန်ဖိုး ရှိနေတဲ့အတွက် ဖြစ်ပါတယ်။ ကိုဝင်းငြိမ်းပေးတဲ့ ဥပမာလိုပဲ ပြန်ဖြေ ချင်ပါတယ်။ သားဟာ လူ့လောကအတွက် တန်ဖိုးရှိသလို၊ သမီးဟာလည်း လူ့လောက အတွက် တန်ဖိုးရှိပါတယ်။ အနုပညာလောကမှာလည်း ကဗျာနဲ့ ၀တ္ထုဟာ ဒီလိုပဲ ပြောလို့ရမယ်လို့ ထင်ပါတယ်ဗျာ"

" ကျေးဇူးတင်ပါတယ် ဆရာ၊ ၀တ္ထုနဲ့ ပတ်သက်တာတွေရော၊ ကဗျာနဲ့ ပတ်သက်တာတွေပါ ပြည့်ပြည့်စုံစုံ ဖြေကြားပေးသွားတဲ့အတွက် စာချစ်သူတွေအတွက် အကျိုးရှိပါလိမ့်မယ်။ တာဝန်တွေနဲ့ မအားလပ်တဲ့ကြား ကအချိန်ပေးခဲ့တဲ့အတွက်လည်း ပေဖူးလွှာ စာတည်းအဖွဲ့ကိုယ်စား ကျွန်တော်ကပဲ ကျေးဇူးတင်စကား ပြောခဲ့ပါရစေ။ ဆရာလည်း ဆန္ဒရှိတဲ့အတိုင်း ဧရာဝတီမြစ်ရေ စီးဆင်းနေသမျှ စာပေအကျိုး ဆတက် ထမ်းပိုး သယ်ပိုးနိုင်စေ ဖို့ ဆန္ဒပြုခဲ့ပါတယ်"

ပေဖူးလွှာမဂ္ဂဇင်း၊ အမှတ်-၃၈၊ ဇူလိုင်လ၊ ၁၉၈၄ ခုနှစ်။
Credit:shwezinu.blogspot.com