ဝင်းငြိမ်း နှင့် စာရေးဆရာများ အပိုင်း (၃၀)

ဝင်းငြိမ်း နှင့် စာရေးဆရာများ အပိုင်း (၃၀)

နားလည်ရင် ကျေနပ်ပါပြီ
မအေးလေး

           ပေဖူးလွှာရဲ့" စာဖတ်သူများနဲ့ တွေ့ဆုံပေးခြင်း"ကဏ္ဍနဲ့ ပတ်သက်ပြီး အမြင်နှစ်မျိုးရှိနေကြတာ ကျွန်တော် တို့ တွေ့လာရပါတယ်။ တချို့က ၀ါရင့်စာပေပညာရှင်ကြီးတွေနဲ့ တွေ့ဆုံပေးခြင်းကို ဦးစားပေး သင့်တယ် လို့ ဆိုကြပြီး လူငယ်စာဖတ်ပရိသတ်ကျပြန်တော့လည်း သူတို့အကြိုက် လူငယ်၊ လူလတ် စာရေး ဆရာ၊ ဆရာမ တွေကို ဦးစားပေးစေချင်ကြပြန်ပါတယ်။ ဒီကဏ္ဍကို စပြီး စီစဉ်ကြကတည်းက စာဖတ်ပရိသတ် အရွယ်သုံးပါး စလုံး စိတ်ဝင်စားစေဖို့ ရည်ရွယ်ထားပြီးထားမို့ အလျဉ်းသင့်သလို တစ်လှည့်စီ သွားဖို့ စီစဉ် ထားပြီး ဖြစ်ပါတယ်။ ဒါကြောင့် ဒီလမှာတော့ လူငယ် စာဖတ်ပရိသတ်တို့ရဲ့ ဆန္ဒကို ဖြည့်စွမ်းပေးနိုင်ဖို့" မအေးလေး" နဲ့ တွေ့ဆုံပေးပါမယ်။

" ဆရာမ အရင်တုန်းက သန်လျင်ဘက်မှာ နေတယ်နော် "
" ဟုတ်ပါတယ် "
" စာပေလောကထဲ စရောက်တာကစပြီး ပြောကြရအောင်။ ကျွန်တော် ကြားဖူးတာကတော့ ဆရာမ သန်လျင် မှာ နေတုန်းက မြို့နယ်စာပေပြိုင်ပွဲမှာ ပထမရခဲ့ဖူးတယ်ဆို။ အဲဒါ ဘယ်နှခုနှစ်လောက်ကပါလဲ "
" ၁၉၆၇ ခုနှစ်ကပါ။ စာပေ၀ါသနာရှင်အသင်းက ပြုလုပ်တဲ့ ၀တ္ထု၊ ဆောင်းပါး၊ (မြို့နယ်လုံးဆိုင်ရာ) ပြိုင်ပွဲ မှာ အရင်ဆုံး ၀င်ပြိုင်ခဲ့တာပဲ။ အဲဒါ ၀တ္ထုရော ဆောင်းပါးပါ ပထမရရှိလို့ သတင်းစာမှာ ဓာတ်ပုံနဲ့ ဖော်ပြ ခံရပါ တယ်။ အဲဒီကစပြီး စာပေပိုးဝင်တာပဲ ဆိုပါတော့။ ကျောင်းနံရံကပ်စာစောင်က တောင်းလို့ ပေးတယ်။ ပေးတယ်လို့ သုံးရတာက ကျွန်မက သွားပေးရတာ မဟုတ်ဘူး။ ကျွန်မ ဆုရမှန်းသိလို့ နံရံကပ် အဖွဲ့က တောင်းတာကို ပေးရတာ။ အဲဒီနောက် ၁၉၆၈ ခုနှစ်မှာ "တို့မေမေ" ၀တ္ထုတိုကို ရေးပြီး ငွေတာရီ ကို ပို့လိုက် တယ်။

ငွေတာရီကို ပို့လိုက်တာကလည်းနော် ဆယ့်ငါးပြားတန် တံဆိပ်ခေါင်းကပ်ပြီး ပို့လိုက်တာပဲ။ ဘယ်သူနဲ့မှ သိလို့ ကျွမ်းလို့မဟုတ်ဘူး။ အသိုင်းအ၀ိုင်းထဲမှာလည်း စာရေးဆရာမရှိဘူး။ အဲဒီအချိန်တုန်းက ဘားမားစတား တို့၊ ဖလင်စတား တို့ ပေါ်နေတဲ့အချိန်။ ကျွန်မ အစ်မက အဲဒီတွေကို ပို့ပါလားတဲ့။ မဟုတ်ဘူး။ ကျွန်မက ငွေတာရီမှ ပို့ချင်တယ်ဆိုပြီး ပို့တာ။ သူက ပြောတယ်လေ။ နင် တိုးနိုင်မှာ မဟုတ်ဘူး တဲ့။ ဟိုမှာက စာရေးဆရာကြီးတွေမှ သုံးတာတဲ့။ ကျွန်မနဲ့သူ (အခု သူလည်း ညိုလဲ့ရည်ဆိုတဲ့ နာမည် နဲ့ စာရေးနေပါပြီ။) ရှင်းရှင်းပြောရရင် လောင်းကြေးစားကြေး လုပ်ပြီး ပို့တာ။ အဲဒီတုန်းက ငယ် သေးတယ်လေ။ ဆယ့်ရှစ်နှစ် သမီးပဲရှိသေးတော့ ကလေးဆန်တယ် ဆိုပါတော့။ ငွေတာရီကို ၁၉၆၈ ခုနှစ်က ပို့တဲ့ "တို့မေမေ" ဟာ ၁၉၆၉ ခု မေလကျမှ ပါလာပါတယ်။ ၀မ်းသာလိုက်တာ မပြောပါနဲ့တော့။ အဲဒီကစပြီး ၀တ္ထုရေးတော့တာပဲ။ ဒုတိယက "မြေးတို့ ဘွားဘွား" ၀တ္ထုတိုပါပဲ။ တတိယ ရေးတာက "သစ္စာတော်စူးပါစေ့ ဆိုဦးကပင်" ဆိုတာ မဂ္ဂဇင်းဝတ္ထုရှည် အစအဆုံး။ အဲဒါတွေကျတော့ ငွေတာရီမှာ သိပ်မစောင့် ရတော့ဘူး။ လေး ငါးလလောက် စောင့်ရပါတယ်။

ကျွန်မ ပြောတာ များနေပြီလား မသိဘူး။ စာပေ၀ါသနာပါတဲ့ စာချစ်သူတွေ လေ့လာကြိုးစားရအောင်လို့ ပြည့်စုံအောင် ကျွန်မ ပြောတာပါ။ အဲဒီနောက် မြ၀တီ၊ သွေးသောက်၊ စန္ဒာ၊ တိုင်းရင်းမေ၊ ရှုမ၀၊ ရှေ့သို့ ... စုံအောင် ကျွန်မ ရေးပါတယ်။ ၁၉၇၅ ခုနှစ်မှာမှ လုံးချင်းလောကထဲ ကျွန်မ ၀င်ခဲ့တာပါ။ အဲဒါကလည်း ဆရာ ဦးတင့်တယ်က "မိအေး၊ ညည်း လုံးချင်းမရေးသေးဘူးလား၊ ကိုယ့်နောက်မှ ရေးတဲ့လူတွေက တစ်ယောက်ပြီး တစ်ယောက် စွဲနေကြပြီ၊ ရေးပါတော့လား"တဲ့။ ဆရာ့ စကားကြောင့် ကျွန်မကိုယ် ကျွန်မ စဉ်းစားမိတယ်။ ငါ လုံးချင်းရေးတဲ့အထိ ဖြစ်ပါ့ မလားလို့။ သိပ်ပြီး မထင်ဘူးလေ။
အဲဒီနောက်တော့ ကျွန်မ ခင်ပွန်းသည်ရဲ့ ကျေးဇူးပဲ ဆိုပါတော့။ သူက အားပေးတယ်။ ရေးစေချင်တယ်။ ကျွန်မကို ကဉ္စနစာပေ ကို ခေါ်သွားတယ်။ ခေါ်သွားတယ် ဆိုတာက လိပ်စာကြည့်ပြီး သွားတာ။ အန်တီကြီး တို့နဲ့ မသိပါဘူး။ အဲဒီကနေပဲ ကျွန်မ လုံးချင်းရေးဖြစ်တာ။ စရေးတဲ့ ၀တ္ထုက "လွမ်းကြိုး ကုဋေပြပါစေ" ဆိုတာပါ။ ကျွန်မနဲ့ ကဉ္စနစာပေက ကံစပ်လို့လည်း ပါတာပေါ့လေ။ ကျွန်မ အတွက် ကံကောင်းချင်တော့ စစချင်း အုပ်မှာပဲ အုပ်ရေ နှစ်ထောင်ရိုက်တာ အုပ်ရေ နှစ်ထောင် ကုန်ပါတယ်။ အဲဒီ ကနေဆက်ပြီး မနားတမ်း ရေးရတော့တာပါပဲ"

" ကလောင်နာမည် မအေးလေးလို့ ယူခဲ့တာ သီးခြားအကြောင်းများ ရှိပါသလား ဆရာမ"
" ကျွန်မ ကလောင်နာမည် ယူခဲ့တာကတော့ ရှင်းရှင်းလေးပါ။ ကျွန်မ နာမည်ရင်းက "အေးအေးမူ"ပါ။ ကျွန်မ ကိုယ်ကျွန်မ စကားပြောရင်လည်း "အေးမူ"က "အေးမူ" ကနဲ့ပဲ သုံးတတ်ပါတယ်။ အိမ်က ခေါ်ရင်လည်း အေးအေးမူပါပဲ။ ကျွန်မ အဘွား ဒေါ်ညီမကလည်း ဒီလိုပဲ ခေါ်နေကျပါ။   အဲ ... သူက လူကြီးရောဂါ နဲ့ မကျန်းမမာ ဖြစ်နေချိန်မှာ ကျွန်မ ဆယ့်သုံးနှစ်သမီးပဲရှိပါသေးတယ်။ နင်းခိုင်း၊ နှိပ်ခိုင်းရင် ကျွန်မ က အမြဲပဲ နင်းပေးမယ် နှိပ်ပေးတယ်လေ။ အဲဒီအချိန်မှာ သူ ကျွန်မကို ချစ်ပဲ ချစ်လို့လား၊ ကျေးဇူးပဲ တင်လို့လေမသိဘူး၊ ပြောင်းခေါ်တယ်။ "မအေးလေး" "မအေးလေး"နဲ့ ပြောင်းခေါ်လာလိုက်၏ ဆုံးခါနီး အထိ တဖွဖွ ခေါ်သွားခဲ့တာ၊ ကျွန်မ မမေ့နိုင်ဘူး။ စောစောက ကျွန်မ ပြောခဲ့တဲ့ ဆယ့်ရှစ်နှစ်သမီး အရွယ် မြို့နယ် ပြိုင်ပွဲဝင်ဖို့ ကလောင်နာမည် ရွေးတော့ အဘွားပေးတဲ့ နာမည် "မအေးလေး"ကိုပဲ သတိရတယ်။ အဲဒါနဲ့ ဒီနာမည်ကို ပေးလိုက်တာပဲ။ ဘာဗေဒင်မှ မမေးဘူး။ ဘယ်သူ့အရိပ်မှ ကျွန်မ ခိုလိုက်တာ မဟုတ်ပါဘူး။

အဲဒီနာမည်နဲ့ ၀တ္ထုတိုလေးတွေ၊ မဂ္ဂဇင်းဝတ္ထုရှည်တွေ ရေးတဲ့ ကျေးဇူးပဲပေါ့လေ၊ ကဉ္စနစာပေကို ကျွန်မ ရောက်တော့ "မအေးလေး"ဆိုတာနဲ့ပဲ မမမိ (ဒေါ်ခင်မိမိ)က သိတယ်။ ကျွန်မ ၀တ္ထုတွေကို ကြိုသိ နေခဲ့တယ်။ ကြိုက်တယ်လို့ ပြောတယ်။ ဒါပေမဲ့ အန်တီကြီးက လုံးချင်းဝတ္ထုတွေ ရေးတဲ့နေရာမှာ နာ မည်ပြောင်းစေချင်တယ်လို့ ပြောတယ်။ မအေးလေးဆိုတာက ရိုးလွန်းတယ်ပေါ့လေ။ ကျွန်မက ငြင်းလိုက် တယ်။ ဆန်းတာတွေက ရိုးသွားနိုင်ပါတယ်။ ရိုးတဲ့နာမည်က ထပ်ပြီးမရိုးနိုင်တော့ဘူးလို့။ ပြီးတော့ ကျွန်မ အဘွား ပေးခဲ့တဲ့ နာမည် ကျွန်မ ပြောင်းနိုင်ဘူးလို့ ဆိုတော့ စိတ်ထဲ သိပ်ကျေနပ်မှာတော့ မဟုတ်ဘူး။ ဒါပေမဲ့ ဒီနာမည်ပဲ သုံးဖို့ လက်ခံကြပါတယ်။ ကျွန်မ အနေနဲ့ကလည်း ဒီနာမည်နဲ့ ပရိသတ်ကို ချုပ်ကိုင် မိနေမှတော့ ဒီနာမည်ကို ပြောင်းပြီး လုံးချင်းရေးဖို့ ၀န်လေးပါတယ် "
" ဆရာမ ၀တ္ထုတစ်ပုဒ်ကို ဖန်တီးတဲ့နေရာမှာ ဘယ်လို ဖန်တီးယူပါသလဲ။ ဇာတ်ကောင်စရိုက်နဲ့ ဇာတ်လမ်း ဘယ်ဟာကို ဦးစားပေး ဖန်တီးတတ်ပါသလဲ "
" ဖန်တီးယူတယ် ဆိုတဲ့စကားက လုပ်ယူတယ် ဆိုတဲ့ စကားမို့ ကျွန်မ သိပ်မကြိုက်လှဘူး။ ဒါပေမဲ့ ထားပါ တော့။ အစ်ကို့ အနေနဲ့က ဒီလိုပဲ သုံးရမှာကိုး။ ကျွန်မက လူတစ်ယောက်နဲ့ စကားပြောရင် အဲဒီလူရဲ့ လေယူ လေသိမ်း၊ ပုံစံ၊ အပြုအမူလေးတွေ၊ သူ့ရဲ့ ပင်ကိုစရိုက်ကို ကျွန်မရဲ့ စိတ်က ထုတ်ယူ သိမ်းထားပြီးသား ဖြစ်နေတတ်ပါတယ်။ အဲဒါကို အစက ကျွန်မ သတိမထားမိသေးပါဘူး။ ကျွန်မ စာရေး တဲ့ နေရာမှာ သူနဲ့ ခွင်ကျမယ့် နေရာမှာ အဲဒီလူရဲ့ပုံစံ၊ လေယူလေသိမ်းတွေက အစ ရောက်လာတတ်မှ ကျွန်မ စိတ် ကို ကျွန်မ သတိပြုမိပါတယ်။

လုံးချင်းဝတ္ထု ရေးတဲ့အခါမှာတော့ ဌပနာ နိုင်းချင်း ထည့်ထားတဲ့ အစာသွတ်မုန့်လို ကျွန်မတို့အနေနဲ့ ဒေသန္တရ ဗဟုသုတတွေရော၊ ထိုက်သင့်တဲ့ ပညာပေးလေးတွေ၊ သိသင့်သိထိုက်တာလေးတွေ ရောမွှေပြီး မှ ကိုယ် ပြောချင်တဲ့စကားကို ဦးတည်ပြီး ပြောတာပါပဲ။
ဒါပေမဲ့ ၀မ်းနည်းစရာကောင်းတာက စာရေးဆရာ အချင်းချင်းထဲမှာရော၊ ဗဟုသုတတွေ အတတ်ပညာ တွေ ပြည့်စုံနေပါပြီလို့ ကျွန်မတို့ အမြင်ရှိထားတဲ့ ဆရာ၊ ဆရာမကြီးတွေကတောင် စာရေးဆရာ ပြောချင်တဲ့ စကားအဓိပ္ပာယ်ကို ကောက်နုတ်ပြီး မယူတတ်ကြဘူး။ ဒါက အချစ်ဝတ္ထုရေးဆရာ၊ ဒါက ဘ၀သရုပ်ဖော် ဆိုပြီး နာမည်တပ်ပစ်လိုက်တာပဲ။ အဲဒါတွေ ခက်နေတာ။

ဥပမာ-ပြောရရင် ကျွန်မ မအေးလေးကို ဆိုရင် အချစ်ဝတ္ထုရေး စာရေးဆရာလို့ပဲ ဖြစ်နေကြတယ်။ မအေးလေး စပြီး ရေးခဲ့တဲ့ ၀တ္ထုက "တို့မေမေ"နော်၊ အဲဒါ ဘ၀ သရုပ်ဖော်ပဲ။ ဆက်ပြီးရေးတဲ့ "မြေးတို့ ဘွားဘွား" တို့၊ "သည်မောင်နှမ"တို့ ... ကျွန်မ ၀တ္ထုတို ရေးရင်အချစ်ကို သိပ်မရေးဘူး။ ၀တ္ထုရှည်မှာ ဘ၀ သရုပ်ဖော်ချည်းပဲ မရေးဘူး။ ဘာလို့လဲ၊ အိုင်မှာစိုးလို့။ ငြီးငွေ့မှာစိုးလို့။ စာဖတ်သူကို ဆွဲဆောင် ခေါ်ယူတဲ့ နေရာမှာ ဖျော်ဖြေရေးဟာ မပါမဖြစ်တဲ့ ကဏ္ဍပဲ။ အဲဒီထဲမှာမှ ကိုယ် ပြောချင်တဲ့စကား၊ ကိုယ်ပေးချင်တဲ့ ပညာကို သိမ်သိမ်မွေ့မွေ့လေး၊ မသိမသာလေး ထည့်ပေးရတာ။ "ပညာပေး" "ပညာပေး" ဆိုပြီး အတုံးလိုက်၊ အတစ်လိုက် ထည့်ပေးမှ သိတဲ့လူဆိုရင်လည်း မကောင်းပါဘူး။ မြတ်စွာဘုရားတောင်မှ တရားပြတာ ၀တ္ထုကြောင်းနဲ့မှ တရားပြ၊ သောတာပန် ဖြစ်ကြတာ တစ်ပုံကြီး၊ ပဋာစာရီ ဇာတ်ထုပ်မှာ မပဋာ၊ ကိုဒါသ နဲ့ ကြိုက်၊ လိုက်ပြေးတာ ပါသေးတာပဲ။ ဒါကို အချစ်ဝတ္ထုလို့ ပြောရကောလား။

ဝတ္ထုရှည်ပြီးတော့ ၀တ္ထုတို၊ အစ်ကိုတို့ ပေဖူးလွှာမှာ ကျွန်မရေးတဲ့ "အလှူ" ဆိုတာ အလှူနှစ်ခုကို ယှဉ်ပြီး ရေးပြတယ်။ ကျွန်မ မြင်တဲ့အမြင်၊ ကျွန်မသိတဲ့ အသိကု ပရိသတ်ကို ဖြန့်ပေးတာပဲ။ ဖြစ်လေ့ဖြစ်ထရှတဲ့ သဘော။ လူ့သဘော လူ့သဘာဝ၊ ကျွန်မတို့ ဒါတွေကို လွှတ်လို့ဖြစ်မလား။ ကျွန်မ စာရေးတာ လူ့သဘာဝ ကို လက်လွှတ်ပြီး လက်လွတ်စပယ် တစ်ခါမှ မရေးပါဘူး။
မေးခွန်း မေးတာထက် ဖြေတာက နည်းနည်းရှည်နေပြီနော်၊ ဒါပေမဲ့ စကားတွေ အများကြီး ပြောချင် သေးတယ်။

ပြောချင်တာတွေကလည်း များနေတယ်လေ။ ကျွန်မတို့ တာမွေက ထွက်တဲ့ စာသဝဏ်မဂ္ဂဇင်းမှာ ကျွန်မ ရေးတဲ့ "သူတကာထက် တို့ကသာတယ်" ဆိုရင် မဂ္ဂဇင်းဝတ္ထုရှည်ပဲ၊ ကျွန်မတို့ ဇနီးမောင်နှံနှစ်ယောက် တာမွေအ၀ိုင်းထိပ်ကို လမ်းလျှောက်သွားရင်းနဲ့ မီးပူပြင်ဆိုင်မှာ မီးပူ ၀င်ပြင်တယ်။ အဲဒီနံဘေးမှာ ကျွန်မ ငေးမိ ငေးရာ ငေးတော့တာပဲ။ ကျွန်မ မြင်ကွင်းထဲ တည့်တည့်မတ်မတ် ကျလာတာက ဆိုက်ကားဆရာ။ "ဆိုက်ကား စီးမလား၊ ဆိုက်ကား"လို့ မေးတဲ့ဟန်၊ သူ့ရဲ့ မျက်လုံး။ မျက်လုံးထဲက မျှော်လင့်ချက်တွေနဲ့ ပြည့်နေ တဲ့ မျက်လုံးနော်။ လူတစ်ယောက် အနားရောက်လာရင် ဘဲလ်တီးတဲ့ပုံစံ။ လူက သူ့ကို ကျော်သွားရင် ပင့်သက်ချလိုက်တဲ့ဟန်၊ ဆန္ဒစောနေတာတွေ၊ ရင်မောနေတဲ့ဟန်တွေ သူ့ဆီမှာ တစ်ခါ တည်း တွေ့နေရတယ်။

ကျွန်မတောင်မှ သူ့ကို ကြည့်ပြီး ဟိုလူ သုတ်သုတ်သုတ်သုတ်နဲ့ လာနေတာ၊ ဆိုက်ကားစီးမလို့လား၊ ဟင် ... မစီး ပြန်ဘူး၊ ကျော်သွားပြန်ပြီဆိုတဲ့ စိတ်တွေ ၀င်လာတယ်။
မီးပူ ပြင်ပြီးလို့ "ပြန်ကြစို့မလေး" လို့ ခင်ပွန်းသည် ခေါ်တော့ ပြန်သာ လာရတယ်။ စိတ်က ဆိုက်ကားဆရာ ဆီမှာ ကျန်ရစ်တယ်။ ဆိုက်ကားဆရာရဲ့ မျက်လုံးတွေက ကျွန်မကို စကားတွေ အများကြီး ပြောလိုက်သလိုပဲ။ နောက်တစ်နေ့ ၀တ္ထုရေးမယ်လုပ်တော့ အဲဒီဆိုက်ကားဆရာက စိတ်ထဲက မထွက် တော့ဘူး။

ဒါနဲ့ပဲ ကျွန်မ ဆိုက်ကားဆရာရဲ့ ဘ၀ကို ရေးဖြစ်တာပဲ။ အဲဒီတော့ အစ်ကိုမေးတဲ့ ဇာတ်ကောင်စရိုက်နဲ့ ဇာတ်လမ်း၊ ဘယ်ဟာကို ဦးစားပေး ဖန်တီးသလဲ၊ အစ်ကို့ဘာသာစဉ်းစားသာကြည့်ပါတော့"
" ခံစားချက် တစ်ထမ်းတစ်ပိုးကြီးနဲ့ စာရေးတတ်တဲ့ စာရေးဆရာရဲ့ ဘ၀၀န်ထုပ်ဝန်ပိုးကြီး သယ်ပြီး တောင်တက်ရတာနဲ့ တူတယ်လို့ ဆရာမ ရေးတာ ဖတ်ရဖူးတယ်။ ၀တ္ထုတစ်ပုဒ်ရေးရာမှာ ဇာတ်ကောင်ရဲ့ ခံစားချက် ကို ဆရာမ ခံစားရေးပါသလား၊ ဆူရာမ ရေးခဲ့သမျှထဲမှာ ဘယ်ဝတ္ထုကို အခံစားရဆုံးပါလဲ"

" အစ်ကို့မေးခွန်းကို ကျွန်မက စောစောကတည်းက ကြိုပြီး ဖြေလိုက်သလို ဖြစ်သွားပြီထင်တယ်၊ စောစော က ဥပမာပြတဲ့ ဆိုက်ကားဆရာ နေရာမှာ ကျွန်မ နေရာဝင်လိုက်တာပဲ။ ကျွန်မဟာ ကျွန်မ မဟုတ် တော့ဘူး။ ဆိုက်ကားဆရာဘ၀ကို ၀င်ယူတယ်၊ ၀င်ပြီး ခံစားတယ်။ စာရေးနေတဲ့ အချိန်မှာ ကျွန်မဟာ မအေးလေး မဟုတ်တော့ဘူးလေ။ ဆိုက်ကားဆရာ ကိုသန်းစိန်။
ကိုသန်းစိန် ဖြစ်သွားပြီးတော့ လူမှုအရှုပ်အထွေးတွေ၊ အခက်အခဲတွေ၊ အတက်အကျ သဘောတွေကို သူဟာ လူပေါင်းစုံနဲ့ ဆုံနေရတော့ ဒီလိုပဲ တွေ့ရမှာပဲလို့မြင်တယ်၊ မြင်တဲ့အတိုင်းရေးတယ်။ ခံစားပြီးတော့ ရေး တယ်။

ဇာတ်ကောင်ရဲ့ ခံစားချက်ကို ကျွန်မ ခံစားပြီးမှ ရေးတာချည်းပါပဲ။ ကျွန်မ ရေးခဲ့သမျှထဲမှာ မကြာခင်က ထွက်တဲ့အုပ် ၄၀ မြောက် ၀တ္ထု"တို့ကို နားလည်ရင် ကျေနပ်ပါပြီ"လို့ ပိုပြီးကြိုက်တယ်။ ဘာလို့လဲဆိုတော့ "ပန်သစ္စာ"ကို စာရေးဆရာမဘ၀ အပ်နှင်းထားတော့ ကျွန်မ ကိုယ်တိုင်ကလည်း စာရေးဆရာမ၊ ပိုပြီးခံစားလို့ ကောင်းတယ်။ ရေးလို့ကောင်းတယ် ပန်သစ္စာနဲ့ ကျွန်မဟာ တစ်ပြေးညီတည်းဖြစ်သွားတယ်။ ပြောချင် တာတွေကို ရေးချင်တာတွေကို "ပန်"က ကျွန်မကိုယ်စား ပြောပေးသွားသလိုပဲ။ ကျွန်မဟာ "ပန်"၊ "ပန်"ဟာ ကျွန်မ ခွဲမရအောင် ရှိသွားတယ်။
အဲဒီလိုပဲ၊ စာဖတ်သူရဲ့ စိတ်ထဲမှာလည်း ကျွန်မနဲ့ ပန်ကို တစ်ယောက်တည်း သတ်မှတ်ကြတာတွေကို တွေ့ရတယ်။ ခံစားချက်နဲ့ ရေးသလား၊ မရေးသလား ဆိုလို့ ရယ်စရာပြောရဦးမယ်။ ကျွန်မ ကိုယ်ဝန် အရင့် အမာကြီး နဲ့ ရှိချိန်မှာ ရေးတာက "ခြေချရာလမ်းမှ နှလုံးသားကလေးများ" ဆိုတဲ့ အငြိမ့်မင်းသမီး "ယမင်း" ဇာတ်လမ်း။

အဲဒီဇာတ်လမ်းရေးပြီး ငါးရက်အကြာမှာ သမီးကို မွေးတာပဲ။ သမီးဟာ လက်လှုပ်တတ်ကတည်းက "ချို မိုင်မိုင်" ကတယ်။ ဘယ်သူမှ သင်မပေးဘဲနဲ့နော်။ ဟော ... ထနိုင်ရပ်နိုင်တာနဲ့ ကတော့တာပဲ။ ကျွန်မလည်း စဉ်းစားတယ်။ တို့မျိုးရိုးထဲမှာ သဘင်သည်လည်း မရှိပါဘူးလို့ပေါ့။ နောက်မှ သတိရတော့မှ "သြော် ... သူ့ကို ကိုယ်ဝန်ကြီးနဲ့ ရေးမိတဲ့ ဇာတ်လမ်းက အငြိမ့်မင်းသမီးကိုး"လို့။ သူက သိပ်ဝါသနာ ပါနေတော့လည်း "ကဲ ... ကဲ" ဆိုပြီး လွှတ်ပေးလိုက်တာ။ မနှစ်က မူကြို (၁)မှာလေ။ ဂျပန်လူငယ် သုံးရာကျော် ကို တစ်ခါမှ စင်ပေါ် မတက်ဖူးသေးတဲ့ သမီးက "စင်တော်မင်းသမီး"အကနဲ့ ဧည့်ခံလိုက်တာ ကြော့လို့။

အစ်ကိုတို့ တွေ့မှာပေါ့၊ ၀တ္ထုတိုပေါင်းချုပ်မှာ သားနဲပသမီးပုံ မျက်နှာဖုံးထည့်ပေးလိုက်တာ။ သမီးက က လို့လေ။ စကော့ဈေး ထဲ သွားရင် မင်းသမီးအ၀တ်လှလှ ဆိုင်ရှေ့က မခွာတော့တာနဲ့ စိတ်ကျေနပ်အောင် ၀ယ်ပေး ထားရတဲ့ မင်းသမီးအ၀တ်နဲ့။
ကဲ ... အဲဒီတော့ စာရေးတဲ့ အချိန်မှာ ရှိနေတဲ့ ကျွန်မရဲ့ စိတ်က ဇာတ်ကောင်ရဲ့ စိတ်နဲ့ စရိုက်ပဲ ဆိုတာ ပြောဖို့ လိုပါဦးမလား "
" တို့ကို နားလည်ရင် ကျေနပ်ပါပြီ ၀တ္ထုထဲက ဆရာမ အယူအဆတစ်ခု ဆွေးနွေးခွင့်ပြုပါ"
" ပြောပါ ... အစ်ကို ဆွေးနွေးချင်တာ ဆွေးနွေးပါ"

" ဆရာမက ဒီလို ဆိုတယ်။ "မိန်းမတို့သည် သစ္စာနှင့် မေတ္တာကို အင်အားပြုလျက် အိမ်ထောင်တည်ခြင်း အမှု ကိုပြု၏။ ယောက်ျားတို့သည်ကား ပိုင်ဆိုင်ရယူလိုမှုတစ်ခုအတွက် အိမ်ထောင်ပြု၏"တဲ့။ အိမ်ထောင် သည် မိန်းမတိုင်းဟာ သစ္စာနဲ့ မေတ္တာကို အင်အားမပြုကြသလို၊ ယောက်ျားတိုင်းဟာလည်း ပိုင်ဆိုင် ရလိုမှု တစ်ခုတည်းအတွက် အိမ်ထောင်ပြုကြတာ မဟုတ်ပါဘူးဆိုရင် ဆရာမ ဘယ်လို ယူဆမလဲ "
" အစ်ကို့ မေးခွန်းထဲမှာပဲ အစ်ကို့အဖြေက ပါနေပြီပဲ။ အိမ်ထောင်သည် မိန်းမတိုင်း၊ ယောက်ျားတိုင်း ဆိုတဲ့ စကား မှာကိုပဲ "တချို့"ဆိုတဲ့ စကားက ခြွင်းချက် ပါမနေဘူးလား၊ "တချို့"မိန်းမတွေကျတော့ သစ္စာနဲ့ မေတ္တာ ကို အင်အားပြုတယ်ပေါ့။
တချို့ ယောက်ျားတွေ ကျတော့ ပိုင်ဆိုင် ရယူလိုမှုအတွက် အိမ်ထောင်ပြုတယ်ပေါ့ ဟုတ်လား။

အစ်ကို ၀န်ခံမလား ...
ဒါဖြင့်ရင် ကျွန်မ ပြောတာ အဲဒီ "တချို့" အတွက် ပြောတာဆိုရင် အစ်ကို လက်ခံမလား။ အဲဒီ "တချို့" က လည်း လူများစု ဖြစ်နေလို့ "ယောက်ျားတို့သည် မိန်းမတို့သည်" လို့ ကျွန်မ သုံးတာပေါ့။ မဟုတ်ဘူးလား။
မလုပ် နဲ့နော်၊ အစ်ကို၊ ကျွန်မက စာရေးဆရာမလေ။
ကိုစိုးက ဒါကြောင့် ပြောတာ ထင်ပါရဲ့၊ "စကားတတ်တိုင်း ကတ်မပြောနဲ့"တဲ့ ပန်ကို ပြောတာလေ ... အဟဲ "
" ဒါဆို ပန်ကို ကိုစိုးရှေ့မှာပဲ စကားကတ်ရလိမ့်မယ် ထင်တယ်။ ပန်က ... အဲလေ ... ဆရာမက "မိန်းမတို့ သည်၊ ယောက်ျားတို့သည်" ဆိုတော့ အားလုံး ပါသွားတယ်လေ။ အခုမှ ဆရာမက တချိုကလို့ ပြောတာ ကိုး။ "ယောက်ျားတို့သည်" ဆိုတော့ ကျွန်တော်ကလည်း အချစ်ရှေ့နေလိုက်မိတာပါ ဆရာမရေ ... ကဲ ဆက်လိုက် ကြရအောင်။

အချစ်ဝတ္ထုတွေ ဆက်တိုက်ရေးလာတဲ့ ဆရာမအနေနဲ့ "ချစ်ခြင်းမေတ္တာ"အပေါ် ဘယ်လို ယူဆပါသလဲ"
" ချစ်ခြင်း မေတ္တာကြောင့်ကိုပဲ ကျွန်မတို့ ကမ္ဘာကြီး အဓွန့်ရှည်နေနိုင်တာပေါ့အစ်ကိုရာ။ "အချစ်"ဟာ မရှိ မဖြစ် တဲ့ ရတနာပါပဲ။ အချစ်ကို ကျော်လွှားနိုင်သူရယ်လို့ ဘယ်သူရှိလို့လဲ။ အဲဒီကမှတစ်ဆင့် ပေါက်ဖွား လာတဲ့ သံယောဇဉ်တို့ မေတ္တာတို့ကြောင့် လောကကြီး သာယာစိုပြည်နေတာပေါ့။ ဒါက လူငယ်အမြင်နဲ့ ပြော တာပါ။

စာရေးဆရာမ တစ်ယောက်။
ပြီးတော့ ...
တည်ငြိမ်စိတ် နဲ့ ရှုကြည့်ဝေဖန်ပြီး ပြောရရင် တကယ်တော့ ချစ်ခြင်း၊ မုန်းခြင်း။ ဆိုတာတွေ အားလုံးဟာ "စိတ်" ပါပဲ။
ကျွန်မ ရေးတဲ့ဝတ္ထုကို အချစ်ဝတ္ထုလို့ခေါ်သလား။
ကျွန်မ ၀တ္ထုတွေကို အကုန်လုံး အစ်ကို ဖတ်ကြည့်ပြီးမှ နာမည်တပ်သင့်တယ်။
"မြရည်နန္ဒာမှ သဲစုရည်"ကို ဖတ်ပြီးရင် အစ်ကို ဘယ်လိုပြောမလဲ။ ကျွန်မ သိချင်လိုက်တာ "
" နေဦး ဆရာမ၊ ကျွန်တော်က အချစ်ဝတ္ထုတွေ ရေးလာတဲ့ ဆရာမလို့ ပြောလိုက်လို့ ဆရာမ ခံပြင်းသွားပုံ ရတယ်။ စောစောက ဆရာမစကားနဲ့ပဲ ပြန်ကောက်ရရင် အများစုက အချစ်ဝတ္ထု ဖြစ်နေတာမို့ ကျွန်တော် ခြုံပြီး ပြောလိုက်တာပါ"

" အစ်ကို ရှာဖွေဖတ်ကြည့်ပါ။ ကျွန်မ ရေးသမျှ ၀တ္ထုတွေထဲမှာ စိတ်ပိုင်းဆိုင်ရာ ပညာပေးလေးတွေ ပါ ပါတယ်။ ပညာ ဆိုတာကလည်း ယူတတ်မှ ရတယ်လေနော် "
" Ghost Writter" တွေနဲ့ ပတ်သက်ပြီး တော်တော် မကျေနပ်တာတွေ ဆရာမ ၀တ္ထုထဲမှာ ဖတ်ရဖူး ပါတယ်။ ဆရာမက ဒီလို ရေးပေးတဲ့ လူတွေကို မရေးသင့်ဘူးလို့ ယူဆတယ်။ အပြစ်တင်ထားတယ်။ ဒီနေ့ စာပေ လောကမှာ "ငါ့ဝမ်းပူဆာ မနေသာ" လို့ နောက်ကွယ်က ရေးနေကြရတဲ့ ကလောင်အိုကြီးတွေ၊ စာပေကို ရေးနေရရင် ကျေနပ်ပြီး ကိုယ်ရေးတဲ့စာ ပုံနှိပ်စာလုံးလေးတွေနဲ့ မြင်ချင်လွန်းလို့ ကိုယ့်နာမည် တပ်ခွင့် မရ သည့်တိုင် သူများနာမည်နဲ့ ရေးပေးနေကြရတဲ့ စာပေ၀ါသနာရှင်တွေ အများကြီး ရှိပါတယ်။

ဒီတော့ နောက်ကွယ်က ရေးနေကြရတဲ့သူတွေထက် စာရေးဆရာ အမည်ခံချင်ကြတဲ့ ငွေရှင်တွေမှာ ပိုပြီး တာဝန်မရှိပေဘူးလား "
" ဟုတ်တယ်။
" အေပရယ်လ်၏ နွေအနမ်း" ထဲမှာ ကျွန်မ ရေးထားပါတယ်။
ကျွန်မက အစစ်အမှန်ကိုပဲ လက်ခံတတ်တဲ့သူလေ။ စကားပြောရင် ကျွန်မ ရှေ့မှာ မဟုတ်မဟတ် လာပြော ရင်တောင် အော်ထုတ်ပစ်တတ်တဲ့သူ။
လောကကြီးမှာ "ငါ့ဝမ်းပူဆာ မနေသာလို့ " လုပ်ကြစတမ်းဆိုရင် ရာဇ၀တ်မှုတွေ ပြည့်ကုန်မှာပေါ့။
ကျွန်မ ကြိုက်တာက ... လျှာ မြက်ပေါက်ပါစေ ဘယ်သူ့ထဘီနားမှ ခိုမစားဘူး၊ ဘယ်သူ့ခြေဖျားမှ ဦး မတိုက်ဘူး။
ခိုးမစားဘူး၊ ဓားပြတိုက် မစားဘူး ဆိုတဲ့ စကားမျိုး၊ မာနမျိုး။

ခုတော့ ... အစ်ကိုက ဒီလိုစကား သုံးလာတော့ အံ့သြလိုက်တာ။
ငွေရှင်တွေ "အခွင့်ကောင်း"ယူဖို့ ဖြစ်လာအောင် လုပ်တဲ့သူကလည်း ရှိနေတာကိုး။ ရောင်းတဲ့သူ မရှိရင် ၀ယ် တဲ့ သူ ရှိပါ့မလား။
ရေးပေးမယ့်သူမရှိရင် နာမည်ခံက ရှိပါ့မလား။ ဒီကိစ္စတွေက ခုမှ ပေါ်လာတာပါ။ စာပေဈေးကွက် ကောင်းလာ မှ ဆိုပါတော့။
ဟိုးအရင် ၀တ္ထုလောကမှာ ဒါမျိုး မရှိဘူး။ မိန်းမနာမည်နဲ့မှ ရောင်းကောင်းတယ်ထင်ရင်၊ ထွက်ချင်ရင် ယောက်ျား က မိန်းမနာမည်တပ် ထွက်တာပဲ ရှိတယ်။
သိန်းသိန်း ဆိုပြီး ဒီနေ့ ကန်တော့ခံနေရတဲ့ ဆရာကြီးက ယောက်ျားပဲ။ ဒီလိုပဲ ဖြစ်ရမှာပေါ့။

ဝမ်းစာရေးအတွက် မြန်မာပြည်မှာ မုန့်ဟင်းခါး ရောင်းစားမလား၊ ဘိန်းမုန့်ရောင်းမလား၊ ကြိုက်တာ လုပ်လို့ရတယ်။ စာပေ၀ါသနာပါရင် မဂ္ဂဇင်းတိုက်တွေပို့၊ အဆင့်မီရင် ရွေးလိမ့်မယ်၊ ပါလိမ့်မယ်။
ဝါသနာ နဲ့ ၀မ်းစာရေးကို တွဲပြီး ယူကတည်းကိုက အစ်ကို မှားနေပြီနော်။ သူတို့တွေက ပြောလို့ ပြောရတာ ဆိုရင်လည်း ကျွန်မ ပြောတဲ့အတိုင်း ပြောပေတော့။
မအေးလေးဆိုတာ ကိုယ်တိုင် ကြိုးစားပြီး အောင်မြင်လာတဲ့နာမည်ပါ။ ကိုယ်တိုင် ကြိုးစားတဲ့သူကိုပဲ ကျွန်မ တော့ အားပေးတယ် "

" စာပေပဲ ရေးတတ်တဲ့ လူတစ်ယောက်က မုန့်ဟင်းခါး ဘယ်လို ချက်တတ်မလဲ၊ ဘိန်းမုန့် ဘယ်လို ဖုတ် တတ်မလဲ။ ဒါက တစ်ကြောင်း ထားပါလေ၊ ဆရာမ စာပေလောကထဲ စ၀င်တဲ့ ၁၉၆၈ ခုနှစ်လောက်က တောင် စာမူတစ်ပုဒ် မဂ္ဂဇင်းထဲပါဖို့ တစ်နှစ်စောင့်ရတယ်။ ဒီနေ့ မဂ္ဂဇင်းတွေမှာ လူသစ်တစ်ယောက်ရဲ့ ၀တ္ထု တစ်ပုဒ် ပါလာဖို့ဆိုတာ ဘယ်လောက်စောင့်ရတယ်ဆိုတာ ဆရာမ သိမှသိပါ့မလား။ မပြောတတ် ဘူး။ ကျွန်တော်တို့ မဂ္ဂဇင်းမှာ လွန်ခဲ့တဲ့ နှစ်နှစ်လောက်က ရွေးထားတဲ့ ၀တ္ထုတိုတွေ လက်ကျန် ရှိနေ သေးတယ်။ ၀ါသနာနဲ့ ၀မ်းစာ ကျွန်တော် တွဲပြောတာက ၀ါသနာပါတာကို လုပ်နေရုံနဲ့ လူတွေမှာ အာဟာရသိဒ္ဓိ မပြီးကြ သေးဘူး။ ထမင်းစားရဖို့ကလည်း အရေးကြီးတယ် မဟုတ်လား။ ဆရာမကတော့ ၀ါသနာ ပါတာကို လုပ်ရုံနဲ့ ၀မ်းစာပြည့်နေတာကိုး။ လူတိုင်းက ဆရာမတို့လို မထုတ်နိုင်ဘူး ဆရာမရဲ့။ ဒါကို ငြင်းနေရင်တော့ မုန့်လုံးစက္ကူကပ် ဖြစ်နေတော့မယ်။ ဖြတ်လိုက်ကြစို့။

စာပေဟောပြောပွဲတွေ ဆရာမ လိုက်ပါသလား။ စာပေဟောပြောပွဲနဲ့ ပတ်သက်ပြီး ဆရာမ ဘယ်လို မြင်ပါသလဲ "
" စာပေဟောပြောပွဲကို ကျွန်မ၊ ယုဝတီရွေဝါစိန်၊ အီကြာကွေး၊ တက္ကသိုလ်မင်းညိုတို့နဲ့ တွဲပြီး စမ်းချောင်း မှာ ဟောဖူးပါတယ်။
ဒုတိယတစ်ခါက မင်းသား ကြည်စိုး၊ စိုးရွှေရယ်၊ ဒါရိုက်တာ မောင်နေမျိုးရယ်၊ ကျွန်မရယ်။ ပြီးတော့ ကလောင်သစ် တစ်ယောက် ရယ် တွဲပြီး သင်္ဃန်းကျွန်းမှာ ဟောဖူးပါတယ်။
တတိယ တစ်ခါကျတော့ ဆရာဝန်က တားမြစ်ထားလို့ မလိုက်တော့ပါဘူးဆိုလို့ ကြားက ပရိသတ်က တောင်း ဆိုလို့ ယုဝတီခင်ဦး ရယ်၊ မင်းသင်္ခရယ်၊ ဆရာသိပ္ပံမှူးတင် ရယ်၊ ကျွန်မ ရယ် ကျောက်မြောင်း ဘယသုဒ္ဓိလမ်း မှာ ဟောဖူးပါတယ်။

ဒါ နောက်ဆုံးပါပဲ။
ကျွန်မအနေနဲ့ စိတ်လှုပ်ရှားမှုရဲ့ ဒဏ်ကို မခံနိုင်ဘူး။ နှလုံးအားနည်းလို့ ဟောပြောပွဲ မလိုက်ပါနဲ့ လို့ ဆရာဝန် က ညွှန်ကြားထားလို့ မလိုက်တော့ပါဘူး။
ဟောပြောပွဲ ပြုလုပ်ရမယ့်သူတွေမှာ ငွေရော လူပါ အပင်ပန်းခံ ပြုလုပ်ရတာမို့ စာရေးဆရာ တွေဆီက တကယ့် အနှစ်သာရ ရှိတဲ့ စကား၊ အကျိုးရှိမယ့် စကားကို အချိန်ကုန်ခံပြီး နားထောင်ရရင်တော့ ကောင်း တာပေါ့။ အပျော်ခရီးထွက်သလို ထွက်ပြီး ဟိုလူ့ကိုပင့်၊ ဒီလူ့ကို ပုတ်ချနဲ့ အချင်းချင်း ပုတ်ခတ်ကြတာမျိုး တို့၊ စင်ပေါ်တက်ပြီး ဒါ ငါ့နေရာဆိုပြီး ပြောချင်ရာပြော၊ ဆိုချင်ရာ ဆိုတာမျိုးကိုတော့ ကျွန်မ မကြိုက်ဘူး"

" ဆရာမ လုံးချင်းသက်တမ်း ၁၀ နှစ်လောက်အတွင်းမှာ လုံးချင်းအုပ် ၄၀ ထွက်ခဲ့ပြီးပြီဆိုတော့ ဒီလို ရေးနိုင် ဖို့အတွက် စာရေးချိန်ရယ်လို့ သီးသန့်အချိန်ယူလေ့ရှိပါသလား "
" ကျွန်မ လုံးချင်းသက်တမ်း ၁၀ နှစ်မှာ စာရေးချိန်ရယ်လို့ သီးသန့်မယူပါဘူး။
ဘာဖြစ်လို့လဲ ဆိုတော့ ကျွန်မက စာရေးဆရာတစ်ယောက် ဖြစ်နေသလို အိမ်ရှင်မ တစ်ယောက် ဖြစ်နေ လို့ ပါပဲ။
အိမ်မှာ အဖော်နှစ်ယောက်တော့ ခေါ်ထားရပါရဲ့။ ဒီခေါင်းတွဲကြီးက မလှုပ်ဘဲနဲ့ နောက်တွဲတွေက ဘယ် လှုပ်မလဲ။ နာမည်ကိုက အိမ်ဖော်လို့ ခေါ်တာမျိုးကိုး။ ဒီတော့ အိမ်မှာ ကြီးကြပ်စီမံရတာက တစ်မျိုး၊ ဆယ်နှစ်သား နဲ့ ခြောက်နှစ်သမီး ရဲ့ ပညာရေး က တစ်ဖုံ၊ ဒီကြားထဲ အမျိုးသားက ထုတ်ဝေသူဆိုတော့ ဖြန့်ချိ ရေးလုပ်ငန်း မှာ ကျွန်မ ၀င်ပါရပါတယ်။ အမျိုးသား ကိုလည်း ကျွန်မ အောင်မြင်မှု တည်တံ့လာတဲ့ အချိန် မှာ အလုပ်က ထွက်စေပြီ။ ဒီလောကထဲ ကျွန်မ သွင်းလိုက်တာပါ။

ဒီတော့ကား ရှေ့ပိုင်း ဇာတ်အိမ်တည်ချိန်၊ ကျွန်မ စိတ်မှာ ၀တ္ထု သန္ဓေတည်ချိန်မှာ အိမ်အလုပ်လုပ်၊ သားနဲ့ သမီး စာသင်ပေး နဲ့ အားတဲ့အချိန်ကျမှ ကျွန်မ ရေးပါတယ်။ အဲ ... ဇာတ်အရှိန် တက်ပြီဟေ့ဆိုရင်တော့ ဘယ်သူလာလာ ကျွန်မ ထွက်မတွေ့နိုင်တော့ဘူး။ မီးဖိုချောင် ပြန်မကြည့်တော့ဘူး။ ထမင်းစားချိန် ဆင်းစား၊ ပြန်တက် စာရေးနဲ့ တစ်နေ့လုံး ရေးတော့တာပဲ။
ညဘက်တော့ သာမန်အချိန်မှာ ဆယ့်တစ်နာရီအထိပဲ ကျွန်မ စာရေးပါတယ်။ ဇာတ်သိမ်းပိုင်းမှာတော့ မရပ် တော့ပါဘူး။ သုံးနာရီ လေးနာရီမှပဲ ပြီးပြီး၊ ဆက်တိုက်ရေးတော့တာပါပဲ"
" စာပေလောက ထဲ ၀င်ရောက်ဖို့ ကြိုးပမ်းနေသူတွေအတွက် ဆရာမ ဘယ်လို အကြံပေးချင်ပါသလဲ "
" စာပေလောက ထဲ ၀င်ချင်သူတွေအတွက် ကျွန်မ ပြောခဲ့ပြီးပါပြီ။

ကျွန်မက မဂ္ဂဇင်းက စတက်တဲ့သူမို့လား မသိဘူး။ မဂ္ဂဇင်းက စတက်ကြတာပဲ ကောင်းပါတယ်။ မဂ္ဂဇင်းကြီး တွေ အရင်ဆုံး ၀င်တိုးကြည့်စေချင်တယ်။ ပြီးမှ တစ်ဆင့်ပြီး တစ်ဆင့် တက်ပေါ့။ တချို့ ဘွားခနဲ ပေါ်လာသူတွေ ကတော့ နတ်ရေကန်ထဲ ပစ်ချပြီး ကြီးသလို ကြီးလာတာ ဘုန်းရှင် ကံရှင်တွေ ဆိုပါတော့လေ၊ ကျွန်မကတော့ မကြိုက်ပါဘူး။ အကြံအဖန်တွေ များကြတာပေါ့။
သြော် ... ပြောရဦးမယ်။
တချို့က ၀တ္ထုတိုရေးပြီး မဂ္ဂဇင်းတိုက်ကြီးတွေ ပို့ပေးပါဆိုပြီး ကျွန်မဆီက တစ်ဆင့် ပို့ခိုင်းလို့ အမျိုးသားကို သွားပို့ခိုင်းရတယ်။ နောက် အဲဒီလို မလုပ်ကြပါနဲ့။ မဂ္ဂဇင်းတိုက်မှာ လိပ်စာ ရှိသားပဲ။ အဲဒီအတိုင်း ပို့ကြပါလို့၊ ကျွန်မတို့မှာလည်း အားတာ မဟုတ်ဘူးလေ"
" ဘ၀သရုပ်ဖော်ဝတ္ထုတွေအပေါ် ဆရာမ ဘယ်လို မြင်ပါသလဲ "

" ကျွန်မရဲ့ လုံးချင်းဝတ္ထုနဲ့ ၀တ္ထုတိုထဲမှာရော ၀တ္ထုရှည်ထဲမှာရော အစ်ကို ဘယ်လို မြင်ပါသလဲလို့ ပြန်မေးချင်လိုက်တာ။ ထားပါတော့လေ ... မေးတာကိုပဲ ဖြေရရင် ...
ဦးဆုံး ... "ဘ၀"ဆိုတာ ဘာလဲ၊ ကျွန်မတို့ စဉ်းစားကြရအောင်။ ဘ၀ဆိုတာ မွေးဖွားခြင်းနဲ့ သေဆုံးခြင်း ကြား မှာ ရှိတဲ့ ကြားကာလတဲ့။ အချိန်ကာလလို့ ခေါ်တွင်လို့လည်း အချိန်တဲ့။ ဒါကတော့ ကိုယ့်အယူအဆ နဲ့ ကိုယ်လေ။
ဒီလိုပဲ သူ့ဘ၀နဲ့သူ ၊ကိုယ့်ဘ၀နဲ့ကိုယ် ဆိုတဲ့စကား သုံးကြတာပဲ။
ဒီတော့ ဘ၀ဆိုတာ အကြောင်းတရားလို့ သတ်မှတ်လို့ မရဘူးလား။ ဥပမာ - ဆိုပါတော့၊ ကျွန်မ ဘ၀အကြောင်း လို့ ကျွန်မကို ပြောရင် ...
ကျွန်မအကြောင်း ကျွန်မ ပြောရမှာပေါ့။ မဟုတ်ဘူးလား။

ဒီတော့ သူဌေးကြီး ဦးဘ ရဲ့အကြောင်း ရေးတာကော၊ ဦးဘ ရဲ့ ဘ၀သရုပ်ဖော် မဟုတ်ဘူးလား။
ဆိုက်ကားသမား ကိုသန်းစိန် ရဲ့အကြောင်း ရေးတာကော၊ ကိုသန်းစိန်ရဲ့ ဘ၀သရုပ်ဖော်ပေါ့။
တချို့က ဆင်းရဲလိုက်သမျှ စားစရာတောင် မရှိအောင် ဆင်းရဲတဲ့သူမျိုးအကြောင်းရေးမှ ဘ၀သရုပ်ဖော်လို့ ထင်နေကြတယ်။
ရေးပါ။ ဆင်းရဲတာပဲ ရေးရေး၊ ချမ်းသာတာပဲ ရေးရေး၊ သဘာဝယုတ္တိကနေ မကင်းလွတ်ရဘူး။ လူဆိုတာ ကိုယ့်ဘ၀ နဲ့ ကိုယ် ပျော်တတ်တဲ့သူပဲ။ ဖြေသိမ့်တတ်တဲ့ သူတွေပဲ။ ချောက်ထဲ ကျနေတဲ့လူကို အပေါ် ကနေ ဆီးကြည့်ပြီး ...

" ဟာ ... ဟိုလူ ချောက်ထဲကျနေတယ်၊ ကျနေတယ်" လို့ ကုန်းအော်၊ လူတွေ ၀ိုင်းအုံကြည့်၊ " ဟင် ... ဟာ " ဖြစ်နေလို့ မပြီးဘူး။ ဒီနေရာမှာ ဇာတ်သိမ်းလို့ မဖြစ်ဘူး။ ဒီလူအပေါ်ရောက်အောင် ၀ိုင်းကူညီရမယ်။ ဒီလူရဲ့ ထွက်ပေါက်ကို ရှာပေးရမယ်။ ၀တ္ထုပဲ ဆိုပါတော့။ ဒီလူ အပေါ်ရောက်တာနဲ့ အဆုံးသတ်ရမယ်။ တစ်ယောက်နဲ့ တစ်ယောက် ၀ိုင်းဝန်းကူညီတတ်တဲ့ လူသားတွေရဲ့ စိတ်ဓာတ်၊ စိတ်ဓာတ်မကျဘဲ ကြိုးစား ရမယ့် စိတ်ဓာတ်ကို ဖော်ပေးမယ်။ ၀တ္ထုတစ်ပုဒ်ကို ရေးရင် စာရေးဆရာရဲ့ စေတနာဟာ ပေါ်လွင်နေရမယ်။ ဘ၀သရုပ်ဖော်ဆိုတာ ဆင်းရဲတာပဲ ရေးရေး၊ အလွှာအသီးသီးကိုပဲ ရေးရေး စေတနာ ပါရင် အားလုံး ဘ၀သရုပ်ဖော်ချည်းပဲ။ လျှို့ဝှက်နဲ့ စုံထောက်၊ သိုင်းကလွဲရင်ပေါ့လေ။ ဒီတော့ မျက်မှန်စိမ်းတပ်ပြီး ကြည့်ရင် အယူအဆတွေ ပြောင်းစေချင်တယ်။ စာစုံမဖတ်ဘဲနဲ့ ဝေဖန်တာမျိုးတွေ ရှောင်ကြစေချင်တယ်၊ ရသစာပေ အပေါ်မှာ အမြင်ကျယ်ကြစေချင်တယ်"

" ကျေးဇူးတင်ပါတယ် ဆရာမ၊ မေးသမျှ ဖြေပေးတဲ့အတွက်ရော အငြင်းအခုံကလေးတွေအတွက်ပါ ကျေးဇူး တင်ပါတယ်။ ကျွန်တော်မေးချင်တာတော့ ကုန်ပါပြီ။ စာဖတ်ပရိသတ်နဲ့ ပတ်သက်ပြီး ဆရာမ ပြောချင်တာများ ရှိရင် ဖြည့်ပါဦးလို့ "
" အစ်ကုနဲ့ ကျွန်မ မေးခဲ့ ဖြေခဲ့ ပြောခဲ့တာတွေကို ဖတ်ပြီး စာပေ၀ါသနာပါလို့ မောင်တွေ၊ ညီမတွေအတွက် လုပ်သင့်လုပ်ထိုက်တာကို သိလာကြမှာပါ။
အောင်မြင်ချင်တဲ့သူဆိုတာ ထိုင်အော်နေလို့တော့ မပြီးဘူးလေ။ ကြိုးစားရမှာပေါ့ မဟုတ်ဘူးလား"
တွေ့ဆုံခန်းမှာ တွေ့ဖို့ ပေဖူးလွှာက ကြိုးစားတာ မနှစ်ကတည်းကပါပဲ။ အဲဒီတုန်းက မတွေ့ခဲ့တာက စာဖတ်ပရိသတ်ရဲ့ စိတ်မှာ မအေးလေး ဆိုတဲ့ စာရေးဆရာအပေါ်မှာ တွေးချင်သလိုတွေါ်၊ မြင်ချင်သလို မြင်စေချင်လို့ပဲ။ စာဖတ်ပရိသတ်ရဲ့ စိတ်ကို လွှတ်ပေးထားတဲ့ သဘောပါပဲ။

လူဆိုတာ ကိုယ် ခင်မင်တဲ့ စာရေးဆရာအပေါ်မှာ အမျိုးမျိုး ပုံဖော်ကြည့်ရတာ အရသာပဲလေ။ ကျွန်မတို့ ငယ်ငယ်ကတည်း ဒီအတိုင်းပဲပေါ့။
ခုတော့ ဆရာ ဦးမြလှိုင် ဆိုတာကလည်း ကျွန်မအတွက် ရင်းနှီးတဲ့ ဆရာကလည်းဖြစ်၊ ကျေးဇူးကလည်း ရှိမို့ မငြင်းသာတော့ဘဲ လက်ခံလိုက်တာပဲ။ ကျွန်မအတွက်လည်း ပြောချင်တာလေးတွေ ပြောရ ဆိုရလို့ ပျော်ပါတယ်။
နောက်တစ်ခု ပြောချင်တာက ...
မအေးလေးကို နားလည်ရင် ကျေနပ်ပါပြီလို့။

ပေဖူးလွှာမဂ္ဂဇင်း၊ အမှတ်-၃၅၊ ဧပြီလ၊ ၁၉၈၄ ခုနှစ်။

Credit:shwezinu.blogspot.com