ဝင်းငြိမ်း နှင့် စာရေးဆရာများ အပိုင်း (၇)

ဝင်းငြိမ်း နှင့် စာရေးဆရာများ အပိုင်း (၇) 

ဒေါ်ခင်ဆွေဦး
ဝတ္ထုဝိညာဉ် ဝတ္ထုအသက်

         ဒီလ တွေ့ဆုံပေးဖို့ စာတည်းအဖွဲ့က တာဝန်ပေးသူကတော့ လုံးချင်းဝတ္ထုပေါင်း ၅၁ အုပ်၊ ဝတ္ထုရှည် ပေါင်း ၁၀ ပုဒ်၊ ဝတ္ထုတိုအပုဒ်ပေါင်း ၃၀၀ ကျော် ရေးပြီးတဲ့ ဆရာမကြီး "ဒေါ်ခင်ဆွေဦး"ပဲဖြစ်ပါတယ်။
ဒေါ်ခင်ဆွေဦး ရဲ့စာရေးသက် ဟာ ၃၆-၃၇ နှစ်ရှိနေပါပြီ။ ဒါပေမဲ့ ကျွန်တော်တို့ လစဉ် အစီရင်ခံထားသ လိုပါပဲ။ တွေ့ဆုံပေးတဲ့နေရာမှာ စာရေးဆရာ၊ အနုပညာရှင်များနဲ့ ဝါစဉ်အရမဟုတ်ဘဲ စာတည်းအဖွဲ့ရဲ့ လုပ်ငန်း အဆင်ပြေမှုပေါ်မှာ မူတည်ပြီး တွေ့ဆုံပေးသွားမှာမို့ ဒီလမှပဲ ဒေါ်ခင်ဆွေဦးနဲ့ တွေ့ဆုံပေးခွင့် ကြုံရတာ ကို စာချစ်သူများ နားလည်သဘောပေါက်မယ်လို့ ယူဆပါတယ်။

စာရေးဆရာကြီး "မဟာဆွေ"ဆိုရင် တစ်ခေတ်က စာချစ်သူများ၊ အသည်းစွဲ မျိုးချစ်စာရေးဆရာကြီး တစ်ဦး ဖြစ်ခဲ့ပါတယ်။ ဆရာကြီးရဲ့ဇာတ်ကောင်တွေဟာ ခေတ်လူငယ်တွေကို ကာယ၊ ဉာဏတိုးတက် ဖွံ့ဖြိုး လာအောင်၊ မျိုးချစ်စိတ်ထက်သန်လာအောင် လှုံ့ဆော်ပေးနိုင်ခဲ့သလို ဆရာကြီးနဲ့ ဒေါ်ကြည် ကြည် တို့ရဲ့သမီးကြီး ဒေါ်ခင်ဆွေဦး ကလည်း သူ့ခေတ်ရောက်ပြန်တော့ အဖေ့ခြေရာကို ဆက်နင်းပြန်ပါ တယ်။ ဒေါ်ခင်ဆွေဦး အကြောင်း ပြောကြစတမ်းဆိုရင် "တို့တိုင်းဌာနီ"၊ "အင်ကြင်းရဂုံ"စတဲ့ အမျိုးသား ရေး အပြည့်အဝ ပါတဲ့ ဝတ္ထုတွေ ချန်လှပ်ခဲ့လို့မရပါဘူး။

သူ့ဝတ္ထုတွေကို ဖတ်ရင်း စိတ်ဓာတ်ပြန်လည်တက်ကြွခဲ့ရပါတယ်လို့ စာပေဆွေးနွေးပွဲတွေမှာ စာဖတ်ပရိ သတ် က လှိုက်လှိုက်လှဲလှဲ ပြောခဲ့ကြဖူးပါတယ်။

"ကျွန်တော်တို့ ဒီနေ့ မြန်မာစာပေလောကမှာ အဖေ စာရေးဆရာ၊ သားစာရေးဆရာ၊ သမီးစာရေးဆရာ စသည်ဖြင့် မိသားစုစာရေးဆရာတွေရှိပါတယ်။ အခု ကျွန်တော်တွေ့ဆုံနေတဲ့ မမဆိုရင်လည်း ဆရာ ကြီး မဟာဆွေ ရဲ့သမီး၊ ဒီတော့ ကျွန်တော် သိချင်တာက ဒီလိုမိသားစု စာရေးဆရာဖြစ်လာတာက ဖခင်၊ မိခင် တို့ရဲ့ဗီဇကြောင့်လား၊ ဒါမှမဟုတ် ပတ်ဝန်းကျင်ကြောင့်လို့ ဆိုမလား၊ မမကိုကော ဆရာကြီး က စာရေးဆရာမ တစ်ယောက်ဖြစ်လာအောင် ဘယ်လို ပြုစုပျိုးထောင်ပေးခဲ့ပါသလဲ"

"ကျွန်မအမြင်ကတော့ စာရေးဆရာ သားသမီးပဲဖြစ်စေ၊ တခြား တစ်ဦးဦးပဲ ဖြစ်စေ စာရေးဆရာဖြစ်လာ တာက ပတ်ဝန်းကျင်လွှမ်းမိုးမှုကြောင့်လို့ပဲ မြင်ပါတယ်။ ဘာဖြစ်လို့လဲဆိုတော့ ကျွန်မ အဖေဆိုရင် ကျွန်မ ကို စာရေးဆရာဖြစ်အောင် တိုက်ရိုက်ပြုစုပျိုးထောင်ပေးမှုမရှိပေမယ့်လည်း တစ်ခုရှိတာက ကျွန်မတို့မှာ ညီအစ်မ နှစ်ယောက်ရှိတယ်။ ကျွန်မက စာရေးဆရာဖြစ်ခဲ့ပေမယ့် ညီမလေးက စာရေး ဆရာမဖြစ်ခဲ့ဘူး။

ကျွန်မ က သမီးအကြီးဆိုတော့ အဖေက Training ပေးတဲ့နေရာမှာ သူနဲ့အနီးကပ်ဆုံး ကျွန်မကိုပေး တယ်။ အဲဒီအခါ ကျတော့ ကျွန်မက အဖေကိုချစ်တဲ့စိတ်၊ ခင်မင်တဲ့စိတ်၊ လေးစားတဲ့စိတ် သာချင်လည်း သာမယ် ပေါ့လေ။ ပြောရမယ်ဆိုရင် ထုံးစံလိုဖြစ်နေတာက အကြီးဆိုတာ အဖေနဲ့ ပူးတွဲနေလေ့ရှိပြီး အငယ် ကတော့ အမေနဲ့ပဲ အမြဲပူးတွဲနေလေ့ရှိတယ်မဟုတ်လား။ အဲဒီအခါကျတော့ ဖေဖေ့ကိုဖြစ်ချင်တဲ့ စိတ်၊ ဖေဖေ့ ကို အတုခိုးချင်တဲ့စိတ်၊ ဒါတွေက ဖေဖေ့ကို မြင်ပြီးပေါ်လာတာတွေပါ။

နောက်တစ်ချက် ကလည်း ကျွန်မတို့အိမ်က စာရေးဆရာအိမ်ဆိုတော့ စာအုပ်က အပြည့်ရှိတယ်။ ဒါက တော့ မဆန်းဘူးပေါ့လေ။ မုဆိုးအိမ်မှာ မုဆိုးကိရိယာရှိသလို၊ ကုန်သည်အိမ်မှာဆိုရင် ချိန်ခွင်ကတ္တား ရှိ သလိုပါပဲ။ အိမ်မှာ စာအုပ်ရှိတော့ စာဖတ်ဖြစ်တာပေါ့။ အဲဒီစာတွေကလည်း ကျွန်မ စာရေးချင်စိတ်ကို လှုံ့ဆော် ပေးခဲ့ပါတယ်။

ကျွန်မ မှတ်မိတာကတော့ ကျွန်မတို့ငယ်ငယ် ၅၁ လမ်းမှာနေတုန်းက ကျွန်မအသက်က ၁၈-၁၉ လောက် ရှိဦးမယ်။ ဖေဖေ ဆုံးခါနီးအချိန်ပေါ့။ အဲဒီတုန်းက ဖေဖေ စွဲဖတ်တာ တစ်ခုရှိတယ်။ "အလက် ဇန္ဒားဒူးမား(စ်) "ရဲ့စာအုပ်ပါပဲ။ အလက်ဇန္ဒားဒူးမား(စ်)က စီနီယာနဲ့ ဂျူနီယာရှိတယ်။ သားအဖ စာရေး ဆရာ ပေါ့။ အဖေကတော့ ရေးခဲ့တာတွေတော်တော်များပါတယ်။ လူသိများတဲ့သူရဲကောင်း သုံးယောက် တို့၊ မွန်တီခရစ်တိုတို့လေ။ ကျွန်မကတော့ သူရေးတဲ့ Adventures တွေဖတ်တယ်။ ဖေဖေကတော့ သား ရေးခဲ့တဲ့ ဝတ္ထုတွေကို ပိုပြီး သဘောကျတယ်။ များများတော့ မဟုတ်ပါဘူး။ တစ်အုပ်တည်းပါ။ "ကယ်မလီ" ဆိုတဲ့ ဝတ္ထုပါ။ ဒူးမားအငယ်က ဒီတစ်အုပ်ပဲ ရေးခဲ့တာပါ။

အဲဒီဝတ္ထုဖတ်ဖို့ ဖေဖေက ပြောတဲ့အချိန်မှာ ကျွန်မ သိပ်မဖတ်တတ်သေးဘူး။ သို့သော် သူပြောတဲ့ အချိန် မှာပဲ ဖတ်ခဲ့ပြီး အချစ်ဝတ္ထုရေးဖို့ စိတ်ဝင်စားလာတယ်။ အဲဒီဝတ္ထုကနေ နောက်ပိုင်းမှာ ကျွန်မ ရေး တဲ့ "ဥမ္မာ"တို့ ဘာတို့ ဖြစ်လာတာပေါ့။

အဲဒီတော့ ကိုဝင်းငြိမ်းမေးတဲ့ မေးခွန်းကို ကျွန်မ ချုပ်ပြီးပြောရရင် ကျွန်မစာရေးချင်စိတ် ပေါ်လာတာ ဟာ ပတ်ဝန်းကျင်ကြောင့်ပေါ။ ဖေဖေ့ဆီကို လာကြတဲ့ မျိုးချစ်လူငယ်တွေကိုကြည့်ပြီး ကျွန်မရင်ထဲက ဇာတ်ကောင် တွေကို ဖန်တီးခဲ့ပါတယ်လို့ပဲ ဖြေပါရစေ"

"ဒါဆို ဆရာကြီးက မမကို တိုက်ရိုက်လေ့ကျင့်ပေးသွားတာတော့ မဟုတ်ခဲ့ဘူးပေါ့"

"မရှိခဲ့ပါဘူး။ တစ်ခုတော့ရှိတယ်။ ဆန်းတယ် ပြောရမလားဘဲ။ ဖေဖေက ကျွန်မကို စာရေးဆရာမဖြစ် စေချင်ခဲ့ဘူး။ အဲဒီတုန်းက စာရေးဆရာဆိုတာကလည်း အခြေအနေ သိပ်မခိုင်လုံဘူးလေ။ ကျွန်မတို့ စာရေးဆရာ ဖြစ်လာရင် သူ့လိုပဲ ဒုက္ခရောက်မှာ သူ စိုးရိမ်ခဲ့တယ်။ ဖေဖေရော မေမေက ကျွန်မတို့ကို စာတတ် ပုဂ္ဂိုလ်ပဲဖြစ်စေချင်တယ်။ ဒါပေမဲ့ ကျွန်မအနေနဲ့က ဖေဖေ့ကိုကြည့်ပြီး အားကျတာလည်း ပါတယ်။

ဖေဖေက ကျွန်မတို့ကို လူတော်လူကောင်းလေးတွေ ဖြစ်လာအောင်ပဲ ပြုစုပျိုးထောင်တယ်။ သတ္တိရှိရ မယ်၊ ဇွဲရှိရမယ်၊ တစ်ခုတော့ရှိတယ်။ အဲဒီသတ္တ်ိရှိအောင် ပြုစုပျိုးထောင်ခဲ့တာကိုကပဲ စာရေးဆရာဖြစ် အောင် စေ့ဆော်တဲ့ အချက်ထဲမှာ တစ်ခုတော့ အပါအဝင်ဖြစ်မယ်ထင်ပါတယ်"

"မမ ဘယ်အရွယ်လောက် က စပြီး စာရေးခဲ့တာလဲ"

"ကျွန်မ အသက် ၁၂ နှစ် သမီးလောက်မှာ အိမ်ကို သတင်းစာသမားတွေ၊ စာရေးဆရာတွေ အဝင်အ ထွက် များလာတယ်။ အဲဒီအထဲမှာ သူရိယသတင်းစာတိုက်မှာ လုပ်ဖူးခဲ့တဲ့ ဦးသိမ်းမောင်က "သံတော် ဆင့်"သတင်းစာဆိုပြီး သတ်သတ်လုပ်တယ်။ သံတော်ဆင့်သတင်းစာ အယ်ဒီတာက ဦးထွန်းအိမ်တဲ့။ စာရေးဆရာ သတိုးအိမ်ပေါ့။ သူက ကျွန်မစာရေးတာ ဝါသနာပါတာလေးကို သိတဲ့အတွက် ရေးပါလား လို့ တိုက်တွန်းတယ်။ အဲဒီတုန်းက ၁၂ နှစ်သမီးအမြင်နဲ့ ဝတ္ထုတိုကလေးတွေ၊ ဆောင်းပါးတိုကလေး တွေ ရေးခဲ့တာပါပဲ။ သံတော်ဆင့်မှာက တနင်္လာနေ့တိုင်း ၁၄ နှစ်အောက် ကလေးများကဏ္ဍ ပါတော့ ကျွန်မ တို့လည်း ပါသွားတာပေါ့။ အဲဒီတုန်းက ၁၉၄၆-၄၇ လောက်ပဲရှိမယ်။

အဲဒီကနေပြီးတော့ အသက် ၁၅ နှစ်၊ ၁၆နှစ်။ ရှစ်တန်း၊ ကိုးတန်းလောက်ရောက်လာတဲ့အခါမှာ 'ရှုမ၀မဂ္ဂဇင်း' ကလေးစာပေကဏ္ဍမှာ ဆက်ရေးဖြစ်ခဲ့တယ်။ အဲဒီမှာရေးရင်း ကျွန်မ ဆယ်တန်း အောင်သွားပြီး တက္ကသိုလ်ရောက်သွားတော့ 'တက္ကသိုလ်ဆိုတာ'၊ 'တက္ကသိုလ် နံရံစာများ' စတဲ့ ခေါင်းစဉ်တွေနဲ့ တက္ကသိုလ် အတွေ့အကြုံတွေ ရေးခဲတယ်။ ရှုမ၀ မှာပါပဲ။ အဲဒီတုန်းက ရေးခဲ့ တာတွေကတော့ ဆောင်းပါး ၀တ္ထုပုံစံတွေလေ။ ကျွန်မက ဆရာသိပ္ပံမောင်ဝရဲ့ ဆောင်းပါးတွေ ၊ သူ့ရေးဟန် တွေကို သိပ်သဘောကျတယ်။ အဲဒီအချိန်ကတော့ ၁၉၅၀-၅၁-၅၂ လောက်ရှိမယ်။

နောက် သွေးသောက်မှာ ရုရှားရုပ်ရှင်တစ်ခုကို နှစ်ခါပြန် သုံးခါပြန် ကြည့်ပြီး ဘာသာပြန်ဝတ္ထု ရေး ဖူးသေးတယ်။ ရုပ်ရှင်ကား နာမည်က 'အော်စကာ'။ ကျွန်မက 'သြော်အော်စကာ၊ အော်စကာ' ဆို တဲ့ နာမည နဲ့ ရေးခဲ့တယ်။ ၁၉၅၆-၅၇ လောက်မှာ အိမ်ထောင်ကျပြီး မန္တလေးတက္ကသိုလ် ရောက် သွားတော့ မန္တလေးတက္ကသိုလ်ရဲ့ အတွေ့အကြုံတွေကို မဂ္ဂဇင်း ၀တ္ထုရှည်အဖြစ် ရေးပို့ဖူးသေး တယ်။ ဒါပေမဲ့ အရွေးမခံခဲ့ရဲဘူး။ မအောင်မြင်ခဲ့ဘူး။

၁၉၅၇-၅၈ လောက်မှာ သွေးသောက် မှာ မပန်သာသည် ဆိုတဲ့ ၀တ္ထုရှည်နဲ့ မြ၀တီမှာ မျှော်မျှော်သူ မောရှာတယ် နှစ်လဆက် ၀တ္ထုရှည်တွေ စ ပါလာတယ်။ အဲဒါ ပြီးတော့ ကျွန်မ ရန်ကုန် ပြန်ပြောင်း လာတယ်။ စိန်ဂျွန်းကွန်ဗင့်ကျောင်း (အခုတော့ အ.ထ.က ၂ လသာပေါ့) ဆရာမ ၀င်လုပ်တယ်။ အဲ ဒီမှာ ကျွန်မ ဘယ်သူတွေနဲ့ တွေ့ရသလဲဆိုတော့ ဗရင်ဂျီမယ်သီလရှင် အိုင်းရစ်လူမျိုးတွေနဲ့ တွေ့ရ တယ်။

အိုင်းရစ် တွေဟာ မျိုးချစ်စိတ်ပြင်းသူတွေဆိုတော့ သူတို့ကလည်း သူတို့ တိုင်းပြည်အကြောင်းပြော၊ ကျွန်မ ကလည်း ကျွန်မတို့ တိုင်းပြည်အကြောင်း ပြောကြရင်းက တို့တိုင်းဌာနီ ကို ရေးဖို့ စ စိတ်ဝင် စားခဲ့တာပါပဲ''

''ဒါဆို မမ ပထမလုံးချင်းပေါ့''

''ဟုတ်ပါတယ်''

''တို့တိုင်းဌာနီမှာ မမက ရဲဘော်သုံးကျိပ်ရဲ့ သမိုင်းနောက်ခံထား ရေးထားတာ တွေ့ရတယ်''

''ဒါနဲ့ ပတ်သက်လို့ ကျွန်မ ဘာကြောင့် ရာဇ၀င်နောက်ခံ ထားရေးရတယ်ဆိုတာကို အရင်ပြောချင် ပါတယ်။ လူဆိုတာ လူ့သမိုင်းဖြစ်စဉ်နဲ့ တွဲနေပါတယ်။ သမိ်ုင်းကြောင်းကို ကျွန်မတို့ ရှောင်လို့မရ ဘူး။ ကျွန်မတို့ဆိုရင် အသက်ရှစ်နှစ်၊ ကိုးနှစ်အရွယ်မှာ ဒုတိယကမ္ဘာစစ်ကို မီလိုက်တယ်။ အနိဠာရုံ တွေကိုလည်း တွေ့လိုက်ရတယ်။ ဗိုလ်ချုပ်အောင်ဆန်းစတဲ့ ခေါင်းဆောင်ပိုင်းရဲ့ လှုပ်ရှားမှုတွေကို လည်း တွေ့လိုက်ရတယ်။ ဒီလို ကလေးဘ၀က တွေ့လိုက်ရတဲ့ သမိ်ုင်းဖြစ်စဉ်တွေက ရင်ထဲမှာ စွဲ နေတယ်။

ကျွန်မ ၀တ္ထု ရေးလာတဲ့အချိန်မှာ သမိုင်းဖြစ်စဉ်နောက်ခံ မြင်ကွင်းကျယ်ကို အားထားလေ့ ရှိပါ တယ်။ 'တို့တိုင်းဌာနီ' မရေးခင် ကျွန်မ ဖတ်ရသလောက် နိုင်ငံတကာ အဆင့်မီ စာအုပ်တွေမှာဆို ရင် နောက်ခံကား မြင်ကွင်းကျယ်ရင် ကျယ်သလောက် ပရ်ိသတ်ရင်ထဲမှာ စွဲစေတာကို တွေ့ရပါ တယ်။ ဥပမာ ဆိုရင် ကျွန်တို့ မြန်မာစာဖတ်ပရိတ်သတ်တွေ ရင်းနှီးပြီးဖြစ်တဲ့ 'စစ်နဲ့ ငြိမ်းချမ်းရေး' တို့ 'လေရူးသုန်သုန်' တို့၊ လူတန်းစားတစ်ရပ်လုံးကို ခြုံငုံပြီး ရေးတဲ့ ပါးလ်ဘတ်ခ်ရဲ့ 'ဂွဒ်အား(တ်)'တို့ ဆို ရင် နောက်ခံကား ကျယ်ပြန့်တယ်။ ကျွန်မလည်း အဲဒါမျိုး ရေးဖို့ စိတ်သန်ခဲ့တယ်။

အဲဒီလို စိတ်သန်တော့ ကျွန်မရေးတဲ့ဝတ္ထုမှာ စာဖတ်ပရိသတ် စွဲငြိအောင် သမိုင်းအကြောင်းနောက် ခံ ရေးရင် ကောင်းမလားဆိုပြီး ရေးခဲ့တာပါပဲ။ ဖန်တီးကြည့်ခဲ့တာပါပဲ။

နောက်ပြီးတော့ 'တို့တိုင်းဌာနီ'မှာ ဗိုလ်သူရကို အဓိကဇာတ်ဆောင်အဖြစ် ဖန်တီးလိုက်ခြင်းဖြင့် ဒီခေါင်းဆောင်ရဲ့ အတွေး၊ အယူအဆတွေဟာ အများစုနဲ့ပဲ ဆက်စပ်ပြီးတွေးမလားဘဲ  ဆိုတဲ့ အချက်ရယ်၊ ပြီးတော့ လူအစစ်တွေကို ထည့်လိုက်တဲ့ ရည်ရွယ်ချက်ကတော့ ဘက်ဂရောင်းကို ကိုင်တဲ့နေရာမှာ နေရာနဲ့ အချိန်အခါ ဟန်ချက်မိဖို့ လိုလာတယ်။ ဒါဝတ္ထုရဲ့ သဘောတရားပါ။ ရဲဘော်သုံးကျိပ်ကို ထည့်လိုက်ခြင်း အားဖြင့် ပရိသတ် ရင်ထဲမှာ ပိုပြီး Realistic ဖြစ်လာအောင်ပါ..

ကျေးဇူးတင်ပါတယ် မမ။ ကျွန်တော်တို့ နောက်တစ်အုပ် ဆက်ကြရအောင်။ 'အင်ကြင်းရဂုံ' မှာ အဓီကဇာတ်ဆောင် နှစ်ယောက်ဖြစ်တဲ့ ကိုထိန်ဝင်းနဲ့ မေသက်တို့ Family Relationship နဲ့ ပတ်သက်ပြီး ဆွေးနွေးကြတာ တွေ့ရပါတယ်။ ဒီနေ့ သတင်းစာတွေမှာ ကြော်ငြာကဏ္ဍာတွေကို ကြည့်ရင် အိမ်ထောင်ရေး အဆင်မပြေတဲ့ ကြော်ငြာတွေ တော်တော်များများ တွေ့ရပါမည်။ အိမ်ထောင်သည်တစ်ယောက် ဖြစ်တဲ့ မမအနေနဲ့ အဲဒီလို ကြော်ငြာမျိုးတွေ နည်းသွားရအောင် တစ်နည်းအားဖြင့် သာယာတဲ့ အိမ်ထောင် တည်ဆောက်နိုင်အောင် ဘယ်လို ကျင့်သုံးသင့်တယ်လို မြင်ပါသလဲ။

အဲဒီမှာ အချက်နှစ်ချက်ကို ကျွန်မ ပြောသွားတယ်။ ပထမအချက်က အချစ်၊ ဒုတိယအချက်က နားလည်မှု။ အိမ်ထောင်ရေး သာယာဖို့ဆိုတဲ့ နေရာမှာ တစ်ယောက်ကို တစ်ယောက် ချစ်ရုံနဲ့ပဲ မပြီးဘူး။ တစ်ယောက် ကို တစ်ယောက် နားလည်ရမယ်။ တစ်ယောက်နဲ့ တစ်ယောက် နားမလည် ဘူးဆိုရင် ချစ်တဲ့ အတိုင်းအတာ ဟာလည်း လျော့ပါးသွားနိုင်တယ်။

ကျွန်မဖန်တီးထားတဲ့ မေသက်  ဆိုတာက နိုင်ငံရေးသမား ဇာတ်ဆောင်၊ သူကြိုက်တဲ့သူကလည်း နိုင်ငံရေးသမား ပဲ။ နိုင်ငံရေးသမား အိမ်ထောင်သည်တွေရဲ့ ဘ၀ဟာ ပိုပြီး ကြမ်းတမ်းပါတယ်။ အဲဒီလိုပဲ သာမန် ဇာတ်ဆောင် ရိုးရိုးလူတွေလည်း အိမ်ထောင်သည် ဘ၀မှာတော့ အခက်အခဲကို ရင်ဆိုင် ရုန်းကန်ကြရတာချည်းပါပဲ။

အချစ်ဆိုတာကို ကျွန်မ ထပ်ပြောချင်ပါသေးတယ်။ လူငယ်ရဲ့ သဘာဝမှာ အချစ်ဆိုတာ ရှိနေမျာပဲ ကိုး။ အချစ်မှာ စိတ်လှုပ်ရှားပြီး ချစ်တဲ့အချစ်နဲ့ အကြောင်းတစ်စုံတစ်ခုကြောင့် ချစ်ရတဲ့ အချစ်ရယ်လို့ ရှိတယ်။ Emotion နဲ့ Reason လို့ပြောရမှာပေါ့။ ဒါကတော့ ယေဘုယျ သတ်မှတ်ချက်ပါ။ စိတ်လှုပ်ရှားမှုကြောင့် ချစ်ခဲ့ရတဲ့ အချစ်က မခိုင်လုံတဲ့သဘော  ရှိတယ်။ Reason နဲ့ရွေးတဲ့ အချစ်ကတော့ ခိုင်မြဲတတ်ပါတယ်။

ကျွန်မကတော့ လောလောဆယ် 'ခရစ်ရှနာမာတီ' ဆိုတဲ့ စာဟောဆရာကြီး ဟောတာကို သဘောကျတယ်။ သူက အချစ်နဲ့ ပတ်သက်ပြီးတော့ ဘယ်လိုပြောသွားသလဲဆိုတော့ အချစ်တွေထဲမှာတဲ့ ပုဂ္ဂိုလ်ကို လေးစားပြီးတော့  ချစ်တဲ့ အချစ်က အခိုင်မြဲဆုံးပဲတဲ့။

ကျွန်မက လူငယ်တွေကို ဒီ 'ခရစ်ရှနာမာတီ' ပြောသွားတဲ့ အချစ်သဘောတရား နားလည်စေချင် တယ်။ ပုဂ္ဂိုလ်တစ်ဦးကို လေးစားပြီး ချစ်ရင် ဒီအချစ်ဟာ ဘယ်တော့မှ မပြယ်ဘူး။ ဥပမာ- ကျွန်မ ဘာသာရေးနဲ့ ပြောရမယ်ဆိုရင် ခရစ်ယာန်၊ မဟာမေဒင်၊ ဗုဒ္ဓဘာသာ ဆိုပြီး ရှိကြတယ်။ ကျွန်မတို့က ဘာသာရေး ပုဂ္ဂိုလ်ကြီးတွေကို ကိုယ့်ဘာသာရေးနဲ့ ကို ကြည့်ညိုလေားစားပြီး ချစ်ကြတယ်။ ဒီမှာ Faith ပါလာတယ်။ လေးစားပြီး ချစ်ခင်တော့ ဒီမှာ ယုံကြည့်မှု ပါလာတယ်။

လောကီ အိမ်ထောင်ရေးမှာလည်း ဒီလို လေးစားပြီး ချစ်ခင်ယုံကြည်မှု ရှိလာမယ် ဆိုရင် ဘယ်တော့မှ ကွဲမှာ မဟုတ်တော့ဘူးလို့ ကျွန်မ ထင်တယ်။

'အင်ကြင်းရဂုံမှာ လူငယ်ဇာတ်ဆောင် နှစ်ယောက်ဖြစ်တဲ့ လဲ့ဝင်းနဲ့ ဥာဏ်ဦးတို့ရဲ့ အရည်အသွေးကို မေသက် က ယှဉ်စဉ်းစားတဲ့ နေရာမှာ ဥာဏ်ဦးဟာ ဗီဇကိုက ကောင်းလို့ပဲလို့ မှတ်ချက်ချတာ တွေ့ရတယ်။ လဲ့ဝင်း ဆိုတာ ထက်မြက်တဲ့ မိဘနှစ်ပါးက ပေါက်ဖွားခဲ့တဲ့ သမီးတစ်ယောက်ပါ။  ဥာဏ်ဦးကတော့ ငယ်ငယ်ကတည်းက မိဘနှစ်ပါးစလုံး ကွယ်လွန်ခဲ့တာမို့ ကိုယ်ထူးကိုယ်ချွန် ရုန်းကန်ခဲ့ရတဲ့ လူငယ်တစ်ယောက် ဖြစ်တယ်။ ဥာဏ်ဦးကင ဗီဇကောင်းလို့ လူတော်တစ်ယောက် ဖြစ်လာတယ်ဆိုရင် ထက်မြက် တဲ့ မိဘနှစ်ပါးက မွေးတဲ့ လဲ့ဝင်းက ဗီဇမကောင်းတဲ့ သဘောလား။'

ဒီအချက်နဲ့ ပတ်သက်ပြီး မေးတာ ကိုဝင်းငြိမ်းက်ို ကျွန်မ သိပ်ကျေးဇူးတင်ပါတယ်။ သိပ်သိမ်မွေ့တဲ့  မေးခွန်းပါပဲ။ ဗီဇနဲ့ ပတ်ဝန်းကျင် ပြဿနာကလည်း သိပ်သိမ်မွေ့ကျယ်ပြန့်ပါတယ်။ ဒီနေရာမှာ ကျွန်မ ဗီဇ ဆိုတဲ့ စကားသုံးလိုက်တာနဲ့ ပတ်သက်ပြီး ကျွန်မအရင်ရှင်းချင်ပါတယ်။  ဗီဇကောင်းတယ်လို့ ကျွန်မ သုံးလိုက်တဲ့ စကားက ကျွန်မတုိ့ ဗမာစကားမှာ သုံးရုံးသုံးစဉ် အကျင့်ကောင်းတယ်လို့ ပြောလေ့ ပြောထ ရှိတာကို သုံးလိုက်တာပါ။ အမှန်က ကျွန်မသီးခြား စရိုက်ကို ပြောချင်တာပါ။ လူတိုင်းလူတိုင်းမှာ သီးခြားစရိုက်ကလေးတွေ ရှိပါတယ်။ Individual Character ပေါ့။ ၀တ္ထုရေးသူတစ်ယောက်အနေနဲ့ သီးခြားစရိုက် ကို ဇောင်းပေးရေးတဲ့ နေရာမှာ စကားလုံး တာဝန်ထမ်းဆောင်တဲ့ ကျွန်မအနေနဲ့ 'လွတ်' သွား ပါတယ်လို့ ၀န်ခံပါရစေ။

ဗီဇနဲ့ ပတ်ဝန်းကျင် ပြဿနာဟာ ဒီနေ့ထက်ထိ ပညာရှင်တွေ အငြင်းပွားနေဆဲပါပဲ။ ကျွန်မ မြင်တာကတော့ လူတစ်ယောက်ဟာ ဘယ်သူမှ လူတော်လူကောင်းအဖြစ်၊ လူဆိုးအဖြစ် မွေးမလာပါဘူး။ ကလေး ဆိုတာ မွေးလာတုန်းက အဖြူရောင်ကလေးပါ။ လူ့ပတ်ဝန်းကျင်ကသာ အရောင်ဆိုးပေးကြတယ်။ ဒီကိစ္စ ကို ပြောကြရင် ကျွန်မငယ်ငယ်တုန်းက လူမှုစိတ်ပညာ ဘာသာရပ် ယူခဲ့တော့ စိတ်ပညာမှာလည်း ဗီဇ နဲ့ ပတ်ဝန်းကျင်ဟာ သိပ်အငြင်းပွားကြပါတယ်။

ကျွန်မတို့ စိတ်ပညာဆရာကြီးတွေ ဖြစ်တဲ့ 'မစ္စတာဝုဒ်ဝါ့ဒ်' တို့၊ 'မစ္စတာမန်း' တို့က သူတို့စာအုပ် တွေထဲမှာ ရေးကြတယ်။ ဗီဇ၀ါဒီတွေကလည်း ဗီဇကိုကမကောင်းလို့ လူတွေရဲ့ အကောင်း၊ အဆိုး ဖြစ်လာတာလို့ ဆိုတယ်။ တစ်ဖက်က ပတ်ဝန်းကျင် ၀ါဒီတွေကလည်း လူတွေဟာ ထွန်းကားလာ ချိန်မှာ အမြွှာပူးတွေကို တစ်နေရာစီမှာ ခွဲထားတဲ့နည်း၊ တစ်နေရာတည်း ထားတဲ့နည်း စသဖြင့် အမျိုးမျိုး စမ်းသပ်ကြတယ်။

ကျွန်မ မြင်တာကတော့ ပတ်ဝန်းကျင်ဟာ လူယောက်ကို လွှမ်းမိုးနိုင်တယ်။ စောစောက ပြောသလို လူတစ်ယောက် ဟာ သူခိုးအဖြစ်နဲ့ မွေးမလာဘူး။ အပျက်မိန်းကလေးတစ်ယောက်ဟာလည်း အပျက် မိန်းကလေး အဖြစ်နဲ့ မွေးမလာပါဘူး။ သူ့ရဲ့ဘ၀အခြေအနေ အမျိုးစုံ ရိုက်ခတ်မှုကြောင့်သာ သူ့ဘ၀ဟာ ပုံစံ အမျိုးမျိုး နဲ့ ဖြစ်လာရတာပါ။

ဘုရားဟောမှာ ပါတဲ့ ကျေးသားညီနောင် ပုံပြင်မှာလည်း ကြည့်ပါလား။ ယဉ်ကျေးသိမ်မွေ့တဲ့ ပတ်ဝန်းကျင်မျာ ရောက်သွားတဲ့ ကျေးသားကလေးနဲ့ ရက်စက်ကြမ်းကြုတ်တဲ့ ပတ်ဝန်းကျင်ကို ရောက်သွား တဲ့ ကျေးသားတို့ဟာ စရိုက်ချင်း မတူကြတော့ဘူး။ ဒါလည်း ပတ်ဝန်းကျင်ရဲ့ ပြုပြင်မှု ကြောင့်ပါပဲ။

ကျွန်မကတော့ ကျွန်မကိုယ်တိုင် ရုန်းကန်လှုပ်ရှားခဲ့ရသူမို့လား မပြောတတ်ဘူး၊ လူတစ်ယောက်ရဲ့ အကောင်းအဆိုးဟာ သူဖြတ်သန်းလာရတဲ့ ပတ်ဝန်းကျင်က လှုံ့ဆော်တယ်လို့ပဲ တွေးမိပါတယ်။

''မမ ရေးခဲ့တဲ့ လုံးချင်းတွေထဲက နောက်ထပ်တစ်အုပ်လောက် ကျွန်တော်ရွေးချင်ပါသေးတယ်။ ''မင်္ဂလာရယ်မှ'' ကိုဆွေးနွေးချင်ပါတယ်။ ရေးတဲ့ ရည်ရွယ်ချက်က တိမ်မြုပ်ပျောက်ကွယ်လုနီး ဖြစ်နေတဲ့ ရုပ်သေး ပညာ အကြောင်း ခေတ်လူငယ်တွေ လေ့လာနိုင်အောင် ဘယ်လောက်အထိ မြင်ပါတယ်။ အဲဒီတော့ ကျွန်တော်သိချင်တာက ဒီစာအုပ်ရေးဖို့ မမ ဘယ်လောက်အထိ အချိန်ယူပြီး ရုပ်သေးပညာကို လေ့လာ ခဲ့တယ်။ နောက်ပြီး ရုပ်သေးပညာ ပပျောက်မသွားအောင် ဘယ်လိုဝိုင်းဝန်းသင့်ကြတယ် ဆိုတာပါပဲ။

ဇာတ်သဘင် ရုပ်သေးသဘင်နဲပ ပတ်သက်ပြီး ရေးချင်တာကတော့ ကြပါပြီ။ လွန်ခဲ့တဲ့ ၁၅ နှစ်လောက် ကတည်းက ဇာတ်ရုပ်သေးနဲ့ ပတ်သက်ပြီး ဒီလိုကျယ်ကျယ်ပြန့်ပြန့် ရေးချင်တာ ရှိခဲ့ပါတယ်။'မင်္ဂလာရယ်မှ' ကိုရေးဖို့ အကြောင်းတရား ပေါ်လာတာကတော့ လွန်ခဲ့တဲ့လေးငါး ခြောက်နှစ်လောက်က စာတမ်းဖတ်ပွဲ တစ်ခုမှာ ရုပ်သေးပညာနဲ့ ပတ်သက်ပြီး ဖတ်တဲ့စာတမ်းတစ်ခု မှာရုပ်သေးပညာဟာ နောင်ဆိုရင် ပြတိုက်ထဲမှာ ထားရမယ့်အနေအထားမှာ ရှိနေပြီလို့ ရုပ်သေး ပညာသည်ကြီးတွေက ညည်းညူတဲ့ အကြောင်း ဖတ်သွားတာ ကြားလိုက်ရတော့ 'မင်္ဂလာရယ်မှ' ကိုရေးချင်လာတယ်။ ကျွန်မကိုယ်တိုင် ကလည်း ငယ်ငယ်က ဇာတ်ကို ကြိုက်တယ်။

'မင်္ဂလာရယ်မှ' ကိုရေးဖို့ ကျွန်မသုံးနှစ်လောက် ကြိုတင်ပြင်ဆင်ပြီး မိုးဝေ ဂ္ဂဇင်းမှာ အခန်းဆက် ၀တ္ထုရှည် ရေးခဲ့တာပါ။

ရုပ်သေးပညာထိန်းသိမ်း ဖို့ ဆိုတာကတော့ ရုပ်သေးပညာတွေအတွက် ဘ၀အာမခံချက် ရှိဖို့လို ပါမယ်။ ဒုတိယ အချက်အနေနဲ့ ကပွဲကြည့်ပြည်သူတွေအနေနဲ့ ရှေးရိုးရာ ဇာတ်သဘင်ပညာကို သိဖို့လိုပါတယ်။ ဒါတွေ သိဖို့ ကျွန်မတို့က စာပေနဲပ လှုံ့ဆော်ပေးရပါမယ်။ရှေးတုန်းကတော့ သဘင် ၀န် ဦးနုက ဇာတ်သဘင် အကြောင်း  ဆောင်းပါးတွေရေးတယ်။ ဇာတ်ရဲ့ တိုးတက်ရာ တိုးတက်ကြောင်း အကြံပေးတဲ့ ဆောင်းပါး တွေ လိုမယ်။ ဒါမှလည်း ပွဲကြည့်တဲ့ ပြည်သူတွေ ဇာတ်နဲ့ ပတ်သက်တာ ပိုပြီး နားလည် လာမယ်။

''ကျွန်တော်တို့ကတော့ ဆရာကြီးမဟာဆွေ စာတွေကို မမီလိုက်ပါဘူး။ မီလိုက်တဲ့ပုဂ္ဂိုလ်တွေက ပြောကြ တယ်။  ဆရာကြီးရဲ့ ဇာတ်ကောင်တွေဟာ ခေတ်လူငယ်တွေ ကာယ၊ဥာဏ တိုးတက်လာ အောင် စံထား လောက်တဲ့ ဇာတ်ကောင်တွေအဖြစ် ဖန်တီးခဲ့ပါသလဲ''

ကျွန်မကတော့ ဖေဖေ့စာအုပ်တွေ ဖတ်ပြီး ဖေဖေ့ပတ်ဝန်းကျင်မှာ ကြီးပြင်းလာရတာက အချက်တစ်ချက် ပေါ့လေ။ သူရဲ့ စံထားလောက်တဲ့ မျိုးချစ်လူငယ် ဇာတ်ကောင်တွေ ဖန်တီးတာက တစ်ပိုင်း ပေါ့လေ။ တစ်ပိုင်းကလည်း ကျွန်မရဲ့ ဖတ်သမျှ စာတွေထဲမှာ အားကောင်းတဲ့ ဇာတ်ကောင် Strong Character ကိုသဘောကျတယ်။ အားပျော့တဲ့ဇာတ်ကောင် Weak Character ကိုကျွန်မကိုယ်တိုင်ကလည်း မကြိုက် တတ်ဘူး ရှင့်။ ကျွန်မတှို့ဘ၀က စစ်အနိဋ္ဌာရုံကို လည်းကြုံခဲ့တယ်။ ဖေဖေနဲ့လည်း အနီးကပ်ဆုံး၊ အမွဲဆုံး၊ အဆင်းရဲဆုံး အချိန်ကို ကြုံခဲ့ဖူးတော့ လူ့လောကကြီးဆိုတာ သက်သောင့်သက်သာ မွေးဖွားလာတာ မဟုတ်ဘူး။ ဒုက္ခအထွေထွေ ကို ရင် ဆိုင်နိုင်ရမယ်။ ဒီလိုရင်ဆိုင်နိုင်ဖို့ရာ တစ်အချက်က ခံနိုင်ရည်ရှိဖို့ လိုမယ်။ နောက်ဇွဲရယ်၊ သတ္တိရယ် ပေ့ါ။

အဲဒီတော့ ကျွန်မ ဖန်တီးတဲ့ ဇာတ်ကောင်တွေဟာ Strong Character ရှိတဲ့ဇာတ်ကောင်တွေပဲ များပါတယ်။ နောက်ပြီး ရေးရင်းသားရင်းနဲ့ ဖတ်ရှုလေ့လာခဲ့ရတဲ့ ဂျပန်ကဗျာကလေးတစ်ပုဒ် သဘောကျတာ ရှိတယ်။ ရိုးရိုးကလေးပါပဲ။ ကဗျာဆရာက သူ့ကိုယ်သူပဲ အားပေးသလား။ တခြား တစ်ယောက် ကိုပဲ အားပေးသလား မပြောတတ်ဘူး။ သူသည်မိုးကိုလည်း မမှု၊ လေကိုလည်း မမှုဆိုတဲ့ သဘောကလေးပါပဲ။ ကျွန်မကလည်း ကျွန်မဇာတ်ဆောင်တွေကို သူသည်  အဆင်းရဲကို လည်းမမှု၊ အကဲ့ရဲ့ကိုလည်း မမှု၊ အတိုက်အခိုက်ကိုလည်း မမှုဆိုတဲ့ သဘောနဲ့ ဖန်တီးပါတယ်။

စရိုက်သေ ဇာတ်ကောင်နဲ့ စရိုက်ရှင်ဇာတ်ကောင်လို့ နှစ်မျိုးခွဲခြားနိုင်တဲ့အထဲက  အမျိုးသမီး စာရေးဆရာမ တွေဟာ စရိုက်သေဇာတ်ကောင် အသုံးများတယ်လို့ ဆိုကြတယ်။ မမဘယ်လိုများ မြင်ပါသလဲ။

ကျွန်မကတော့ ၀တ္ထုစ,ရေးကတည်းက သဘာဝယုတ္တိရှိတဲ့ ဇာတ်ကောင်၊ ဥပမာဆိုပါစို့.....၀တ္ထု တွေမှာ၊ Fiction တွေမှာတော့ သဘာဝယုတ္တိနဲ့ကင်းလွတ်တဲ့ ဇာတ်ကောင်တွေပါပါတယ်။ ဒါပေမဲ့ Novel တွေမှာ ကျတော့ သဘာဝယုတ္တိရှိတဲ့ ဇာတ်ကောင်တွေပဲ သုံးကြပါတယ်။ ဒီဘက် ရာစုနှစ်ဝက် ကျွန်မဖတ်ဖူးသလောက် မှတ်မှတ်ရရ ပြောရမယ်ဆိုရင် ကျွန်မတို့ မြန်မအမျိုးသမီး စာရေးဆရာမ တွေထဲကဆိုရင် ဆရာမကြီး ဒေါ်ခင်မျိုးချစ် ရေးတဲ့ တက္ကသိုလ်ဝတ္ထုထဲမှာပါတဲ့ တက္ကသိုလ် ကျောင်းသူ တွေ ဆိုရင် သိပ်လှုပ်ရှားတာပဲ။ တကယ်လူနဲ့တူတယ်။'မောင်တို့ ယောက်ျား' ဆိုတဲ့ ၀တ္ထုမှာ ဒီနည်းပဲ။ သူတို့စရိုက် တွေက ရှင်သန်နေတယ်။ သဘာဝကျတယ်။

အစ်မကြီးဒေါ်မမလေး (ဂျာနယ်ကျော်) ရေးခဲ့တဲ့'မုန်း၍မဟူ' ထဲက ဇာတ်ကောင်တွေ ဖြစ်တဲ့ ဝေေ၀တို့၊ ဦးစောလွင်တို့ဆိုရင် တကယ့်သဘာဝယုတ္တိရှိတဲ့ ဇာတ်ကောင်တွေပါပဲ။ ဆရာမဒေါ်ခင်နှင်းယုရဲ့ 'မျှော်လင့်လို့်မဆုံးနိုင်တယ်' တို့၊ 'ချစ်လှချည်ရဲ့' တို့၊ ကြည်အေးရဲ့ 'မြနန္ဒာ' တို့၊ နောက်အခု အမျိုးသမီး စာရေးဆရာမ တော်တော်များများဟာ သရုပ်မှန်ဝတ္ထုဘက်ကို ဦးထည်ရေးလာကြပါပြီ။ မိုးမိုး...တို့၊ မစန္ဒာ...တို့၊ စမ်းစမ်းနွဲ့...တို့ရဲ့ ဇာတ်ကောင်တွေ ဆိုရင်လည်း သဘာဝယုတ္တိဘက် ဦးတည် လှုပ်ရှား နေကြတာ တွေ့ရပါတယ်။

တစ်အချက်က ၀တ္ထုရဲ့ အသက်ဟာ ဇာတ်ကောင်ပါပဲ။ ဇာတ်ကောင်ရဲ့ ကိုယ်၊ နှုတ်၊ နှလုံး သုံးပါးစလုံး လှုပ်ရှားတာ။ သူရဲ့အတွေး၊ သူ့ရဲ့အပြုအမူကို ပေါ်လွင်ထင်ရှားအောင် ရေးနိုင်မယ်။ သဘာဝယုတ္တိလည်း ရှိမယ်ဆိုရင် ယေဘုယျအားဖြင့် ကျွန်မတို့ ၀တ္ထုကောင်းတစ်ပုဒ်လို့ သတ်မှတ်ရပါမယ်။

နောက်တစ်ချက်က ရသပိုငးနဲ့ ပတ်သက်လို့ကတော့ အခုလောလောဆယ်မှာ ကျွန်မတို့ အပါအ၀င် 'ထိ' တဲ့ ၀တ္ထု၊ Touch ဖြစ်တဲ့ ၀တ္ထု၊ မျက်ရည်ကျသွားအောင် ရေးနိုင်တဲ့ ၀တ္ထုမျိုး၊ ဖတ်လိုက်ရင် ကလိထိုး ရယ် ရတာမျိုး မဟုတ်ဘဲ တမြုံ့မြုံ့ တွေးပြီးရယ်ရတာမျိုး (ဒါက ဆရာမောင်ထင်တို့ ဟိုတုန်းက ရေးခဲ့ဖူးပါတယ်)။ ဒါမျိုးလည်း လိုတယ်။

နောက်တစ်ချက်က ကျွန်မအပါအ၀သ် ဒီနေ့ဝတ္ထုရေးတဲ့နေရာမျာ အရှိကိုအရှိအတိုင်းပဲ ရေးလိုက်တာမျိုး ရှိတယ်။ လုပ်တဲ့လူတွေလည်း လုပ်နိုင်ကြပါလိမ့်မယ်။ အတွေးအခေါ်သစ် ဖန်တီး တာမျိုးကိုပေါ့။ သမားရိုးကျ အတွေးအခေါ် လမ်းရိုးက ခွဲထွက်သွားတာမျိုး။ ဥပမာ မြန်မာစာဖတ် ပရိသတ်အသိများတဲ့ 'စိတ္တရလေခါ' ၀တ္ထုလိုမျိုးပေ့ါ။

သူက 'မကောင်းမှု ဆိုသည်မှာ အဘယ်နည်း' ဆိုတဲ့ မေးခွန်းနဲ့ စ,လိုက်တယ်။ တစ်ယောက်သော သူဟာ လောကီအကျိုးအတွက် သူရဲ့ အတ္တကို မစွန့်လွှတ်နိုင်ဘူး။ သူနဲ့ယှဉ်ပြိုင်တဲ့ ပဂ္ဂိုလ်ကတော့ အပျော်အပါး လည်း မက်တယ်။ အရက်သေစာလည်း သောက်စားတယ်။ ပြောကြစို့ဆို ကချေသည် နဲ့လည်း ပျော်ပါးတယ်။ သို့သော်လောကကြီးအတွက် အားလုံးကို စွန့်လွှတ်တယ်။ သူချစ်တဲ့သူတွေ၊ သူ့ပတ်ဝန်းကျင် အတွက် စွန့်လွှတ်တယ်။ စွန့်လွှတ်မှုနဲ့ တိုင်းတာမယ်ဆိုရင် ဘယ်သူက လူကောင်း လဲ၊ ဒါကို သူက အတွေးသစ်နဲ့ပြလိုက်တာ။

နောက်တစ်ချက် ကျွန်မအနေနဲပ ပြောရရင် ၀တ္ထုတစ်ခုလုံးအနေနဲ့ အတွေးသစ်မပေးနိုင်ရင်တောင် မှဖြစ်ရိုးဖြစ်စဉ်ထဲကနေပြီးတော့ပဲ ကျွန်မတို့ လမ်းခွဲထွက်သွားတဲ့ အတွေး၊ ကောင်းတဲ့အတွေး။ ကျွန်မ ဖတ်မိသလောက် ဆိုရင် 'ရှားလော့ခ်ဘရွန်တီ' ရဲ့'ဂျိန်းအဲ'၊ အမျိုးသမီးတွေရဲ့ အခွင့်အရေး တွေ အင်မတန်ဆုံးရှုံးနေတဲ့ ၀ိတိုရိယခေတ်မှာ အမျိုးသမီးလွတ်မြောက်ရေး အတွေးအခေါ်ကို ဂျိန်းအဲမှာ တွေ့ရတယ်။ တစ်နေရာမှာ ဂျိန်းအဲက ဘာပြောသလဲဆိုရင် ကျွန်မတို့ဟာတဲ့ ယေဘုယျ သတ်မှတ်ချက် အားဖြင့် ငြိမ်ငြိမ်ကလေး တည်တည်ငြိမ်ငြိမ် နေရတော့မှာပေါ့လေတဲ့။ သို့သော်လည်းပဲတဲ့။ ကျွန်မတို့ရဲ့ ဥာဏ်ပညာ၊ ကျွန်မတို့ရဲ့ ပညာအရည်အချင်းကို ထုတ်ဖော်ဖို့ နယ်ပယ်များ မရှိတော့ဘူးလားတဲ့။ အနည်းဆုံး ကျွန်မတို့ အစ်ကိုတွေလိုပေါ့လေတဲ့။

ကျွန်မတို့ အစိကိုတွေကို ပေးတဲ့ အခွင့်အရေးမျိုး ကျွန်မတို့ကို မပေးနိုင်ဘူးလားတဲ့။ ကျွန်မတို့ အရည်အချင်း  တွေကို တောက်ပြောင်အောင် သွေးခွင့်မရနိုင်ဘူးလားတဲ့။ သူက အဲဒီလို ပြောခဲ့ပါတယ်။

ဒီလိုအတွေးအခေါ်မျိုးရှိတဲ့ ၀တ္ထုမျိုး ကျွန်မအနေနဲ့ ရေးချင်ပါတယ်။ သဘောလည်းကျတယ်။ ဂျိန်းအဲဟာ စိတ်ကူးယဉ်ဝတ္ထုပေမယ့် ဂျိန်းအဲ  ဆိုတဲ့မိန်းကလေးကို ရုပ်လုံးကြွအောင် သရုပ်ဖော်နိုင် ခဲ့တဲ့အတွက် အပြင်မှာ တကယ်ရှိတဲ့ မိန်းကလေးလို ထင်မှတ်ခဲ့ရပါတယ်။ အဲဒီတုန်းက တစ်ခေတ် လည်းရေးခဲ့တဲ့ 'တော်လ်စတွိုင်း' ရဲ့ War and Peace မှာဆိုရင် စိတ်ကူးယဉ် အချင်အလက်တွေ ကတော်တော်များများ ပါနေတယ်။

ချုပ်ပြောရရင် ဒီလို အတွေးသစ် ပါတဲ့ဝတ္ထုမျိုးဆိုရင် ကျန်နေရစ်မယ်။ ကျွန်မတို့ကတော့ ဘယ်သူပဲ ဖြစ်ဖြစ် ကျန်နေမယ့် ၀တ္ထုတွေ ရေးစေချင်တယ်။ ကျွန်မကိုယ်တိုင်လည်း ရေးချင်ပါတယ်။ ဒေါက်တာထက်အောင် ကလည်း ပြောဖူးပါတယ်။ ကျွန်မတုိ့ ဗမာဝတ္ထုတွေဟာ Philosophy Onlife လိုနေတယ်တဲ့။ ကျန်တာ အားလုံးကောင်းတယ်တဲ့။ ဒါကြောင့် ကျွန်မ ဒါလေးကို ကြိုးစားကြည့် ချင်တယ်''

''မမ ၀တ္ထုထဲက ဂျပန်ဘာသာပြန်တာက... ''

''တို့တိုင်းဌာနီ ပါ၊ တိုယိုတာ ဖောင်ဒေးရှင်းကပဲ ထုတ်မှာပါ''

''ဒီနေ့ မြန်မာစာပေလောကအပေါ် ဘယ်လိုမြင်ပါသလဲ''

''ပွင့်ပွင့်လင်းလင်း ပြောရရင် စာဖတ်ပရိသတ်က Fiction ကိုဇောင်းပေးပြီး ဖတ်နေကြတယ်။ စာရေးတဲ့ သူတွေက သရုပ်မှန်ဝတ္ထု တွေကို ဇောင်းပေးပြီး ရေးဖို့လိုပါတယ်။နောက်တစ်ချက်ကတော့ နိုင်ငံခြားမှာက ၀တ္ထုတစ်ပုဒ် ရေးဖို့ နှစ်နှစ်၊ သုံးနှစ် အချိန်ယူလို့ ရပါတယ်။ တချို့ဆို လေး၊ ငါး၊ ခြောက်နှစ် ကြာမှ ထွက်တာ။ ကျွန်မတို့ ဆီမှာကျတော့ ခြောက်လလောက်  ကြာသွားရင်ကို ပရိသတ်နဲ့ ကင်းကွာ သွားတယ်။ စာရေးကျဲတယ်လို့ ဆိုကြတယ်။ ဒါကိုတော့ ဘယ်လို ဖြေရှင်းရမယ်ဆိုတာ ကျွန်မတို့လည်း တွေးလို့ မရသေးပါဘူး။ အဲဒီတော့ ကျွန်မအမြင်မှာ စာပေလောက တိုးတက်လာဖို့ရာ အရေအတွက်ထက် အရည်အချင်းကို လိုလားသင့်ပါတယ်လို့ မြင်ပါတယ်။

ကျွန်မ စာဖတ်ပရိသတ်တွေကလည်း ကျွန်မကို ကျန်းမာရေး မကောင်းလို့လား။ ဘာလား၊ ညာလား ခဏခဏ စာရေးမေးကြပါတယ်။ ကျွန်မကျန်းမာရေးလည်း ကောင်းပါတယ်။ စာတွေလည်း ဆက်ရေး နေပါတယ် ဆိုတာ ကိုဝင်းငြိမ်းက တစ်ဆင့်ပဲ ပြန်ကြးလိုက်ပါရစေ။

''ကျေးဇူးတင်ပါတယ် မမ၊ မမစာဖတ်ပရိသတ်နဲ့အတူ စိတ်ဓာတ် တက်ကြွစေမယ့် မမ၀တ္ထုတွေကို ကျွန်တော လည်း စောင့်ဖတ်နေပါဦးမယ်။၏''

ပေဖူးလွှာ၊ အမှတ်စဉ်၁၆၊စက်တင်ဘာလ၊ ၁၉၈၂

Credit:shwezinu.blogspot.com