ကျွန်တော့် ဆရာမ
ဒီနေ့ ဇေယျာပဒေသာဖောင်ဒေးရှင်းက ကျင်းပတဲ့ အစည်းအဝေးတစ်ခု တက်ခဲ့ရပါတယ်။ ဇေယျာပဒေသာတိုင်းဇေယျာဆိုတဲ့ ခေါင်းစဉ်နဲ့ပြိုင်ရမယ့် စာမူစီစစ်ရေးအဖွဲ့ထဲမှာ အဖွဲ့ဝင်တစ်ဦးအဖြစ်ပါဝင်နေလို့ပါ။
ဇေယျာပဒေသာဖောင်ဒေးရှင်းက ပညာသင်ထောက်ပံပေးခဲ့တာ (၂၀၀၅)ကနေ ဒီနေ့(၂၀၁၇)ထိ ကျောင်းသား၊ ကျောင်းသူ (၄၀၀)ကျော်ခဲ့ပြီလို့ သိရပါတယ်။ ဒီနှစ်(၂၀၁၇)မှာ ပညာသင်ထောက်ပံ့ကြေးပေးအပ်ခဲ့တဲ့ဦးရေက(၈၀)ဦး ရှိပါတယ်။ အဲဒီ(၈၀)ဦးကို စာမူခေါင်းစဉ်ပေးပြီး ပြိုင်ပွဲကျင်းပတဲ့ သဘောမျိုးပါ။ ဝတ္ထု၊ ဆောင်းပါး၊ ကဗျာ ကို အကန့်အသတ်မရှိ ပေးပို့ယှဉ်ပြိုင်လို့ ရပါတယ်။ အဲဒီသုံးမျိုးကို အင်္ဂလိပ်လိုလဲ ရေးသားယှဉ်ပြိုင်နိုင်ပါတယ်။ ပ၊ ဒု၊ တ အပြင် နှစ်သိမ့်ဆုလည်း ပါပါတယ်။ မြန်မာလို ဆုလေးဆု၊ အင်္ဂလိပ်လို ဆုလေးဆု ချီးမြှင့်ပေးမှာပါ။ မြန်မာလိုပြိုင်ရမယ့် စာမူတွေကတော့ ဒီဇင်ဘာ(၃၁)နောက်ဆုံးပါ။ အင်္ဂလိပ်လိုပြိုင်ရမယ့် စာမူတွေက မတ်လနောက်ဆုံးပါ။ အဲလိုတွေ ရွေးချယ်ဆုချီးမြှင့်ပြီးရင် ဆုရသူများရော၊ ဆုမရသူများပါ ဇေယျာမဂ္ဂဇင်းထုတ်တဲ့အခါ ထည့်ပေးဦးမှာပါ။ ဆုမရပေမယ့် သင့်တော်သူများကို ရွေးချယ်ဖော်ပြပေးသွားမှာပါ။ ဥယျောဇဉ်တို့၊ အသင်းသမိုင်းကြောင်းတို့ စတာတွေကလွဲရင် လူငယ်ကျောင်းသားလေးတွေရဲ့ စာမူကိုပဲ ဦးစားပေးဖော်ပြမှာပါ။
အဲဒီိအစည်းအဝေးမစခင်မှာ ကျွန်မက ဆရာမ ဒေါက်တာဒေါ်ကြူကြူသင်းအစား တက်တာပါဆိုတဲ့ ဆရာကြီး ဦးဘုန်းကြွယ်ကို မိတ်ဆက်နေတဲ့ အသံကို ကြားလိုက်ပါတယ်။ ဆရာမကို သေချာ မကြည့်ဖြစ်သေးဘူး။ ကျွန်တော် အဝင်တံခါးဝနားမှာ ကပ်ထားတဲ့ ဓာတ်ပုံတွေ ကြည့်နေတာ။ အသင်းလှုပ်ရှားမှု မှတ်တမ်းပေါ့။ ဒီအသင်းအတွက် (၂၀၁၅)လောက်တုန်းက ဝဿန်ကြိုသူများဆိုတဲ့ ဆောင်းပါးလေး ရေးခဲ့ဖူးတယ်။ အဲဒီဆောင်းပါးဂျာနယ်စာမျက်နှာလေးကို အဝင်ဝမှာ အရင်းတုန်းက ကပ်ထားတာကိုး။ ပုံတွေကြည့်ဝတော့ နောက်လှည့်လိုက်မှ ဆရာမကို ရုတ်တရက်မြင်တယ်။ တက္ကသိုလ်တုန်းက အင်္ဂလိပ်စာပြတဲ့ ကျွန်တော့်ဆရာမဆိုတာ ချက်ချင်းမှတ်မိတယ်။ သေချာကြည့်တော့ နှစ်တွေကြာသွားတော့ သိပ်မတူတော့သလိုတော့ ခံစားရတယ်။ ကျွန်တော် ဝမ်းသာအားရနဲ့ ဆရာမ ကျွန်တော့်မှတ်မိလား လို့မေးရင်း ရုတ်တရက် သတိရမိသွားတယ်။ တပည့်တွေ ထောင်ချီ၊ သောင်းချီကို ဆရာမက ဘယ်မှတ်မိနိုင်မလဲ။ အဲဒါကြောင့် ချက်ချင်းပဲ ဆောရီးပါ ဆရာမ၊ ကျွန်တော်က ဆရာမ တပည့်ပါ။ ဆရာမ အင်္ဂလိပ်စာ သင်ပေးခဲ့တာပါ လို့ပြောလိုက်ရတယ်။ ကျွန်တော့် စကားကို ဆုံးအောင်နားထောင်ပြီး ဆရာမ မှတ်မိပါတယ်လို့ ပြောတယ်။ ဆရာမ မျက်ဝန်းတွေထဲမှာ ကျွန်တော့်ကို မှတ်မိတာကို ခံစားမိတယ်။ နောက်ပြီး စိတ်ထဲမှာလည်း ပျော်နေတယ်။ ဆယ့်ငါးနှစ်၊ ဆယ့်ခြောက်နှစ်လောက် မတွေ့ရပဲ ဒီနေ့မှ ပြန်တွေ့ရတာ။ ပြန်တွေ့တွေ့ချင်း ဆရာမက ကျွန်တော့်ကို မြင်တယ်။ မှတ်မိတယ်။ သိပ်ကျေနပ်စရာကောင်းတာပဲ။ ရိုးရိုးသားသားပြောရင် မူလတန်းမှာ ကျွန်တော်ချစ်တဲ့ ဆရာမတွေ များတယ်။ အလယ်တန်း အထက်တန်းမှာ မရှိသလောက်ပဲ။ လေးစားမှုတော့ ရှိတယ်။ မချစ်တာကို ပြောချင်တာပါ။ တက္ကသိုလ်မှာတော့ နှစ်ယောက်ရှိတယ်။ ဆရာမက တစ်ယောက်အပါအဝင်ပါ။ တက္ကသိုလ်ထဲက ဆရာကြယ်စင်မင်း+နန်းယုယုမွန်တို့ဆီသွားတိုင်း ရူပဗေဒမေဂျာက ကျွန်တော့်ဆရာမ ညနေပိုင်းလမ်းလျှောက်နေတာကို အမြဲတမ်းမြင်မိတယ်။ ခု ဆရာမကတော့ ဒီနေ့မှ ပြန်တွေ့ရတာပါ။ ဆရာမမြင်တာနဲ့ ဆရာမ နာမည်ကိုပါ ပြန်မှတ်မိတယ်။ ကျွန်တော်ပြောချင်တာက လူတစ်ယောက် တစ်ယောက် ချစ်ဖို့၊ ခင်ဖို့ မလွယ်ပါဘူး။ အတတ်ပညာကြောင့် လေးစားဖို့ လွယ်သလောက်လေ။ ခုဟာက ကျွန်တော်ကလည်း ချစ်တယ်။ ကျွန်တော့်အပေါ်မှာလည်း ချစ်ခင်ပြီး သတိတယ ရှိတဲ့ ကျောင်းသားဘဝက ဆရာမကို ပြန်ဆုံရတာ သိပ်ပြီး မင်္ဂလာရှိတာပဲ။ ဘာပဲဖြစ်ဖြစ် ဒီနေ့ကျွန်တော်ပျော်တယ်။ ခင်ဗျားမှာလည်း ချစ်ခင်ရတဲ့ ဆရာ၊ ဆရာမဆိုတာ ရှိခဲ့မှာပါ။ ဒီနေ့ အဲဒီ ဆရာ၊ ဆရာမအကြောင်းလေး စာတစ်ပိုဒ်အဖြစ် ချရေးကြည့်ပါလား။ သေချာတာက စာမရေးဖြစ်ပေမယ့် အတွေးထဲမှာ တက္ကသိုလ်ထဲတော့ အလည်ရောက်သွားမှာ သေချာတယ်။
ချစ်ခြင်းများဖြင့်
သင့်ရဲ့
ရှဥ့်ညိုလေး
(၈.၁၂.၂၀၁၇ နေ့လည် ၁း၂၃ မိနစ်)
Comments
Post a Comment